Loma 1 - Livulu lya Shukulu Kalunga

¹ Yange Paulu, ngamba ya Kilistu Yesu na muluwa uje yaangwile nakumusana kuli Njambi mukwambulula Vin̄anda vyendi Vyavivwa.

² Vin̄anda Vyavivwa vavikulaesele ku san̄ulu kuli Njambi muli vaka-kwimanena vendi, ngwe muvanasoneka mu Visoneka Vyakujela.

³ Vinapu vya Munendi, Mwene yetu Yesu Kilistu, ngwe ku cisemwa cendi ca vunu, wasemukile ku naanga ya Ndaviti,

⁴ ngwe ku vu Njambi vwendi vwakujela, vamumwesele na nzili yakama kupwa Muna Njambi omo vamusangwile ku vatsi.

⁵ Muli ikeye Njambi wanjanene vije vyanjipande mukupwa muluwa omwo ali Kilistu, mukutwamenena miyati yoshe kukukulaela nakukwononoka.

⁶ Akati ka ava, neni amuli, vaje vaanasana Njambi kukundama kuli Yesu Kilistu.

⁷ Ngecivene, njilinakusonekela kuli yeni voshe muli mu Loma vaje vaazema Njambi nakumisana ngeci mupwe mu vanu vendi. Njambi Tatetu na Mwene Yesu Kilistu vamyane kutetela na kwoloka.

Lilombelo lyakukandelela

⁸ Akulivanga, njikandelela kuli Njambi yange ali Yesu Kilistu ali yeni voshe, omwo kukulaela kweni kunatsimana mu kaye mwoshe.

⁹ Omwo Njambi ikeye mukaleo wange ngeci vyoshe vije njendeka vinapu vya vushunga, Njambi uje injilinakupangela na mbunge yange yoshe akwambulula Vin̄anda Vyavivwa vya Munendi. Njambi nazivuka ngeci njikamyanuka

¹⁰ simbu yoshe mu malombelo ange njikalombo ngwange Njambi mu cizango cendi nga atava njiije kuli yeni ololo.

¹¹ Omwo njishaka manene kumimona, njakumyane vwana vwa vivezikiso vya munzinzime mukumitakamesa.

¹² Njendeka ngeci neni nange twakulitakamese a simbu imolika, yeni akukulaela kwange nange akukulaela kweni.

¹³ Vakwetu, munapande kwanuka ngweni visimbu vyavingi njakele na vutumbe vwakwija oko nakumisikamesa, oloni kuli cuma cimo cinanjivindika. Njishaka kukoka vanu akati keni, ngwe munjinalingi akati ka vaje kesi vaYunda.

¹⁴ Omwo njili na likongo lya vipangi akati ka vanu voshe, kuli vaka-kunanguka na ku vilema, kuli vaka-kulilongesa na kuli vaje vali ku nzimba.

¹⁵ Ngecivene, njishaka manene kwambulula Vin̄anda Vyavivwa kuli yeni lalo muli mu Loma.

Nzili ya muzimbu wauvwa

¹⁶ Omwo kunjesi na shwamwa mukwambulula muzimbu wauvwa, unapu nzili ya Njambi yakwovola voshe vaje vakulaela, akulivanga kuli vaYunda, co lalo na kuli vaje kesi vaYunda.

¹⁷ Omwo muzimbu wauvwa usholola vati Njambi nalingisa vanu ngeci vapwe vaka-vushunga ku mesho endi, cinapu mukukulaela kutunda ku shongo nakweta ku mamaneselelo. Ngwe muvyendeka visoneka ngwavyo, “Munu uje ivanapwisa muka-vushunga ku mesho a Njambi akukulaela akayoya.”

Vanu voshe vali na mulonga ku mesho a Njambi

¹⁸ Omwo vukalu vwa Njambi vunasholoka kutunda mwilu omwo a vuvi naa vilinga vya kupenga-penga vyoshe vya vanu vaje vilinga vyavo vyavivi vivindika vushunga ngeci kesi vavuzivuke.

¹⁹ Omwo Njambi avanyanyamesa, omwo vanu valinga vuvi nameme vazivuka vushunga vwa Njambi, vuje vwanasholola ikeye vavenya kuli vakevo.

²⁰ Tunde aje Njambi watangele kaye, vifwa vyendi vije kutwasa kumona, nzili yendi ya myaka yoshe na cifwa cendi ca vu Njambi, vinasholoka mwamuvwa, vanu vasa kuvizivukila mu vyuma vije vyanalingi Njambi. Ngecivene, vanu ava kuvasa kulisambesa embwe!

²¹ Omwo nameme vazivuka Njambi, oloni kuvamusingimika, nambe kumukandelela. Oloni viyongola vyavo vinapu vyangoco, co mana avo amupulungwa anashulu na lisusulungu.

²² Vendeka ngwavo vanapu vaka-mana, oloni vanapu vilema,

²³ co vanalikela kulemesa Njambi wakuyoya myaka yoshe, oloni valemesa vyuma vya vifwa vya munu uje kesi kuyoya myaka yoshe na vifwa vya tuzila nambe tusitu nambe vyakulikoka.

²⁴ Ngecivene, Njambi navecelela ngeci valinge vyuma vya mazilo ngwe ku mashungu a vimbunge vyavo, co valinga vyuma vya shwamwa kuli umo na mukwavo.

²⁵ Omwo vanavyana kukulaela vushunga vwa Njambi, co vanakulaela makuli, co valemesa nakupangela vije vyanatanga Njambi kujeneka kulemesa vavenya uje wavitangele, uje ivanapande kushangazala myaka yoshe! Ewa.

²⁶ Omwo a cuma eci, Njambi navecelela ngeci valinge vyuma vya shwamwa ngwe ku mashungu avo. Nambe vanakazi vanatengulula kulinga vilika na vanalume mu ngila ya cisemwa, oloni valinakuvilinga mu vingila vije kuvyapandelemo.

²⁷ Co mu ngila imo lalo vanalume vanatengulula kulinga vilika na vanakazi mu ngila ya cisemwa, oloni valinakulinga vundei na vakwavo vanalume. Vanalume valinakulinga vyuma vya shwamwa kuli umo na mukwavo, co a cuma eci vanatambula fweto inavapande omwo vilinga vyavo vyavivi vije vivanalingi.

²⁸ Omwo vanu ava vanavyana kunyunga vushunga vwakuzivisisa Njambi mu viyongola vyavo, Njambi navecelela vakale na mana amavi, ngeci valinge vyuma vije kuvapandele kulinga.

²⁹ Vanashulu na vyuma vyoshe vya kupenga-penga na vuvi na cipululu na cizindo, vanashulu na cipululu nakutsiya na lwozi na makuli na linyanyamena. Vafweya

³⁰ nakwendeka vyavivi ali umo na mukwavo, vanapu vaka-kuzinda Njambi, vaka-likamba, vaka-kulyalesa, co vaka-kulipamba, vayongola vingila vyavingi vyakupangelamo vuvi, vaka-kujeneka kwononoka visemi vyavo,

³¹ kuvesi na citaku-taku, kuvesi kunyunga vikulaeso vyavo, co kuvesi kumwesa ngozi nambe kuzivilako vakwavo mema ku mbunge.

³² Vazivuka ngeci lishiko lya Njambi lyendeka ngwalyo vanu vaje vayoya mu ngila eyi vanapande kutsa. Kesi vyuma evi lika vivalinakulinga embwe, oloni valizivasana na vaje valinakuvilinga.