Kwituluka mu Mashiko 9 - Livulu lya Shukulu Kalunga

Kujeneka kwononoka kwa vanu va Isalele

¹ “Tolilileni yeni vanu va Isalele! Ku litangwa lya lelo muli kuyehi nakujavuka Ndonga ya Yondau, nakushwana lifuti lije lya miyati ije yakama ya nzili kutuvakana yeni. Vinganda vyavo vyakama, vili na vivumbe vyaketa ndo na kwilu.

² Co vanu vamwo vapwa vavalaja na nzili, vakevo vatekulwila va makisi-kisi, mwavazivuka laja ngwavo naumo wai asa kulwa navo nakuvafungulula.

³ Ngecivene, zivukeni ku litangwa lya lelo ngweni Shukulu Kalunga Njambi akaya kulutwe lweni ngwe tuhya twa vukalu manene, ikeye akavanyongesa nakuvafungulula ku mesho eni, ngecivene, mukavasheka nakuvanyongesa vwasi-vwasi, ngwe mwamikulaesele Shukulu Kalunga.

⁴ “Omo Shukulu Kalunga Njambi yeni navashekemo, kesi mukendeke mu vimbunge vyeni ngweni, ‘Omwo akushungama kwetu mukemwo Shukulu Kalunga natunene mu lifuti eli nakulishwana.’ Shukulu Kalunga alinakumishekela vanu ava omwo ya vuvi vwavo.

⁵ Kesi omwo kushungama kweni nambe vushunga vwa vimbunge vyeni amukakovelela nakushwana lifuti lyavo embwe, Shukulu Kalunga alinakumishekela vanu ava omwo ya vuvi vwavo, ngeci akolese lijwi lije lyakulaesele kuli vakukulwila veni, va Avilahama, na Isake, na Yakomba.

⁶ Zivukeni ngweni kesi omwo akushungama kweni mukemwo Shukulu Kalunga alinakumyana lifuti eli lyalivwa nakulishwana embwe. Yeni mwapwa vanu vakukaluwa vimbunge.

⁷ “Anukeni, co kesi mwivale muje mumwashangumwine Shukulu Kalunga Njambi yeni mu mambo. Tunde a litangwa lije mwatundile mu Ingito noo ku litangwa lya lelo munete kuno, yeni munakala nakutengulukila Shukulu Kalunga.

⁸ Nameme kuje ku Munkinda wa Sinai yeni mwashangumwine Shukulu Kalunga, co waluvalele manene ngeci washakele kuminyongesa.

⁹ Co omo njalamatele ku munkinda nakutambula vije vitale vya mamanya, vitale vya cikumiiyo cije walikumiiye Shukulu Kalunga, njakele kuje ku munkinda makumi awana a matangwa mutanya na vutsiki, co kunjalile vyakulya nambe kunwa mema.

¹⁰ Asinoni Shukulu Kalunga wanjanene vije vitale vivali vya mamanya, wasonekele na livoko lyendi vavenya vije vyendekele kuli yeni oku ali mukati ka tuhya a litangwa lije mwalikungulwile kuje ku munkinda.

¹¹ Munima ya matangwa aje makumi awana a mutanya na vutsiki, Shukulu Kalunga wanjanene vitale vivali vya mamanya aje wasonekeleo cikumiiyo.

¹² “Asinoni Shukulu Kalunga wendekele kuli yange ngwendi, ‘Zambula shelumuka vwasi ku munkinda uye kuli vanu vove vaje vawatundisile ku Ingito, omwo kuvanjononokele, co vanalingi vuvi vwakama manene akufula kamponya.’

¹³ “Co Shukulu Kalunga wendekele kuli yange ngwendi, ‘Njazivuka vanu ava vapwa vakukaluwa vimbunge.

¹⁴ Njecele ngeci njivanyongese nakuzilula lizina lyavo ano asi. Co njikakupwisa muyati wakama na nzili kutuvakana vakevo.’

¹⁵ Ngecivene, njatengulukile nakushelumuka kutunda a munkinda, oku munkinda ulinakwenya. Co njambatele vije vitale vivali aje asonekele cikumiiyo.

¹⁶ Omo njakengele, co njamwene ngeci munavulumuna kuli Shukulu Kalunga Njambi yeni. Mwafulile kamponya ka cifwa ca muna ngombe.

¹⁷ Ngecivene, njambatele vije vitale vivali vya mamanya, co njavyumbilile asi ngeci vyapazukile.

¹⁸ Co njalyumbilile asi nakuvulumana ku mesho a Shukulu Kalunga matangwa makumi awana a mutanya na vutsiki. Kunjalile vyakulya nambe kunwa mema. Njalingile eci omwo a vuvi vuje mwalingile ku mesho a Shukulu Kalunga ngeci mwashambeyeye vukalu vwendi.

¹⁹ Mukemwo njazivile lyova lyakama lya vukalu vwa Shukulu Kalunga, omwo ikeye waluvalele manene nakushaka kuminyongesa, oloni aje vene lalo Shukulu Kalunga wanjitolililile.

²⁰ Co Shukulu Kalunga waluvalele lalo na Alone ngeci amutsiye, oloni njamulombelelele a simbu ije vene.

²¹ Ngecivene, njanonele cuma cije cacivi cije cimwalingile, muna ngombe wa vutale uje mwafulile, co njamumbilile mu tuhya, ngeci njamutsenene na kumutwa vunga, mukemwo njombilile vuje vunga mu muna ndonga ije yakele nakutunda ku munkinda.

²² “Co yeni lalo mwaluvalesele Shukulu Kalunga Njambi yeni omo mwakele ku Tambela, na ku Masa, na ku Kimbelote-Hatava.

²³ Co omo Shukulu Kalunga wamitumine ku Kandeshe Mbaleneya wamishikile kuya nakukashwana lifuti lije lyamyanene, oloni yeni mwatengulukilile kushika kwa Shukulu Kalunga Njambi yeni. Kumwamukulaelele nambe kumwononoka.

²⁴ Tunde aje anjamizivukila, munakala nakutengulukila Shukulu Kalunga.

²⁵ “Ngecivene, njalyumbilile asi nakuvulumana ku mesho a Shukulu Kalunga a matangwa aje makumi awana a mutanya na vutsiki, omwo Shukulu Kalunga wendekele ngeci akaminyongesa.

²⁶ Co njalombelele kuli Shukulu Kalunga ngwange, ‘Yove Shukulu Kalunga wa Akamwa ya Vyoshe, kesi unyongese vanu vove vaje vawapatwile na nzili yove yakama kuvatundisa mu Ingito na livoko lyove lya nzili.

²⁷ Anuka vangamba vove, va Avilahama, na Isake, na Yakomba, kesi ukenge kukukaluwa kwa vimbunge vya vanu ava, nambe ku kupenga-penga kwavo, nambe ku vuvi vwavo embwe.

²⁸ Nga ulingamo, co vaka-Ingito vakendeka ngwavo Shukulu Kalunga kasele kwetesa vanu vendi mu lifuti lije lyavakulaesele omwo wavazinda, mukemwo wavatwalele mu mambo ngeci akavatsiilemo.

²⁹ Omwo ava vakevo vanu vove na vushwana vwove, vanu vaje vawaangwile kupwa vove. Wavatundisile mu Ingito na nzili yove yakama, na livoko lyove lyakwolola.’