Kwituluka mu Mashiko 8 - Livulu lya Shukulu Kalunga

Lifuti lyalivwa lije vakashwana vanu va Isalele

¹ “Ononokeni mashiko oshe awa njimishika ku litangwa lya lelo, mukanyanyame nakuwalinga ngeci mukayoye, nakusemunwina manene, co mukakovela nakushwana lifuti lije lyakulaesele Shukulu Kalunga kulyana vakukulwila veni.

² Co mukanuka vati Shukulu Kalunga Njambi yeni wamitwamenenene mu vungenzi vwa kulyala ngacije mukati ka mambo, a myaka makumi awana ngeci amyononwese nakumyeseka, mukuzivuka vije vyakele mu vimbunge vyeni nambe mwanyungile mashiko endi, nambe kumwawanyungile.

³ Co ikeye wamyononwesele nakumikesa na njala, asinoni wamilisile vyakulya vya maana, vyakulya vije yeni kumwazivukile nambe vakukulwila veni kuvavizivukile mukumilongesa ngeci munu kasa kuyoya na likende lika, oloni kuvanga kukulaela nakwononoka majwi oshe aje endeka Shukulu Kalunga.

⁴ Vyakuzala vyeni kuvyakuluvalele, na mendi eni kuwazimbile a simbu ije ya myaka makumi awana.

⁵ Zivukeni mu vimbunge vyeni ngweni ngwe cisemi anyanyamesa vana vendi, mukemwo vene mwaminyanyamesa Shukulu Kalunga Njambi yeni.

⁶ Ngecivene, mukanyunga mashiko a Shukulu Kalunga Njambi yeni nakwenda mu vingila vyendi nakumwononoka.

⁷ Omwo Shukulu Kalunga Njambi yeni akamikovelesa mu lifuti lyalivwa, lifuti lije lili na vana va vindonga vya mema na masima a tuvwelu-vwelu aje alinakusheloka mu vyana na mu malundu.

⁸ Likelyo lifuti lya tiliku na mbale ya maumwa, na mikolovozi ya vushuka vwa vinyu, na mikuyu, na mapomingilanete, na miti ya olive, na vuki.

⁹ Mu lifuti muje mwakala vyakulya vyavingi navimo vyakujenekamo vyai. Lifuti lije, mamanya amwo akala na vutale mukati, na malundu amwo mwasa kwindamo vunengu.

¹⁰ Omo munali laja nakukuta, co mukashangazala Shukulu Kalunga Njambi yeni omwo ya lifuti lyalivwa lije lyanamyana.

Mosesa anangula vanu va Isalele kutewa vakevala Shukulu Kalunga

¹¹ “Ngecivene, nyanyameni kutewa mukevala Shukulu Kalunga Njambi yeni a kwononoka mashiko endi, na vilongesa vyendi, na vizilika vyendi evi njimishika ku litangwa lya lelo.

¹² Nyanyameni kutewa omo munali laja nakukuta, nakutunga vinjuvo vyavivwa nakuyoyelamo,

¹³ na matanga, na vimuna veni vanatumu, na siliva yeni, na ngolinde yeni, na vufuko vweni vwoshe vunatumu,

¹⁴ cooni vimbunge vyeni vikalyalesa nakwivala Shukulu Kalunga Njambi yeni uje wamitundisile mu Ingito, mu lifuti lya vundungo.

¹⁵ Ikeye wamitwamenenene mu mambo yakama yakujujwisa muje mwakele manyoka va vushungu vwavuvi na manyewe, mu lifuti muje mwakuma mwakujeneka mema. Nameme ngoco, ikeye wamituwisilile mema ku limanya lyakukola.

¹⁶ Muje mu mambo Shukulu Kalunga wamyanene maana ngeci mulye, vyakulya vije vakukulwila veni kuvavizivukile, ngeci amyononwese nakumyeseka, ngeci kulutwe akase kumivezikisa na vyuma vyavivwa.

¹⁷ Ngecivene, nyanyameni kutewa mukendeka mu vimbunge vyeni ngweni, ‘Yetu vavenya twalifukisa na nzili yetu na vukama vwetu.’

¹⁸ Oloni mukanuka ngeci ngweni Shukulu Kalunga Njambi yeni ikeye namyana nzili yakufuka vufuko. Ikeye alinakulinga eci ngeci akolese cikumiiyo cije walikumiiye na vakukulwila veni, omwo ikeye wapwa wa kulongwa na ku litangwa lya lelo.

¹⁹ Kesi mukevale Shukulu Kalunga Njambi yeni nakukava vinjambi veka nakuvalemesa nakuvapangela embwe. Nga mulingamo, njiminangula litangwa lya lelo ngwange mwa vushunga vene mukanyonga.

²⁰ Nga yeni kumwononoka Shukulu Kalunga, co mukanyonga ngwe muje Shukulu Kalunga mwakanyongesa miyati ije vali kulutwe kuje mulinakuya.