Kwituluka mu Mashiko 7 - Livulu lya Shukulu Kalunga

Vanu va Isalele vapwa muyati wakwangula kuli Shukulu Kalunga

¹ “Omo Shukulu Kalunga Njambi yeni akamitwala mu lifuti lije mulinakukovela nakulishwana, ikeye akashekamo miyati yakama. Co Shukulu Kalunga akashekamo miyati itanu na ivali yakama manene ya nzili kutuvakana yeni, vaHivi, na vaNgilengashi, na vaAmoli, na vaKanana, na vaPelezi, na vaHiti, na vaNjevushi.

² Omo Shukulu Kalunga Njambi yeni akavakundika mu mavoko eni, mukavanyongesa voshe njwa. Kesi mukalikumiiye navo, nambe kuvazivila mema ku mbunge embwe.

³ Kesi mukalyambatele navo, co kesi mukashombwese vana veni va vanakazi kuli vana vavo va vanalume, nambe kwambatela vana veni va vanalume vana vavo va vanakazi embwe.

⁴ Vakevo vakatangula vana veni va vanalume kukava Shukulu Kalunga nakulemesa vinjambi veka. Eci cikashambeya vukalu vwa Shukulu Kalunga, co akaminyongesa a simbu ije vene.

⁵ Omu mukemwo mumukalinga navo, mukasiwula mitula yavo, nakuvujula vimanda vya mamanya vyakulemesela, nakuvatula viti vya Ashela njambi yavo wa munakazi, nakwenyeka tumponya twavo.

⁶ Shukulu Kalunga Njambi yeni wamyangwile kupwa vushwana vwendi kutuvakana vanu voshe vali ano asi ngeci mukapwe vanu vendi vakujela.

⁷ “Shukulu Kalunga kamizemene nakumyangula omwo kutuma kweni kutuvakana miyati yeka embwe. Yeni mwapwile muyati waundondo manene akati ka vanu voshe.

⁸ Oloni Shukulu Kalunga wamizemene, co alinakunyunga cikumiiyo cije walikumiiye na vakukulwila veni. Ngeci wamitundisilemo mu lifuti lya vundungo na livoko lyendi lya nzili yakama nakumikula ku livoko lya mwene wa Ingito.

⁹ Ngecivene, zivukeni ngweni Shukulu Kalunga Njambi yeni ikeye Njambi umolika, ikeye wapwa Njambi wa kulongwa. Ikeye wanyunga cikumiiyo cendi, na cizemo cendi cije kucesi kutenguluka kuli vaje vamuzema nakunyunga mashiko endi ku visemwa 1,000.

¹⁰ Oloni ikeye kesi kwishwala kuhisa vaje vamuzinda.

¹¹ Ngecivene, mukanyunga mwamuvwa mashiko, na vizilika, na vilongesa vinjinamishiki ku litangwa lya lelo.

Vivezikiso vya vaka-kwononoka

¹² “Nga mutolilila ku mashiko awa nakuwanyunga nakuwononoka, asinoni Shukulu Kalunga Njambi yeni akatwalao kunyunga cikumiiyo cendi, na cizemo cendi cije kucesi kutenguluka, cije calikumiiye na vakukulwila veni.

¹³ Co ikeye akamizema nakumivezikisa, mukatuma nakukala na vana vavangi, na vimbuto mu mahya eni, na vimbuto vya vinona, na vinyu vyaviha, na mazi a olive, nakumyana vimuna vavangi, na vimanga vavangi. Ikeye akamyana vivezikiso vyoshe evi mu lifuti lije wakulaesele vakukulwila veni kumyanalyo.

¹⁴ Mukavezika kutuvakana vanu voshe. Kumukakala muumba mukati keni, nambe munalume, nambe munakazi, nambe vimuna veni embwe.

¹⁵ Shukulu Kalunga akaminyunga ku mishongo yoshe, co ikeye kakamisholwela mishongo yakukomokesa ije mwamwene mu Ingito, oloni akaisholwela lika vitozi veni.

¹⁶ Co mukanyongesa vanu voshe vaje vakakundika Shukulu Kalunga Njambi yeni mu mavoko eni, co kesi mukavazivile mema ku mbunge embwe, nambe kulemesa vinjambi vavo, omwo eci cikapwa nganjo kuli yeni.

¹⁷ “Amo mukalishoshomwena mu vimbunge vyeni nakwendeka ngweni, ‘Miyati eyi inatumu manene, co twasa kuvasheka vatijo?’

¹⁸ Kesi mukavazivile lyova. Mukanuka vije vyalingile Shukulu Kalunga Njambi yeni kuli mwene wa Ingito, na kuli vanu vendi voshe.

¹⁹ Oloni mukanuka vikomokeso vije mwamwene na mesho eni vavenya, na vizivukiso, na vikomokeso, na nzili yakama ije yamitundisile nayo Shukulu Kalunga Njambi yeni mu vundungo. Mu ngila eyi vene wanyongesele vaka-Ingito, co ikeye akanyongesa lalo vanu voshe ava mulinakutewa ololo.

²⁰ Shukulu Kalunga Njambi yeni akatuma malu, co akanyongesa vaje vakaputumuka nakukavanda akati keni.

²¹ Ngecivene, kesi mukavazivile lyova omwo Shukulu Kalunga Njambi yeni, ou ali akati keni ikeye Njambi Muka-nzili, wakujujwisa.

²² Shukulu Kalunga Njambi yeni akasheka miyati ije ili kulutwe lweni kamandondo-kamandondo. Kumukasa kuvanyongesa voshe mu simbu imolika embwe, kutewa tusitu vakasemunwina nakutuma, co vakamiyandesa.

²³ Oloni Shukulu Kalunga Njambi yeni akakundika vitozi veni mu mavoko eni, co akavaiya-yiisa noo voshe vananyongo njwa.

²⁴ Ikeye akakundika vimyene vavo mu mavoko eni. Voshe mukavatsiya, co vakevo vakavevala mu lifuti, naumo wai akemana ku mesho eni noo munavanyongesa voshe.

²⁵ Ngecivene, mukenyeka tumponya twa vinjambi vavo vakushonga. Kesi mukaliveyele siliva nambe ngolinde ije valinayo, co kesi mukalinoneleyo embwe kutewa mukatsa mu nganjo yavo, omwo vyapwa vya vunyengwe ku mesho a Shukulu Kalunga Njambi yeni.

²⁶ Kesi mukakovelese vyuma vya vunyengwe mu vinjuvo vyeni embwe, co cikapwa cisingo cimo cije cikakala ali yeni ngwe ali vije vinjambi vavo. Omwo vyuma evi vyapwa vyakusinga kuli Shukulu Kalunga.