Kwituluka mu Mashiko 5 - Livulu lya Shukulu Kalunga

Mashiko Likumi

¹ Mosesa wasanene vanu va Isalele voshe, co wendekele kuli vakevo ngwendi, “Tolilileni, yeni vanu va Isalele, ku vilongesa na mashiko oshe awa njilinakumileka ku litangwa lya lelo. Lilongesenivyo mwamuvwa nakuvyononoka.

² Ku Munkinda wa Sinai Shukulu Kalunga Njambi yetu walingile netu cikumiiyo.

³ Kesi na vakukulwila vetu walikumiiye cikumiiyo eci embwe, oloni wakulikumiiye netu yetu voshe tulinakuyoya ku litangwa lya lelo.

⁴ Co kuje ku munkinda Shukulu Kalunga wendekele neni mesho na mesho oku ali mukati ka tuhya.

⁵ Co yange njemanene akati keni na Shukulu Kalunga a simbu ije kumileka vije vyendekele, omwo yeni mwakele na lyova lya tuhya, co kumwasele kulamata a munkinda. “Asinoni Shukulu Kalunga wendekele ngwendi,

⁶ ‘Yange njapwa Kalunga Njambi yeni, uje wamitundisile mu Ingito, kuje mwakele mu vinzinda.

⁷ “ ‘Kesi mukalemese njambi weka kuvanga yange lika.

⁸ “ ‘Kesi mukalishongele cifwa ca cuma cimo cili mwilu nambe cili ano asi, nambe cili mu mema mwisi ya asi.

⁹ Kesi mukatsikamene tumponya, nambe kuvalemesa, omwo yange njapwa Kalunga Njambi yeni, Njambi wa lifuwa. Co njikahisa vaje vanjizinda na vatekulwila vavo kutwala ku cisemwa camucitatu neci camuciwana.

¹⁰ Oloni njikamwesa cizemo cange cije kucesi kutenguluka ku visemwa 1,000 vya vaje vanjizema nakunyunga mashiko ange.

¹¹ “ ‘Kesi mukapangese lizina lyange mwamuvi, omwo yange Kalunga Njambi yeni njikahisa voshe vaje vakapangesa lizina lyange mwamuvi.

¹² “ ‘Nyungeni Litangwa Lyakuhwima nakulijelesa. Omwo yange Kalunga Njambi yeni njinamishikimo.

¹³ Mukapanga nakulinga vipangi vyeni vyoshe matangwa atanu na limo,

¹⁴ oloni a litangwa lyamucitanu na avali likelyo likapwa Litangwa Lyakuhwima lije lyakundama kuli yange Kalunga Njambi yeni. A litangwa lije kumukapanga cuma nacimo cai, nambe yeni, nambe vana veni va vanalume, nambe vana veni va vanakazi, nambe vindungo veni, nambe vimuna veni, nambe vaka-kwija vaje vali mu lifuti lyeni.

¹⁵ Omwo a matangwa atanu na limo, yange Kalunga Njambi yeni njatangele lilu, na asi, na mema a kalunga, na vyoshe vije vilimo, oloni a litangwa lyamucitanu na avali a likelyo njahwimine. Mukemwo vene yange Kalunga njavezikisile Litangwa Lyakuhwima nakulijelesa.

¹⁶ “ ‘Singimikeni vaishweni na vanyokweni, ngeci mukayoye simbu yakama mu lifuti lije linjikamyana yange Kalunga Njambi yeni.

¹⁷ “ ‘Kesi mukatsiye.

¹⁸ “ ‘Kesi mukalinge vupangala.

¹⁹ “ ‘Kesi mukaive.

²⁰ “ ‘Kesi mukavangele vakweni vukaleo vwa makuli.

²¹ “ ‘Kesi mukaliveyele njuvo ya mukweni, kesi mukaliveyele munakazi wa mukweni, nambe ndungo yendi wa munalume, nambe ndungo yendi wa munakazi, nambe ngombe yendi, nambe cimulu cendi, nambe cuma cimo ceka calinaco.’

²² “Awa akewo mashiko aje Shukulu Kalunga waanene kuli yeni voshe omo mwalikungulwile kuje ku munkinda, omo ikeye wendekele na lijwi lya nzili oku ali mukati ka tuhya mu lishelwa lije lyakuzivala. Co Shukulu Kalunga wamyanene mashiko awa. Kukwesi eka lalo awezeleleleko ayi. Co waasonekele a vitale vivali vya mamanya nakuvyana kuli yange.

Vanu vaziva lyova

²³ “Omo mwazivile lijwi lilinakwendeka mu lisusulungu a simbu ije munkinda washwamene nakwenya na tuhya, co vantwama va miyati yeni na vakulunu veni vashwenyele kuli yange

²⁴ vendekele ngwavo, ‘Shukulu Kalunga Njambi yetu natumwesa vukama vwendi na vumpau vwendi omo tunazivi lijwi lyendi alinakwendeka mukati ka tuhya! Co lelo oni twamono ngeci ngwetu kuma munu asa kuyoya nameme Njambi endeka kuli ikeye.

²⁵ Oloni omwo vikajo tutsila? Otu tuhya twakama tutunyongesa. Mwa vushunga nga tukaziva lalo lijwi lya Shukulu Kalunga Njambi yetu, co tukatsa.

²⁶ Omwo munu iyajo nazivi laja lijwi lya Njambi wakuyoya endeka oku ali mukati ka tuhya, ngwe mutunazivi yetu, ngeci uje munu ayoye?

²⁷ Ngecivene, Mosesa, mwane, shwenya kuyehi ngeci uzive vyoshe vije vyendeka Shukulu Kalunga Njambi yetu. Asinoni utuleke vyoshe vije akuleka Shukulu Kalunga Njambi yetu. Co tukavitolilila nakuvyononoka.’

²⁸ “Co Shukulu Kalunga wamizivile omwo mwendekele kuli yange, co ikeye wendekele kuli yange ngwendi, ‘Njaziviko evi vanendeka vanu ava kuli yove. Vyuma vyoshe vanendeka vinapu vyavivwa.

²⁹ Nga vakala na mbunge yangacije simbu yoshe yakunjizivila lyova nakunyunga mashiko ange, nga vakakala mwamuvwa myaka yoshe na vatekulwila vavo.

³⁰ Ya ukavaleke veluke ku vimbalaka vyavo.

³¹ Oloni yove Mosesa, kala nange kuno ngeci njikwane mashiko ange oshe nakushika kwange kwoshe, co vilongese ku vanu ngeci vakavyononoke mu lifuti lije linjikavana ngeci valishwane.’

³² “Ngecivene, nyanyameni kuvilinga ngwe omo mwanamishiki Shukulu Kalunga Njambi yeni. Kesi mukavyane kwononoka lishiko limo lyendi.

³³ Ngecivene, ononokeni vije namishiki Shukulu Kalunga Njambi yeni ngeci mukayoye mwamuvwa nakuvezika nakutumisa matangwa eni mu lifuti lije mukashwana.