Kwituluka mu Mashiko 34 - Livulu lya Shukulu Kalunga

Kutsa kwa Mosesa

¹ Mosesa watundile mu vyana vya Mowavi walamatele ku Munkinda wa Nembo, akamwa ya Munkinda wa Pisenga mu ngangela ya Yeliko. Co kuje vene Shukulu Kalunga wamumwesele lifuti lyoshe lya Ngilyande kweta na ku kunto ya nganda ya Ndani,

² wamumwesele lalo lifuti lyoshe lya Nafetali, na lifuti lya Efalime, na Manase, na lifuti lyoshe lya Yunda kweta mu kangombe ka yambi ku Lishali lya Menditelenyani.

³ Asinoni wamumwesele mutambela wa Yunda wa ku mbwela, na cana cakutunda ku Zowale nakweta ku Yeliko, ikeyo nganda ya miti ya mashakaVaLe

⁴ Asinoni Shukulu Kalunga wendekele kuli Mosesa ngwendi, “Eli likelyo lifuti lije njalikulaesele Avilahama, na Isake, na Yakomba ngwange njikalyana kuli vatekulwila veni. Co njakumwesalyo na mesho lika, oloni kuukakovelamo embwe.”

⁵ Ngecivene, Mosesa, ngamba ya Shukulu Kalunga, watsililile kuje ku lifuti lya Mowavi, ngwe vene muje mwendekele Shukulu Kalunga.

⁶ Co Shukulu Kalunga wamutsindile ku cimbongo ca Mowavi, calishungama na nganda ya Mbetepeole, oloni naumo wai wazivukile mbumbo yendi kweta ku litangwa lya lelo.

⁷ Mosesa wakele na myaka 120 omo watsile, oloni anga wakele na nzili mu muvila wendi, na mesho endi lalo kuwatsitsivalele.

⁸ Co vanu va Isalele vamulilile matangwa makumi atatu mu vyana vya Mowavi.

⁹ Ngecivene, Yoshwa muna Nune washulile na mana a Munzinzime wa Njambi, omwo Mosesa wamukambekele mavoko nakwinga mu mwela wendi. Co vanu va Isalele vononokele Yoshwa nakunyunga mashiko aje aanene Shukulu Kalunga kuli Mosesa.

¹⁰ Co tunde aje kukwakele lalo muka-kwimanena weka mu Isalele wakulifwa ngwe Mosesa wai, omwo Shukulu Kalunga wendekele kuli ikeye mesho na mesho.

¹¹ Kukwakele muka-kwimanena weka lalo walingile vizivukiso na vikomokeso vyakulifwa na vije vyatumine Shukulu Kalunga kuli Mosesa ngeci avilinge ku mesho a mwene wa Ingito, na vamyata vendi, na mu lifuti lyendi lyoshe.

¹² Co kukwakele lalo muka-kwimanena wasele kulinga vyuma vyakama vyakukomokesa ngwe vije vyalingile Mosesa ku mesho a Isalele yoshe.