Kwituluka mu Mashiko 33 - Livulu lya Shukulu Kalunga

Mosesa avezikisa miyati ya Isalele

¹ Evi vikevyo vivezikiso vije Mosesa, munu wa Njambi, wavezikisile navyo vanu va Isalele omo kanda atse.

² Wendekele ngwendi, “Shukulu Kalunga watundile a Munkinda wa Sinai, watuukile na vumpau vwendi, ngwe litangwa akamwa ya Endome, watwililile ceke ali vanu vendi oku ali a Munkinda wa Palane. Co wakele amo na tungelo 1,000, tuhya twashukumine mu livoko lyendi lya cilyo.

³ Shukulu Kalunga wazema vanu vendi, nakunyunga vaje vanapu vendi. Ngeci tukatsikama ku mendi endi nakulemesa, co tukononoka mashiko endi.

⁴ Tukononoka Mashiko aje atushikile Mosesa, akewo anapu vushwana vwa muyati wa Yakomba.

⁵ Shukulu Kalunga wapwile mwene mu Isalele, omo miyati yavo na vantwama vavo valikungulwile voshe amolika.”

⁶ Co Mosesa wendekele ku muyati wa Luvena ngwendi, “Vanu va Luvena vayoye, kesi vahwe kutsa embwe, nameme vanu vendi vanapu vavandondo lika.”

⁷ A muyati wa Yunda Mosesa wendekele ngwendi, “Tolilila yove Shukulu Kalunga, kukulila kwavo uvakwase. Vakumbasane na miyati ikwavo. Valwile na nzili yove, yove Shukulu Kalunga, uvakwase ku vitozi vavo.”

⁸ A muyati wa Levi Mosesa wendekele ngwendi, “Yove Shukulu Kalunga, sholola cizango cove, a Ulime na Tumime muli vangamba vove va kulongwa, vanu va Levi. Vaje vawesekele ku Masa, walizungile navo ku mema a ku Meliva.

⁹ Vakevo vasholwele kasingimiko kakama kuli yove, kutuvakana ku visemi vavo, nambe ku vandolome vavo, nambe ku vana vavo. Vononokele mashiko ove, vapwile va kulongwa ku cikumiiyo cove.

¹⁰ Vakevo vakalongesa vanu vove, kwononoka mashiko ove, vakakombelela vin̄ombelo a mutula wove.

¹¹ Yove Shukulu Kalunga, kwasa muyati wavo ukole na nzili, vwaelela nevi vivalinga. Tsena vitozi vavo voshe. Ngeci kesi vavakatukile lalo.”

¹² A muyati wa Mbenjemani Mosesa wendekele ngwendi, “Ou ukewo muyati wazema Shukulu Kalunga nakuunyunga. Ikeye akavanyungu a litangwa na litangwa, akakala akati kavo.”

¹³ A muyati wa Yosefa Mosesa wendekele ngwendi, “Shukulu Kalunga avezikise lifuti lyavo, avezikise lifuti lyavo na nyonzi, na mema a tuvwelu-vwelu akutuuka mu livu.

¹⁴ Lifuti lyavo lipwe lyakuvezika, na vushuka vwakuhya na litanya, na vushuka vwavuvwa vwa a mwaka na mwaka.

¹⁵ Minkinda yavo ya ku san̄ulu ikapwe yakuvezika, na malundu avo a ku myaka yoshe akaime vushuka vwavuvwa vwakuwafwika.

¹⁶ Lifuti lyavo likashule na vyuma vyoshe vije vyavivwa, na vivezikiso vyavivwa vya Shukulu Kalunga uje wendekele mu liputa lyakushukuma, Vivezikiso viije ku muyati wa Yosefa, omwo wapwile ntwama akati ka vandolome vendi.

¹⁷ Yosefa wakala na nzili ngwe mpakasha wa nkomba wakulivanga kusemuka, nzili yendi yafwile ngwe vimbinga vya ngombe. Nzili yendi inapu ngwe vanu va Manase 1,000 na nzili ya vanu va Efalime 10,000. Ikeyo yafwile ngwe nzili ya mpakasha ativa miyati ya vanu, nakuvanakwila ku shongo ya kaye.”

¹⁸ A miyati ya Zembuloni na Isakale Mosesa wendekele ngwendi, “Vanu va Zembuloni vakafuke nakulandesa vyavo mu mato aa mema a kalunga, vufuko vwa vanu va Isakale vupwe vwavungi mu membo avo.

¹⁹ Vakalanya vaka-kwija ku munkinda wavo, nakukombelela vin̄ombelo vya vushunga. Vufuko vwavo vukatunda ku mema a kalunga, na ku lishen̄avu lya ku cikuma.”

²⁰ A muyati wa Ngande Mosesa wendekele ngwendi, “Shangazaleni Njambi, uje waamesele lifuti lyavo. Ngande avandamena ngwe ndumba, asanyola livoko nambe cikola.

²¹ Valyangwilile vakevo vavenya lifuti lyalivwa manene, vavaanene litambelo lya vuntwama. Vononokele vilongesa vya Shukulu Kalunga na mashiko endi, omo vakungulwile vantwama va Isalele amolika.”

²² A muyati wa Ndani Mosesa wendekele ngwendi, “Ndani wapwa muna ndumba wa nkomba, ikeye ajomboka kutunda ku Mbashane.”

²³ A muyati wa Nafetali Mosesa wendekele ngwendi, “Yove Nafetali washula na ngozi ya Shukulu Kalunga, washula na vivezikiso vyendi. Ikeye akashwana lifuti lya ku mbwela nakweta ku Lishali lya Ngalileya.”

²⁴ A muyati wa Ashele Mosesa wendekele ngwendi, “Ashele apwe wakuvezika kutuvakana miyati ikwavo. Apwe uje ivashaka manene akati ka vandolome vendi. Lifuti lyendi lipwe lya vufuko na miti yaingi ya olive.

²⁵ Vinganda vyendi vipwe vya vikolo vyakupata na vikuvo, simbu yoshe ayoye mwamuvwa.”

²⁶ “Yeni vanu va Isalele, kukwesi njambi wakulifwa na Njambi yeni, uje endekela mwilu nakumikwasa, uje enda mu vukama vwendi a mashelwa.

²⁷ Njambi simbu yoshe wapwa cimpaka ceni, simbu yoshe mavoko endi kuwesi kujuka kumivungutiya. Ikeye washekele vitozi veni kulutwe lweni, co wamilekele ngeci muvanyongese voshe njwa.

²⁸ Ngecivene, vatekulwila va Yakomba vayoye mu kwoloka, vakale mwamuvwa mu lifuti lya vimbuto na vinyu, muje lime lya kwilu likajulisa asi.

²⁹ Wavezika yove Isalele! Kukwesi umo wakufwa ngwe yove wai, muyati wanamena Shukulu Kalunga. Shukulu Kalunga vavenya wapwa ntelo yeni, na mukwale weni, mukumyamena nakumihyanesa. Vitozi veni vakaija nakumilomba ngeci muvazivileko mema ku mbunge, oloni yeni mukavalyatangela.”