Kwituluka mu Mashiko 32 - Livulu lya Shukulu Kalunga

¹ “Eni melu, tolilileni majwi ange, asi, zivilila mwamuvwa evi njendeka.

² Vilongesa vyange vipwe ngwe mambase a nyonzi ije indwekela asi ngwe mume. Majwi ange akapwe ngwe nyonzi ije isukwila a vimbuto vya njovolwezi, ngwe kusukula kwa nyonzi ilinakunyokela a mwila wauvwa.

³ Njikashangazala lizina lya Shukulu Kalunga, co vanu vendi vakambulula vukama vwendi.

⁴ “Shukulu Kalunga ikeye cimpaka ceni ca nzili wakulambasa na kwoloka mu vingila vyendi vyoshe. Njambi yeni wapwa wa kulongwa na vushunga, akalingi mwamuvwa nakushungama.

⁵ Oloni yeni mwalingile mwamuvi kuli ikeye, co kumwapandele kupwa mu vanu vendi embwe, muyati wauvi wa makuli.

⁶ Kuma eyi ikeyo ngila imukapangesa nayo kuli Shukulu Kalunga ndi? Eni vikolokomba vakujeneka mana! Ikeye ishweni, uje wamitangele, ikeye wamipwisile muyati.

⁷ “Yongoleni a matangwa a kunima, ihuleni vaishweni vamileke vije vyalingiwile, ihuleni vakukulwila veni vamileke vije vyalingiwile laja.

⁸ Omo Njambi wa Akamwa ya Vyoshe waanene miyati mafuti avo, waangunwine vanu, watavwilile vanu vinginga, ngwe ku vungi vwa vanu va Isalele.

⁹ Oloni ikeye walyangwilile vatekulwila va Yakomba, wavaangwile kupwa vushwana vwendi.

¹⁰ “Ikeye wavawanene vendangana mukati ka mambo, mu mambo, mwakuhuwa lihunzi, mwakujeneka mema. Ikeye wavanyungile nakuvalela, ngwe munu mwakanyungu lisho lyendi.

¹¹ Ngwe ngonga alongesa vana vendi kupulula, avatundisa mu lishwa, co avakavwila a mambava endi, ngeci kesi vawe, Shukulu Kalunga wanyungile Isalele ngeci kesi vawe.

¹² Shukulu Kalunga ikeye lika watwamenenene vanu vendi, kukwakele njambi weka wamukwasele.

¹³ “Ikeye wavatavesele kushwana mafuti a malundu, valile vije vyamenene mu mahya. Vawanene vuki mukati ka mamanya, miti yavo ya olive yakolele mwamuvwa mu livu lya mamanya.

¹⁴ Vingombe na vimembe vavo vakele na mavele amangi, co vakele na vana va vimanga, na majamba a vimanga vakununa, na matanga amavwa a vingombe, na vimembe va ku Mbashane, na tiliku yaivwa, na vinyu vyakutovala manene.

¹⁵ “Vanu va Shukulu Kalunga, vafukile, valile manene nakukuta, oloni vevalele Njambi Ishamatanga wavo, vavyanene muyoyesi wavo muka-nzili.

¹⁶ Vashangumwine lifuwa lya Shukulu Kalunga akulemesa tumponya, co vamuluvalesele na vilinga vyavo vya vunyengwe.

¹⁷ Vakombelelele ku vinjambi vaje kesi va vushunga, vinjambi vaje kuvazivukile vakukulwila vavo, vinjambi vavaha vaje vaIsalele kuvavononokele akulivanga.

¹⁸ Co vevalele Njambi yavo, muyoyesi wavo ikeye muka-nzili, uje wavanene mwonyo.

¹⁹ “Omo Shukulu Kalunga wamwene evi, co waluvalele, omwo vana vendi va vanalume na ava va vanakazi vamushangumwine.

²⁰ Co wendekele ngwendi, ‘Kunjikavakwasa lalo embwe, ngeci njikamone vije vikalingiwa kuli vakevo, vanu vakukaluwa vimbunge, vanu vakujeneka kulongwa.

²¹ Vananjiluvalesa na tumponya twavo, nakunjilingisa lifuwa na vinjambi vavo va makuli, vinjambi vaje kesi vinjambi va vushunga embwe. Ngecivene, njikashangumwina vaIsalele muyati wa vanu veka ngeci vavaluvalese, co njikavashangumwina lifuwa na muyati wa vulema.

²² Vukalu vwange vukashukuma ngwe tuhya, vukenyeka vyuma vyoshe vya ano asi. Co vuketa na mu vukalo vwa vatsi, nakunyongesa luvula lwa minkinda.

²³ “ ‘Co njikanena tuyando twakujeneka kuhwa ali vakevo, co njikapangesa vukalu vwange vwoshe ali vakevo.

²⁴ Co vakalanduka ku njala na ku lilanga, mishongo yakukomokesa ikavalya. Njikatuma vikashama va mu shwata nakuvatsiya, na manyoka va vushungu vwavuvi vakavashuma.

²⁵ Vanu vakatsa mu vitapalo ku moko ya mukwale, na munjunju ukakala mu membo. Vakwenje na vambanda vakatsa, co vimbututu na tukulukazi vakatsa.

²⁶ Njayongwele kuvanyongesa voshe njwa, ngeci kesi kukakale umo lalo akavanuke.

²⁷ Oloni kunjikecela vitozi vavo valishashe ngeci vanafungulula vanu vange, omwo yange vavenya njavatsene.’ ”

²⁸ “Isalele wapwa muyati wakujeneka mana, kuvesi na mana omwo kuvesi kuzivisisa.

²⁹ Nga vakele na mana ngwe vazivukile vije vyalingiwile, oloni kuvayongwele kuhwa kwavo.

³⁰ Omwo vikajo vanu 1,000 vafungulukile kuli munu umo? Na vanu 10,000 vafungulukile kuli vanu vavali lika? Omwo Shukulu Kalunga Njambi yavo wavakengesele nima, omwo Njambi yavo muka-nzili wavakundikile mu mavoko avo.

³¹ Vitozi vavo vazivukile ngeci vinjambi vavo vapwa vakuzeya, kuvesi na nzili ngwe Njambi ya Isalele.

³² Vitozi vavo vapwa vavavi manene ngwe Sondoma na Ngomola, vapwa ngwe mikolovozi ya vushuka vwa vinyu ije ikemi vushuka vwakulula, na makasha-kasha avwo apwa akulula,

³³ Vapwa ngwe vinyu vyakulula ngwe vushungu, vwa mambwambwa.

³⁴ “Shukulu Kalunga alinakwanuka vije vivalingile vitozi vavo. Ikeye navandamena simbu yakuvahisa.

³⁵ Shukulu Kalunga akavalinga shambandinga nakuvahisa, simbu iketa omo vakawa, litangwa lya tuyando twavo lili muyehi.

³⁶ Shukulu Kalunga akapatula vanu vendi, omo akamona ngeci nzili yavo inahu. Ikeye akakala na mema ku mbunge ali vaje vamupangela, omo akavamona ngeci vanazeye.

³⁷ Asinoni Shukulu Kalunga akehula vanu vendi ngwendi, ‘Vali kulijo vaje vinjambi va nzili vamwakulaelele?

³⁸ Mwavalisile na mazi a vije mwakombelelele, co mwavanene vinyu vyakunwa. Vaije oni nakumikwasa! Vaije oni nakumipatula!

³⁹ “ ‘Yange, yange lika, njapwa Njambi, kukwesi njambi weka lalo wa vushunga wai. Njikatsii, co njana mwonyo, njikavetwesa, co njikangwisa, naumo wai asa kupopolola vije vinjinalingi.

⁴⁰ Mwa vushunga yange njapwa Njambi wakuyoya simbu yoshe, njikajundula livoko lyange nakulisinga,

⁴¹ ngeci njikotola mukwale wange wakuvyazima, njikamona ngeci vushunga vunalingiwa. Njikalinga shambandinga kuli vitozi vange, nakuhisa vaje vanjizinda.

⁴² Mikili yange ikandweka na maninga avo, co mukwale wange ukatsiya voshe vaje vaka-kunjipopolola. Naumo wai injikayoyesa akati ka vaje vaka-kunjilwisa, nameme vishwalonda na vinzinda vakatsa.’

⁴³ “Yeni miyati munapande kushangazala vanu va Shukulu Kalunga. Ikeye akahisa voshe vaje vakatsiya vanu vendi, omwo ikeye akalinga shambandinga ali vitozi vendi, nakwamena vuvi vwa vanu vendi.”

⁴⁴ Co Mosesa na Yoshwa muna Nune vatambekelele majwi oshe a mwaso ou, ngeci vanu va Isalele vazive mwamuvwa.

Vilongesa vya Mosesa vyakumanesela

⁴⁵ Omo Mosesa wamanesele kuleka vanu vilongesa vyoshe vya Njambi,

⁴⁶ co wendekele kuli vakevo ngwendi, “Mwa vushunga ononokeni mashiko oshe awa njinamilekawo ku litangwa lya lelo. Alongeseni vana veni, ngeci vakononoke na kulongwa vilongesa vyoshe vya Njambi.

⁴⁷ Vilongesa evi kesi majwi angoco aje kuwesi na seo embwe. Vikevyo vene vinapu kuyoya kweni. Vyononokeni, co mukayoya simbu yakama mu lifuti lije lili musambwa ya Ndonga ya Yondau, lije muli kuyehi nakulishwana.”

⁴⁸ A litangwa lije vene Shukulu Kalunga wendekele kuli Mosesa ngwendi,

⁴⁹ “Lamata a Munkinda wa Nembo uje uli mukati ka Minkinda ya Avalime mu lifuti lya Mowavi, walishungama na Yeliko. Co ukenge lifuti lya Kanana lije linjana kuli vanu va Isalele nakulishwana.

⁵⁰ Ukatsila a munkinda uje vene, ngwe ndolome yove Alone watsililile a Munkinda wa Hole,

⁵¹ omwo muvuvali vweni kumwanjikulaelele nakunjisingimika ku mesho a vanu va Isalele, omo mwakele ku mema a ku Meliva, kuyehi na nganda ya Kandeshe mu mambo ya Zine, kumwasingimikile kujela kwange ku mesho a vanu.

⁵² Lifuti lije ulimwena kulyala, oloni kuukakovela mu lifuti lije njilinakulyana kuli vanu va Isalele.”