Kwituluka mu Mashiko 31 - Livulu lya Shukulu Kalunga

Yoshwa ashwana Mosesa

¹ Mosesa watwaleleo kwendeka kuli vanu va Isalele voshe

² ngwendi, “Yange njakolo laja, njili na myaka 120. Kunjasa kupwa lalo ntwama yeni. Co lalo Shukulu Kalunga nendeka kuli yange ngwendi, ‘Yove kuukayi musambwa ya Ndonga ya Yondau embwe.’

³ Shukulu Kalunga Njambi yeni ikeye vavenya akamitwamenena nakunyongesa miyati ije ilinakukala muje, ngeci mukafungulule lifuti lyavo. Yoshwa akapwa ntwama yeni, ngwe mwanendeka Shukulu Kalunga.

⁴ Shukulu Kalunga ikeye akanyongesa vanu ava, ngwe mwafungulwile vimyene va vaAmoli, Sihone, na Onge, amo na lifuti lyavo.

⁵ Shukulu Kalunga akamyana nzili yakuvafungulula, co mukavapangesa ngwe munjamishikile.

⁶ Koleseni nakusimpa. Kesi mukavazivile lyova nambe kulijujukila embwe, omwo Shukulu Kalunga Njambi yeni akakala amo neni. Ikeye kakonwa nambe kumiseza eni lika embwe.”

⁷ Asinoni Mosesa wasanene Yoshwa wendekele kuli ikeye ku mesho a vanu va Isalele voshe ngwendi, “Kolesa nakusimpa. Omwo yove ukatwamenena vanu ava kushwana lifuti lije walisingile Shukulu Kalunga na vakukulwila vavo.

⁸ Shukulu Kalunga vavenya akamitwamenena, co akakala amo neni. Ikeye kakonwa nambe kumiseza. Ngecivene, kesi mukazive lyova nambe kujujuka.”

Kulava mashiko

⁹ Ngecivene, Mosesa wasonekele mashiko a Njambi nakuwaana kuli vaLevi vaka-kukombelela, vaje vakele na moko yakwambata Cikasa ca Cikumiiyo ca Shukulu Kalunga, na kuli vakulunu voshe va Isalele.

¹⁰ Co Mosesa wavalekele ngwendi, “Kukuhwa kwa mwaka na mwaka wamucitanu na ivali, a mwaka wakwecela makongo, mukalava mashiko awa a Ciwano ca Mapapela.

¹¹ Mukawalavela vanu va Isalele omo vakaija nakulemesa Shukulu Kalunga Njambi yavo ku mwela umo wakumulemesela.

¹² Kungulula vanu voshe, vanalume, na vanakazi, na vanike, amo na vaka-kwija vaje vakala mu vinganda vyeni, ngeci vatolilile nakulilongesa kusingimika Shukulu Kalunga Njambi yeni nakwononoka mwamuvwa vilongesa vyendi.

¹³ Mu ngila eyi vatekulwila veni vaje kanda vazive Mashiko a Shukulu Kalunga Njambi yeni ngeci vakawazive. Co vakalilongesa nakwononoka Shukulu Kalunga Njambi yeni, myaka yeni yoshe ije mukakala mu lifuti lije limukashwana lili musambwa ya Ndonga ya Yondau.”

Vilongesa vya Shukulu Kalunga vyakumanesela kuli Mosesa

¹⁴ Asinoni Shukulu Kalunga wendekele kuli Mosesa ngwendi, “Kenga, kuwesi na matangwa amangi akuyoya. Sana Yoshwa umunene ku Mbalaka Mwakuliwanena, ngeci njimushike vyakalinga.” Co Mosesa na Yoshwa vaile ku Mbalaka Mwakuliwanena.

¹⁵ Shukulu Kalunga walisholwele kuli vakevo mu manda ya lishelwa lije lyemanene a cikolo ca Mbalaka Mwakuliwanena.

¹⁶ Co Shukulu Kalunga wendekele kuli Mosesa ngwendi, “Ololo ukatsa, co omo unatsi laja, vanu vakajeneka kunjononoka, co vakapokola cikumiiyo cije njalikumiiye navo. Vakanjiseza nakulemesa vinjambi va mu lifuti lije livakakovela.

¹⁷ Omo evi vinalingiwa, co njikaluvala navo manene nakuvaseza, co vakavanyongesa. Tuyando twakama tukavawana, asinoni vakananguka vyuma evi vikalingiwa, co vakazivuka ngwavo, Njambi waiho akati kavo, ngeci tuyando otu tunete ali vakevo.

¹⁸ Oloni kunjikavakwasa, omwo vanalingi vuvi akulemesa vinjambi veka.

¹⁹ “Ngecivene, soneka ou mwaso. Ulongese vanu va Isalele, ngeci ukale mu vimbunge vyavo, upwe vukaleo vwange kuli vakevo.

²⁰ Njikavatwala mu lifuti lije lyalivwa lya vwilo nevi vyakujenekamo vyai muje njalisingile na vakukulwila vavo. Muje vakakala na vyakulya vyoshe vivakashaka, co vakakala mwamuvwa. Oloni vakanjikengesa nima nakulemesa vinjambi veka. Co vakanjivyana nakupokola cikumiiyo cange.

²¹ Co tuyando twatungi twakukomokesa tukakala ali vakevo, oloni mwaso ou uvakaimba ukapwa vukaleo vwange kuli vakevo, omwo mwaso ou ukakala mu vimbunge vya vatekulwila vavo. Nameme kanda njivatwale mu lifuti lije njalisingile kuvanalyo, njazivuka vivalinakuyongola.”

²² A litangwa lije vene Mosesa wasonekele uje mwaso, co waulongesele kuli vanu va Isalele.

²³ Asinoni Shukulu Kalunga wendekele kuli Yoshwa muna Nune ngwendi, “Kolesa nakusimpa. Yove ukatwamenena vanu va Isalele mu lifuti lije njalisingile kuvanalyo, njikakala amo neni.”

²⁴ Co Mosesa wasonekele majwi oshe a mashiko a Njambi mu livulu, kasezeleko cuma nacimo cai.

²⁵ Omo Mosesa wamanesele, co walekele vaLevi vaka-kukombelela, vaje vakele na moko yakwambata Cikasa ca Cikumiiyo ca Shukulu Kalunga ngwendi,

²⁶ “Ambateni livulu eli lya mashiko a Njambi, co lyakeni kumukulo wa Cikasa ca Cikumiiyo ca Shukulu Kalunga Njambi yeni, ngeci likale kuje kupwa vukaleo ali vanu vendi.

²⁷ Njazivuka kutengulukila kweni nakukaluwa kwa vimbunge vyeni. Mwatengulukilile Shukulu Kalunga a simbu yakuyoya kwange, co omo njikatsa mukahyana kumutengulukila.

²⁸ Co kungululeni vakulunu va miyati yeni yoshe na vamyata veni, ngeci njivaleke vyuma evi, omwo njilisinga ngeci lilu na asi vinapu vukaleo vwange ali yeni.

²⁹ Njazivuka ngeci omo njinatsi laja, mukongumuka nakuseza evi vinjinamilongesa. Cooni kulutwe mukakovela mu vukalu, mukaluvalesa Shukulu Kalunga akulinga vije vyanavindika.”

Mwaso wa Mosesa

³⁰ Asinoni Mosesa watambekelele majwi a mwaso ou oshe, co vanu vaIsalele voshe vatolililile.