Kwituluka mu Mashiko 3 - Livulu lya Shukulu Kalunga

VaIsalele vafungulula Mwene Onge wa ku Mbashane

¹ “Asinoni twaile ku kunto mu ngila yakuya ku Mbashane, co Mwene Onge wezile na vanu vendi voshe nakulwa netu kuyehi na nganda ya Endelei.

² Oloni Shukulu Kalunga wendekele kuli yange ngwendi, ‘Kesi umuzivile lyova embwe, omwo njinamukundika mu mavoko eni, ikeye na vanu vendi voshe, na lifuti lyendi lyoshe. Co lingeni kuli ikeye ngwe muje mumwalingile kuli Sihone mwene wa vaAmoli uje washwanene mu Heshevone.’

³ “Ngecivene, Shukulu Kalunga Njambi yetu wakundikile lalo Mwene Onge na vanu vendi voshe mu mavoko etu, co twavatsiile voshe, naumo wai wasaleleo.

⁴ Co a simbu ije vene twafungulwile vinganda vyendi vyoshe, naimo yai yasaleleko. Ngecivene, vinganda vyoshe vitwafungulwile vyapwile makumi atanu na limo, amo na lifuti lyoshe lya Alengove, kuje kwashwanene Mwene Onge wa ku Mbashane.

⁵ Vinganda vyoshe evi vyakele na vimpaka vya vivumbe vyavilaja, na vikolo, na tupateso twakupatesa ku vikolo. Co kuje lalo kwakele membo amangi a vivumbe.

⁶ Co twanyongesele vinganda vyoshe nakutsiya vanalume voshe, na vanakazi voshe, amo na vanike voshe, ngwe muje mutwalingile na vinganda vije vyapwile vya Mwene Sihone wa ku Heshevone.

⁷ Oloni twambatele vimuna voshe na vije vitwapukwile mu vinganda.

⁸ “A simbu ije vene twafungulwile lifuti lya vaje vimyene vavali va vaAmoli vaje vakele mu ngangela musambwa ya Ndonga ya Yondau, kutunda ku Ndonga ya Alenone nakweta ku Munkinda wa Helemone.

⁹ (Munkinda wa Helemone vaSindonya vautumbwile ngwavo Silyone, co vaAmoli vautumbwile ngwavo Senile.)

¹⁰ Co twatambwile lifuti lyoshe lya Mwene Onge wa ku Mbashane, na vinganda vyoshe vije vyakele mu cana, mu lifuti lya Ngilyande na Mbashane, nakweta mu ngangela ku vinganda vya ku Saleka na Endelei.”

¹¹ (Kuvanga lika Mwene Onge ikeye wasaleleo kuli vaLefaime. Cikasa cakwaka muvila wendi capwile ca vutale, mu vulaja capwile mamita awana, na mu vwihi capwile mamita avali, ngwe ku seteko ije vemika. Co na ololo twasa kuciwana mu nganda ya vaAmoli mu Lamba.)

Miyati ya vanu vaje vakele mu ngangela musambwa ya Ndonga ya Yondau

¹² “Omo twatambwile lifuti, co njanene miyati ya Luvena, na ya Ngande lifuti lije lyakele ku kunto ya nganda ya Aloele kuyehi na Ndonga ya Alenone amo na mutambela wa malundu wa Ngilyande, amolika na vinganda vyakwo.

¹³ Co ku litambelo lya muyati wa Manase njavanene lifuti lyoshe lya Mbashane, lije lyashwanene Mwene Onge, na lifuti lyoshe lya Alengove.” (Co lifuti lya Mbashane valitumbwile ngwavo lifuti lya vaLefaime.

¹⁴ Njaile mutekulwila wa Manase, ikeye wafungulwile lifuti lyoshe lya Alengove. Eli likelyo lyapwile lifuti lya Mbashane, nakweta ku nginga ya Ngeshule na Maka. Co ikeye walukile membo aje lizina lyendi vavenya, co na lelo lino vacili nakuwatumbula ngwavo membo a Njaile.)

¹⁵ “Co njanene Ngilyande ku cikota ca Makile wa ku muyati wa Manase.

¹⁶ Co miyati ya Luvena na Ngande njavanene lifuti lyakutunda ku Ngilyande nakweta ku Ndonga ya Alenone. Nginga yakele mukati ka ndonga ku mbwela, na nginga ikwavo ya ku kunto yapwile Ndonga ya Njavoke, ikeyo nginga ya vaAmoni.

¹⁷ Co mu kangombe ka yambi lifuti lyavo lyetele na ku Ndonga ya Yondau, kushangumuka ku kunto ya Lishali lya Ngalileya nakweta mu mbwela ya Lishali lya Mwongwa nakweta mwisi ya Munkinda wa Pisenga mu ngangela.

¹⁸ “Co a simbu ije vene, njavanene mashiko awa ngwange, ‘Shukulu Kalunga Njambi yetu namyana lifuti eli lya mu ngangela ku Ndonga ya Yondau ngeci lipwe lyeni. Ololo vanalume voshe vaje vasa kuya ku nzita vajavuke Ndonga ya Yondau, vaye kulutwe ku miyati ya vavushoko vweni vaIsalele, mukavakwase kutambula lifuti lyavo ngeci vakakalemo.

¹⁹ Kuvanga vanakazi veni lika, na vanike, na vimuna veni, vakevo vakasala mu vinganda vije njamyanene. Njazivuka ngwange muli na vimuna vavangi.

²⁰ Kwaseni vavushoko vweni vaIsalele noo vanatambula lifuti lije lyakavana Shukulu Kalunga lije lili mu kangombe ka yambi ka Yondau, noo Shukulu Kalunga navatavesa kukala muje mu kwoloka ngwe mwanamilingila laja yeni kuno. Munima yevi, co mukeluka ku lifuti eli linjinamyana.’

²¹ “Asinoni njalekele Yoshwa ngwange, ‘Walimwena vyoshe vije vyanalingile Shukulu Kalunga Njambi yeni kuli vimyene vaje vavali, Sihone, na Onge. Mukemwo mwakalinga Shukulu Kalunga ku vimyene voshe omo mukakovela mu mafuti avo.

²² Kesi uvazivile lyova embwe, omwo Shukulu Kalunga Njambi yove ikeye akamilwilako.’

Shukulu Kalunga katavesele Mosesa kukovela mu Kanana

²³ “A simbu ije njalombelele kuli Shukulu Kalunga ngwange,

²⁴ ‘Yove Shukulu Kalunga wa Akamwa ya Vyoshe, njazivuka ngwange yove wanjisholwela lika vushangumukilo vwa nzili na vyuma vyakukomokesa vije viwukalinga. Co kukwesi njambi weka lalo mwilu nambe ano asi uje asa kulinga vyuma vya nzili ngwe viwukalingi!

²⁵ Shukulu Kalunga njitave njijavuke Ndonga ya Yondau, ngeci njikamone lifuti lije lyalivwa lya malundu na Minkinda ya Lembanone.’

²⁶ “Oloni omwo ali yeni, Shukulu Kalunga waluvalele nange, co kanjitolililile. Oloni wendekele ngwendi, ‘Kuli yove kunahu njapwisamo! Kesi ukelukilemo lalo kulomba ngacije!

²⁷ Lamata akamwa ya Munkinda wa Pisenga, kenga mesho ove ku mutambela wa kangombe ka yambi, na ku kunto na mu mbwela, na mu ngangela. Co kenga mwamuvwa vije viwunamono omwo yove kuukajavuka nakuya musambwa ya Ndonga ya Yondau.

²⁸ Oloni shika Yoshwa, mukolese nakumusimpisa, omwo ikeye akatwamenena vanu ava nakuvajavwisa musambwa nakushwana lifuti lije liwunamono.’

²⁹ “Ngecivene, twatumbamene mu cana cakushungama na nganda ya Mbetepeole.”