Kwituluka mu Mashiko 29 - Livulu lya Shukulu Kalunga

Cikumiiyo ca Shukulu Kalunga na vaIsalele mu lifuti lya Mowavi

¹ Awa akewo majwi a cikumiiyo cije cashikile Shukulu Kalunga Mosesa kulinga na vana va Isalele mu lifuti lya Mowavi, mukuwezelela ku cikumiiyo cije calikumiiye Shukulu Kalunga na vakevo a Munkinda wa Sinai.

² Co Mosesa wasanene vanu va Isalele voshe, wendekele kuli vakevo ngwendi, “Munalimwena yeni vavenya vije vyalingile Shukulu Kalunga kuli mwene wa ku Ingito, na kuli vamyata vendi, na ku lifuti lyendi lyoshe.

³ Mwamwene tuyando twakama, na vizivukiso, na vikomokeso vyakama vije vyalingile Shukulu Kalunga.

⁴ Oloni kweta ku litangwa lya lelo, Shukulu Kalunga kamyanene mbunge yakuzivuka, nambe mesho akumona, nambe matwi akuziva.

⁵ A myaka makumi awana Shukulu Kalunga wamitwamenenene mukati ka mambo. Vuzalo vweni kuvwatavozokele, na vin̄aku vyeni kuvyatsile.

⁶ Kumwalile makende nambe kunwa vinyu, nambe vinyu vyakulula, oloni Shukulu Kalunga wamyanene vyoshe vimwajenekele mukumilongesa ngeci ikeye wapwa Shukulu Kalunga Njambi yeni.

⁷ Co omo yetu twetele ku mwela umo, Mwene Sihone wa ku Heshevone, na Mwene Onge wa ku Mbashane vezile nakutulwisa, oloni twavafungulwile.

⁸ Twatambwile lifuti lyavo, co twalyanene kuli Luvena, na Ngande, na litambelo lya muyati wa Manase kupwa vushwana vwavo.

⁹ Ngecivene, nyanyameni nakwononoka majwi a cikumiiyo eci, ngeci mukavezike mu vyuma vyoshe vimukalinga.

¹⁰ “Litangwa lya lelo muvavoshe munemana ku mesho a Shukulu Kalunga Njambi yeni, vanalume voshe va Isalele, na vantwama, na vamyata, na vakulunu veni,

¹¹ na vanakazi veni, na vana veni, na vaka-kwija vaje vali akati keni, vaje valinakumicavela vitale na vaje valinakumitekwila mema.

¹² Munemana kuno ku litangwa lya lelo mukulikumiiya cikumiiyo na Shukulu Kalunga Njambi yeni, cikumiiyo cije cakusatesa na cisingo,

¹³ ngeci Shukulu Kalunga amikolese mukupwa vanu vendi, co apwe Njambi yeni, ngwe mwamikulaesele nakulisinga na vakukulwila veni, Avilahama, na Isake, na Yakomba.

¹⁴ Shukulu Kalunga kesi nakulikumiiya cikumiiyo eci neni lika embwe,

¹⁵ oloni alinakulikumiiya amo netu voshe tunemana kuno ku mesho endi ku litangwa lya lelo, amo na vatekulwila vetu vaje kanda vasemuke.

¹⁶ “Anukeni kuyoya kwetu mu Ingito kwafwile vati na vyeseko vya ngila yetu omo twetile nakutuvakana miyati yeka mu mafuti avo.

¹⁷ Mwamwene vyuma vyavo vya vunyengwe, vinjambi vakushonga va viti, na mamanya, na siliva, na ngolinde.

¹⁸ Mwa vushunga vene kesi kukakale munalume, nambe munakazi, nambe naanga, nambe muyati akati keni munemana kuno ku litangwa lya lelo akatenguluka nakutunda kuli Shukulu Kalunga Njambi yetu nakulemesa vinjambi va miyati ije embwe. Cuma eci cinalifu ngwe muzi ulinakukula kupwa muti wakulula na vushungu vwa kutsa.

¹⁹ Ngecivene, kesi kukakale munu umo uje nemana kuno ku litangwa lya lelo uje alinakuziva cikumiiyo eci cakusatesa na cisingo, uje ayongola ngwendi vyoshe vikenda mwamuvwa kuli ikeye, nameme akakateya nakukaluwisa mbunge yendi nakuya mu ngila yendi vavenya. Eci cikaminyongesa yeni voshe, vavavwa na vavavi amolika.

²⁰ Shukulu Kalunga kakasambesa munu wa cifwa cangacije embwe, oloni vukalu vwa Shukulu Kalunga vukashukuma ali ikeye, co vukalu vwoshe vuvasoneka mu livulu eli vukawila ali ikeye noo Shukulu Kalunga akamunyongesa.

²¹ Co Shukulu Kalunga akamwangununa ku mesho a miyati yoshe ya vanu va Isalele mukumuhisa, nakunena tuyando ali ikeye ngwe ku visingo vyoshe vije vivasonekele mu livulu lya mashiko.

²² “Co visemwa vyeni vya kulutwe, na vatekulwila veni, na vaka-kwija vakutunda ku mafuti a kulyala, vakamona vukalu vwa tuyando tweni tuje twakasholola Shukulu Kalunga a lifuti lyeni.

²³ Mahya akominina, akakakama na lilungu, na mwongwa, cuma nacimo cai cikamenamo, nameme mwila. Co lifuti lyeni likafwa ngwe vinganda vya Sondoma, na Ngomola, na Andema, na Zemboime, vinganda vije vyanyongesele Shukulu Kalunga omo waluvalele manene.

²⁴ Asinoni vanu voshe va mukaye vakehula ngwavo, ‘Omwo vikajo Shukulu Kalunga nalingi eci ku lifuti lyavo? Cuma mukajo camuluvalesa na vukalu vwakama ngacije?’

²⁵ Co vakakumbulula ngwavo, ‘Omwo vanu va Shukulu Kalunga kuvanyungile cikumiiyo, cije Shukulu Kalunga Njambi ya vakukulwila vavo, walikumiiye navo omo wavatundisile mu Ingito.

²⁶ Vapangelele vinjambi veka vaje kuvazivukile, vinjambi vaje vavavindikile Shukulu Kalunga kuvalemesa.

²⁷ Ngecivene, vukalu vwa Shukulu Kalunga vavushambeyeye a lifuti lyavo ngeci visingo vyoshe vivasonekele mu livulu eli vavilingile,

²⁸ co Shukulu Kalunga waluvalele manene, co wavatundisile mu lifuti lyavo, wavombilile mu lifuti lyeka, mukemwo muvacili nakweta ku litangwa lya lelo.’

²⁹ “Vyuma vya vushweke vyapwa vya Shukulu Kalunga Njambi yetu, oloni najombolola Mashiko endi, ngeci yetu na vatekulwila vetu tuwononoke nakuwanyunga ku myaka yoshe.