Kwituluka mu Mashiko 28 - Livulu lya Shukulu Kalunga

Vivezikiso vya kwononoka mashiko

¹ “Nga mwononoka Shukulu Kalunga Njambi yeni nakunyunga mashiko endi oshe awa njilinakumyanawo ku litangwa lya lelo, co Shukulu Kalunga Njambi akamipwisa muyati wakama wa nzili kutuvakana miyati yoshe ya ano asi.

² Ononokeni Shukulu Kalunga Njambi yeni ngeci vivezikiso vyoshe evi vikapwe vyeni.

³ “Shukulu Kalunga akavezikisa vinganda vyeni na mahya eni.

⁴ “Shukulu Kalunga akamivezikisa nakumyana vana vavangi, na vimbuto vyavingi, amo na vingombe na vimanga vavangi.

⁵ “Shukulu Kalunga akavezikisa vimbuto vyeni na vyakulya vikatunda ku vimbuto vije.

⁶ “Shukulu Kalunga akamivezikisa mu vyoshe vimukalinga.

⁷ “Shukulu Kalunga akafungulula vitozi veni omo vakamilwisa. Vakamilwisila ku mutambela umolika, oloni vakevo vakatewela mu mitambela yoshe.

⁸ “Shukulu Kalunga Njambi yeni akavezikisa vipangi vyeni nakushulisa vishete vyeni na vimbuto. Akamivezikisa mu lifuti lije lyakamyana.

⁹ “Nga mwononoka Shukulu Kalunga Njambi yeni nakulinga vyoshe vije vyamishika, co ikeye akamipwisa vanu vendi, ngwe mwalisingile.

¹⁰ Co vaka-mafuti oshe a ano asi vakamona ngeci Shukulu Kalunga wamyangwile kupwa vanu vendi, co vakamizivila lyova.

¹¹ Shukulu Kalunga akamyana vana vavangi, na vimuna vavangi, na vimbuto vyavingi mu lifuti lije walisingile na vakukulwila veni kumyanalyo.

¹² Co Shukulu Kalunga akanyokesa nyonzi a simbu ya ndombo, co akavezikisa vipangi vyeni vyoshe, ngecivene, mukakumwisa miyati yaingi, oloni yeni kumukakumuna ku muyati umo.

¹³ Co Shukulu Kalunga Njambi yeni akamipwisa vantwama akati ka miyati ya vanu, kumukapu vakumanesela embwe. Simbu yoshe mukalinga mwamuvwa kumukonwa nga mwononoka mashiko a Shukulu Kalunga Njambi yeni, awa njilinakumishikawo ku litangwa lya lelo, anyungeni nakuwapangesa.

¹⁴ Kesi mutunde ku mashiko awa njinamyana ku litangwa lya lelo, kumwapandele kukenga noku-noku, nambe kulemesa nakupangela vinjambi veka.

Cihiso cakujeneka kwononoka mashiko

¹⁵ “Oloni nga kumwononoka Shukulu Kalunga Njambi yeni nakunyunga mashiko endi oshe awa njinamyana ku litangwa lya lelo, visingo evi vyoshe vikalingiwa ali yeni.

¹⁶ “Shukulu Kalunga akasinga vinganda vyeni na mahya eni.

¹⁷ “Shukulu Kalunga akasinga vimbuto vyeni na vyakulya vikatunda ku vimbuto vyeni.

¹⁸ “Shukulu Kalunga akamisinga, akamyana vana vavandondo, na vimbuto vyavindondo, na vingombe vavandondo, na vana va vimanga vavandondo.

¹⁹ “Shukulu Kalunga akasinga vyoshe vimukalinga.

²⁰ “Nga mulinga vuvi nakuvyana Shukulu Kalunga, co ikeye akamitumina vukalu, nakwilasana, na tuyando, mu vyuma vyoshe vimukalinga, noo vanaminyongesa njwa.

²¹ Shukulu Kalunga akamitumina kushwakumo mishongo yakuliseza-seza noo naumo wai akasala mu lifuti lije limukashwana.

²² Shukulu Kalunga akaminyanyamesa na mishongo ya lulanga, na mishongo ya lisika-sika na mazimbo, nakwenya kwa ngungu, na malanga na lihunzi, na mbundu-mbundu mukunyongesa vimbuto vyeni. Co vyuma evi vikatwalao noo munanyongo.

²³ Nyonzi kuyikanyoko, co livu lyeni likominina ngo.

²⁴ Shukulu Kalunga akatuma tukundu-kundu na lihunzi lyakama kwinga mu mwela wa nyonzi noo munanyongo njwa.

²⁵ “Shukulu Kalunga akamyecelela vitozi veni ngeci vamifungulule. Co yeni mukavalwisila ku mutambela umo, oloni mukatewela mu mitambela mwoshe. Vanu voshe va ano asi vakalikomokela manene omo vakamona vije vikalingiwa kuli yeni.

²⁶ Mitunu yeni ikapwa vyakulya vya tuzila na tusitu, co kukwesi umo akavasheka wai.

²⁷ Shukulu Kalunga akatuma mazimbo ali yeni ngwe mwalingile kuli vaka-Ingito. Mivila yeni ikajamozoka vimbandu, na mishongo yakulijwa. Kukukakala vyemba vyai.

²⁸ Shukulu Kalunga akamitumina kuzaluka, na vupuputwa, na kwilasana.

²⁹ Mukambumbangela mutanya mwelu ngwe kapuputwa, kumukamono ngila. Kumukasa kupanga mwamuvwa mu vyuma vyoshe vimukalinga. Vakamiyandesa nakumivila, co naumo wai akamyamena.

³⁰ “Mukendekeya vambanda, oloni vakavambata kuli vanu veka. Mukatunga vinjuvo, oloni kumukakalamo. Mukakuna vitungu vya mikolovozi ya vushuka vwa vinyu, oloni kumukali vushuka vwayo.

³¹ Vingombe veni vakavatsiya oku munakengeko, oloni kumukali situ yavo. Vimulu veni vakavakokangeya nakuvatwala kulyala oku munakengeko, oloni kuvakamiilwisilavo lalo embwe. Vimanga veni vakavana kuli vitozi veni, co naumo wai akamyamena.

³² Vana veni va vanalume na ava va vanakazi vakavana ku muyati weka ngwe vindungo, co a litangwa na litangwa mukatungumuna mesho eni, nakukengelela mwangoco ngweni amo vana veni vakavelwisa.

³³ Muyati wa vaka-kwija vakalinonela vimbuto vyeni vije mwapangele nakulipesa, co nacimo cai mukawanao, oloni mukamona tuyando na mapakeso simbu yoshe.

³⁴ Tuyando tweni tukamizalwisa nakumijenekesa mana.

³⁵ Shukulu Kalunga akatuma vimbandu vyakwonwa kusaka ku mendi eni, co mazimbo akatunda ku mutwe nakweta ku vikanzi.

³⁶ “Shukulu Kalunga akamitwala, na mwene yeni uje mukaangula ku lifuti lya vungenzi, lije kumwazivukile yeni nambe vakukulwila veni. Kuje mukapangela vinjambi vakushonga va viti na mamanya.

³⁷ Ku mafuti kuje kwakamishandwela Shukulu Kalunga, vanu vakalisimoka akumona vije vyalingiwa kuli yeni, co vakamishendumuna nakumijola.

³⁸ “Co mukakuna vimbuto vyavivwa, oloni mukateja lika vyavindondo omwo vimbimba vakalya vimbuto vyeni.

³⁹ Mukakuna vitungu vya mikolovozi ya vushuka vwa vinyu, oloni kumukavukongweya nambe kunwako vinyu, omwo tungwengwe vakavulya.

⁴⁰ Miti ya olive ikakala mu lifuti lyeni lyoshe, oloni kumukakala na mazi, omwo vushuka vwakwo vwa olive vukalalumukako.

⁴¹ Mukakita vana va vanalume na ava va vanakazi, oloni kuvakapu veni, omwo vakavatwala nakuvapwisa vinzinda mu nzita.

⁴² Miti yeni na vimbuto vyeni vyoshe vakavilya vimbimba mikumbi.

⁴³ “Vaka-kwija vaje valinakukala mu lifuti lyeni vakakala na nzili manene, oloni nzili yeni ikatepuluka.

⁴⁴ Vakakala na vimbongo vyakumikumwisa, oloni yeni kumukakala navyo vyakuvakumwisa embwe. Co akukotoka vakamishwana.

⁴⁵ “Vukalu vwoshe ovu vukaija ali yeni, co vukakala ali yeni noo munaziluka njwa, omwo kumwononokele Shukulu Kalunga Njambi yeni nakunyunga mashiko endi oshe na vizilika vije vyamishikile.

⁴⁶ Vikevyo vikapwa vizivukiso vya kusompa kwa Njambi ali yeni na vatekulwila veni ku myaka yoshe.

⁴⁷ Shukulu Kalunga wamivezikisile mu vingila vyoshe, oloni kumwamupangelele nakuvwaelela na vimbunge vyakujolela.

⁴⁸ Ngecivene, mukapangela vitozi vaje vakamitumina Shukulu Kalunga. Mukakala na njala, na lihwila, na vuzu, mukajeneka vyuma vyoshe. Co Shukulu Kalunga akamiyandesa manene noo naminyongesa njwa.

⁴⁹ Shukulu Kalunga akamitumina muyati wakutunda kulyala, muyati wa vanu vaje kumuzivuka ndaka yavo. Vakevo vakumicuncumukila ngwe ngonga.

⁵⁰ Vakapwa vaka-muuka, co kuvakakala na mema ku mbunge ali tukulukazi nambe ali vanike.

⁵¹ Vakalya vimuna veni, na vimbuto vyeni, mukalanduka ku njala. Kuvakamisezelako vimbuto vimo, nambe vinyu, nambe mazi a olive, nambe vimuna, nambe vimanga, noo vanaminyongesa.

⁵² Vakalwisa nganda na nganda ije ili mu lifuti lije lyakamyana Shukulu Kalunga Njambi yeni, na vivumbe vyakukola vyavilaja, vije mwakulaela vikasiwuka.

⁵³ “Omo vitozi veni vakazengeleka vinganda vyeni, co mukajeneka vyakulya, co mukalya nameme vana veni vaje vanamyana Shukulu Kalunga Njambi yeni.

⁵⁴ Nameme vamyata vakulisingimika vaje vali akati keni, kuvakakala na ngozi na vandolome vavo, nambe na vanakazi vavo vaje vavazema, nambe vana vavo vaje vaciyoya.

⁵⁵ Kuvakanako situ imo ya vana vavo vaje vavalinakulya, omwo kukwesi cuma cimo cakulya casalao, omwo tuyando twa nzita, co vitozi veni vanamizengeleka nakumiyandesa mu vinganda vyeni vyoshe.

⁵⁶ Vanakazi vaje va kasingimiko vaje vali akati keni, vaka-kufuka vaje kuvalyatele mendi avo asi, kuvakanako situ imo vanalume vavo, nambe vana vavo vaje vavazema vanasalako.

⁵⁷ Vakalya mu vushweke vimbututu vavo vavaha amo na vinjuvo vya vimbututu vavo, omwo kuvesi na cuma cimo cakulya casalao cai, omwo tuyando twa nzita, co vitozi veni vakamizengeleka nakumiyandesa mu vinganda vyeni vyoshe.

⁵⁸ “Nga kumwononoka mashiko oshe aje vanasoneka mu livulu eli, co nga kumusingimika lizina lya Shukulu Kalunga Njambi yeni lya vumpau nakukomokesa,

⁵⁹ co akatuma kuli yeni na kuli vatekulwila veni mishongo yakujeneka kusaka, na mishongo yakukomokesa ije naumo wai akasa kuyivindika.

⁶⁰ Co lalo Shukulu Kalunga akatuma mishongo yakukomokesa ije mwamwene mu Ingito, ije yamijujwisile, ikamikakateya.

⁶¹ Co akatuma lalo miyati yoshe ya mishongo yakukomokesa ije kuvaitumbwile mu livulu eli lya mashiko a Njambi na vilongesa, noo mukanyonga.

⁶² Nameme munatumu ngwe vingongonosi vya mwilu, oloni vavandondo lika veni vakasalao, omwo kumwononokele mashiko a Shukulu Kalunga Njambi yeni.

⁶³ Ngwe mwavwaelelele Shukulu Kalunga akumivezikisa nakumitumisa, co a ngila eyi vene akavwaelela akumiyandesa nakuminyongesa. Co vakamitundisa mu lifuti lije mulinakukovela nakulishwana.

⁶⁴ “Shukulu Kalunga akamishandwela akati ka miyati yoshe ya ano asi, co kuje mukapangela vinjambi vakushonga va viti na mamanya, vinjambi vaje nambe yeni nambe vakukulwila veni kumwavazivukile.

⁶⁵ Akati ka miyati ije kumukawana kwoloka, kukwesi mutambela umo uvakatumbula ngwavo unapu weni wai. Oloni Shukulu Kalunga akamyana vimbunge vyakujakama, kujeneka kumbako mbunge, nakuzeya kwakama.

⁶⁶ Mukakala mu vushonde mukuyoya kweni kwoshe. Mutanya na vutsiki mukalijujukila, mukakala na lyova lya kutsa mukuyoya kweni kwoshe.

⁶⁷ Vimbunge vyeni vikezoka na lyova lya vyuma vyoshe vije vikalingiwa nevi vimukamona. Co simbu ya mutondo mukashaka ngeci kuyapwa cingwezi, co simbu ya cingwezi mukashaka ngeci kuyapwa mutondo.

⁶⁸ Shukulu Kalunga akamiilwisila ku Ingito mu mato, nameme ikeye wendekele ngwendi kumukelukila lalo kuje. Co kuje ku Ingito mukashaka kulilandesa kuli vitozi veni kupwa vindungo va vanalume na ava va vanakazi, oloni naumo wai akashaka kumilanda.”