Kwituluka mu Mashiko 26 - Livulu lya Shukulu Kalunga

Mulambu waa kuteja

¹ “Omo mukakovela mu lifuti lije lyanamyana Shukulu Kalunga Njambi yeni nakulishwana,

² munapande kwambata vushuka vwakulivanga vuje vumukongulula mu lifuti lyeni lije lyakamyana Shukulu Kalunga Njambi yeni. Co mukavwake mu mitonga, asinoni mukaye ku mutambela wakumulemesela wakaangula Shukulu Kalunga Njambi yeni.

³ Co mukaya kuli muka-kukombelela uje alinakupanga a simbu ije mukendeka ngweni, ‘Yetu tunalitavela kuli Shukulu Kalunga Njambi yetu ngeci yetu tunakovela mu lifuti lije lyakulaesele kutwana na vakukulwila vetu.’

⁴ “Asinoni muka-kukombelela akatambula ije mitonga kuli yeni, co akayaka kulutwe lwa mutula wa Shukulu Kalunga Njambi yeni.

⁵ Co mukendeka ku mesho Shukulu Kalunga Njambi yeni ngweni, ‘Kukulwila yetu wapwile kaAlama muka-kwendangana, watwalele naanga yendi ku Ingito nakukakalako. Vakevo vapwile vavandondo lika omo vaile, oloni vakelukile kupwa muyati wakama wa nzili manene.

⁶ Co vaka-Ingito vatupangesele mwamuvi manene, vatusindiiye kupanga ngwe tu vindungo.

⁷ Oloni twatambekele kuli Shukulu Kalunga Njambi ya vakukulwila vetu ngeci atukwase. Ikeye watuzivile, wamwene n̄avava yetu nakuundangana kwetu, na lipakeso lyetu.

⁸ Co wajundwile livoko lyendi lya nzili nakututundisa ku Ingito na vizivukiso na vikomokeso vyakujujwisa.

⁹ Co watunenele kuno nakutwana lifuti lino lyalivwa nevi vyakujenekamo vyai.

¹⁰ Ngecivene, yove Shukulu Kalunga, tunanene litambelo lya vushuka vwakulivanga vuje vuwatwanene.’ “Asinoni mukatumbika mutonga asi ku mesho a Shukulu Kalunga Njambi yeni nakumulemesa.

¹¹ Co mukavwaelela na vyuma vyoshe vyavivwa vije vyanamyana Shukulu Kalunga Njambi yeni, yeni na naanga yeni, amo na vaLevi, na vaka-kwija vaje valinakukala akati keni.

¹² “A mwaka woshe wamucitatu mukaana cavulikumi ku vimbuto vyeni kuli vaLevi, na vaka-kwija, na visiwa, na vifwile, ngeci mu membo eni oshe vakakale na vyakulya vyakupwisamo. Omo munalingi laja evi,

¹³ co mukendeka kuli Shukulu Kalunga Njambi yeni ngweni, ‘Tunatundisa vyavulikumi vyakujela mu njuvo yove, co tunavyana kuli vaLevi, na vaka-kwija, na visiwa, na vifwile, ngwe ku lishiko lyove liwatushikile. Kutwapokwele limo lya mashiko ove lya a vyavulikumi nambe kulivala embwe.

¹⁴ Kutwalileo cimo ca vyavulikumi omo twakele nakulila, nambe kutundisa vimo omo kutwajelele, nambe kukombelela vimo ku vakulu. Tunakwononoka yove Shukulu Kalunga Njambi yetu, tunalingi vyuma vyoshe vije viwatushikile.

¹⁵ Co kenga ano asi oku uli mu mwela wove wakujela mwilu, vezikisa vanu vove vaIsalele na livu liwunatwana, ngwe muje muwakulaesele vakukulwila vetu, lifuti lyalivwa nevi vyakujenekamo vyai.’

Vanu vendi vavenya Shukulu Kalunga

¹⁶ “Litangwa lya lelo Shukulu Kalunga Njambi yeni alinakumishika kunyunga mashiko endi oshe na vilongesa vyendi vyoshe. Ngecivene, mukononoka nakuvilinga, na vimbunge vyeni vyoshe, na mwonyo weni woshe.

¹⁷ Litangwa lya lelo mukazivuka Shukulu Kalunga kupwa Njambi yeni, nakwenda mu vingila vyendi vyoshe, nakunyunga vizilika vyendi, na mashiko endi, na vilongesa vyendi, nakwononoka lijwi lyendi.

¹⁸ Co lalo litangwa lya lelo Shukulu Kalunga nendeka ali yeni ngeci munapu mu vanu vendi, ngwe muje wamikulaesele. Co lalo munapande kunyunga mashiko endi oshe,

¹⁹ ngeci akamipwise muyati wakama kutuvakana miyati yeka yoshe ije yatangele, ngeci vakamishangazale, na lutsimo, na kalemeso. Co mukapwa mu vanu vakujela kuli Shukulu Kalunga Njambi yeni ngwe mwamikulaesele.”