Kwituluka mu Mashiko 25 - Livulu lya Shukulu Kalunga

¹ “Nga akati ka vaIsalele vavali valinga vimata, vaya ku mbanja nakulisompesa, co lyaako aane mulonga kuli uje naviisa, nakusambesa uje kesi na mulonga.

² Co nga lyaako ashika kupupa uje muka-mulonga, co vanapande kumuvulumanesa ku mesho a lyaako nakumupupa makote ngwe ku mulonga wendi.

³ Co napande kumupupa makote akweta ku makumi awana lika, oloni kesi kutuvakanesa embwe. Nga vakatuvakanesa kumupupa makote, co ndolome yove akaziva shwamwa ku mesho a vanu.

⁴ “Kesi mukute ngombe ku kanwa omo alinakujungula vimbuto.

Vyanapande kulinga uje natsisa ndolome yendi

⁵ “Nga vanu vavali mu vundolome vwavo vakakala amolika, co umo akati kavo atsa, oloni kasezele mwana wa munalume, cooni uje fwile yanaseza kapandele akashomboke ku naanga yeka embwe. Oloni ndolome ya uje mutsi napande kumushwana.

⁶ Co mwana wa ntwatwa wa munalume akasemuka kuli uje munakazi vakamutumbula ngwavo mwana wa uje mutsi, ngeci naanga yendi kesi ikanyonge mu Isalele.

⁷ Oloni nga ndolome ya uje mutsi kashaka kwambata uje munakazi, co uje munakazi akaye kuli vantwama va mu nganda akendeka ngwendi, ‘Ndolome ya munalume wange navyana kusangula lizina lya ndolome yendi mu Isalele. Shendi kupanga cipangi ca munaina kuli yange.’

⁸ Cooni vaje vantwama vakasana uje ndolome ya mutsi vakendeka nendi. Co nga ikeye akatwalao kuvyana kusangwila lizina lya ndolome yendi mu Isalele,

⁹ asinoni uje fwile akaye kuli ikeye ku mesho a vantwama va muje mu nganda, co akashulule n̄aku imo ku lindi lyendi, co akamujekwile mate mu luholo lwendi nakwendeka ngwendi, ‘Evi vikevyo vivakalinga kuli munalume uje avyana kusangwilako ndolome yendi lizina.’

¹⁰ Co naanga yendi vakaizivuka mu Isalele ngwavo, ‘Naanga ya uje ivanatundisile n̄aku ku lindi lyendi.’

Mashiko akwana

¹¹ “Nga vanalume vavali valinakulwa, co munakazi umo wa vaje valinakulwa amena munalume wendi, co akwata ku vilambu vya uje munalume mukwavo,

¹² co mukavatula livoko lyendi kesi mukamuzivile mema ku mbunge embwe.

¹³ “Kesi mukakwise omo mukapeselesa vyuma embwe.

¹⁴ Kesi mukakwise omo mukaseteka vyuma embwe.

¹⁵ Pangeseni vipeseleso vya vushunga. Co lalo pangeseni viseteko vya vushunga, ngeci mukakale simbu yakama mu lifuti lije lyakamyana Shukulu Kalunga Njambi yeni.

¹⁶ Shukulu Kalunga wazinda vanu vakakukwisa.

Lishiko lyakutsiya vaAmaleke

¹⁷ “Anukeni vije vivalingile vaAmaleke kuli yeni omo mwatundile mu Ingito.

¹⁸ Vakevo kuvazivile lyova lya Njambi embwe. Vamilwisile mu ngila omo yeni mwajukile nakuzeya, co vatsiile voshe vaje vakele munima ya cendo.

¹⁹ Ngecivene, omo Shukulu Kalunga Njambi yeni akamyana lifuti lije nakulishwana nakumihwimisa ku vitozi veni voshe vaje vakamizengeleka, co mukanyongesa vaAmaleke voshe ngeci kesi kukakale umo akavanuka lalo. Kesi mukevale embwe.