Kwituluka mu Mashiko 24 - Livulu lya Shukulu Kalunga

Kukondola na kwambata

¹ “Nga munalume ambata munakazi, co kulutwe kakamushaka omwo nawana cuma cimo ca shwamwa ali ikeye, co akamusonekele mukanda wakumukondola. Amwanewo ikeye vavenya mu livoko lyendi, co akamusheke a njuvo yendi.

² Co nga uje munakazi natundu ku njuvo ya uje munalume akalishombokela kweka,

³ nga uje munalume wendi wamucivali kamushaka, co akamusonekele mukanda wakumukondola nakumwanawo ikeye vavenya mu livoko lyendi nakumusheka a njuvo yendi. Nambe nga uje munalume wendi wamucivali atsa,

⁴ co munalume wendi uje wamwambatele akulivanga uje wamukondwele, kakasa lalo kumwambata embwe, omwo ikeye nalijwalesa laja. Nga akamwambata lalo, co cikapwa ca vunyengwe ku mesho a Shukulu Kalunga. Kesi mukalinge lalo vuvi vwa cifwa cangacije mu lifuti lije lyanamyana Shukulu Kalunga Njambi yeni.

Mashiko akuliseza-seza

⁵ “Omo mukwenje nambata munakazi wendi ololo, kesi aye ku nzita embwe nambe ku vipangi vyeka vya mbunga. Vamwane lisesa mwaka woshe wamutunu, ngeci akale embo nakuvwaelela amo na munakazi wendi.

⁶ “Omo ukumwisa munu cuma cimo, co kesi ukambate mamanya akulolela vunga kupwa cishimbikiya, omwo eci cinapu kumwonwesa ngila yakuyoyeselamo naanga yendi.

⁷ “Nga munu ayiva mukwavo kaIsalele nakumupwisa ndungo nambe kumulandesa ku vundungo, vamutsiye. Mu ngila eyi mukatundisa vuvi ovu akati keni.

⁸ “Linyungeni ku mushongo wa a cikonde wakulitambwisa. Nyungeni vyoshe vije vivamileka vaka-kukombelela vaLevi ngwe munjavashikile.

⁹ Anukeni vije vyalingile Shukulu Kalunga Njambi yeni kuli Milyamu a ngila, omo mwatundile ku Ingito.

¹⁰ “Omo mukakumwisa mukweni cuma cimo, kesi mukalikovelele mu njuvo yendi nakulinonela cishimbikiya.

¹¹ Mukavandamena anja, co munu uje imunakumwisa akanena ikeye vavenya cishimbikiya.

¹² Nga ikeye kautu, kesi mukalitulikileco noo alikaki embwe.

¹³ Mwilwisilenico simbu ya cingwezi ngeci akalale oku nalifwiki. Co akamishangazala, co cikapwa cuma cacivwa ku mesho a Shukulu Kalunga Njambi yeni.

¹⁴ “Kesi mukanyanyamene kautu, na ngamba wa uje mwakumwine, nambe mukweni kaIsalele, nambe muka-kwija uje ali mu nganda yeni.

¹⁵ Mukamufwete fweto yendi ya a litangwa na litangwa omo litangwa kanda litoke, omwo ikeye kautu, co naakao mbunge, kutewa akalinyenyetela kuli Shukulu Kalunga, co mukakala na mulonga wa vuvi.

¹⁶ “Visemi kuvapandele kutsila vuvi vwa vana vavo, co lalo vana vavo kuvapandele kutsila vuvi vwa visemi vavo embwe. Munu na munu napande kutsila vuvi vwendi.

¹⁷ “Kesi mukaengese n̄anda ya vaka-kwija nambe ya visiwa, nambe kwambata cikoveyo ca fwile kupwa cishimbikiya embwe.

¹⁸ Oloni anukeni ngweni neni mwapwile mu vindungo mu Ingito, co Shukulu Kalunga Njambi yeni wamikulile. Ngeci njinamyana lishiko eli.

¹⁹ “Omo mukateja vimbuto vyeni mu lihya, co mwivala lyanda limo mu lihya, kesi mukaliilukile kukalishaka. Oloni lisezeleni vaka-kwija, na visiwa, na vifwile, ngeci Shukulu Kalunga Njambi yeni akamivezikise mu vyuma vyoshe vimukalinga.

²⁰ Omo mukapapa ku miti yeni ya olive, co kesi mukelukile lalo vushuka vunasalako. Vusezeleni vaka-kwija, na visiwa, na vifwile.

²¹ Co omo mukapotola vushuka vweni mu citungu ca mikolovozi ya vushuka vwa vinyu, kesi mukelukile lalo vushuka vuje vunasalako. Vusezeleni vaka-kwija, na visiwa, na vifwile.

²² Anukeni ngweni neni mwapwile mu vindungo mu Ingito. Ngeci njinamyana lishiko eli.