Kwituluka mu Mashiko 23 - Livulu lya Shukulu Kalunga

Vanu vaje kuvatavesele kukala mu cikungulukilo ca vanu va Shukulu Kalunga

¹ “Kukwesi munalume wakushimwa akakovele mu mbunga ya vanu va Njambi embwe.

² “Kukwesi mwana wa mu vukwizi nambe mutekulwila wendi, nameme wa ku cisemwa camulikumi vakamupandakane ku vanu va Shukulu Kalunga embwe.

³ “Kukwesi kaAmoni, nambe kaMowavi, nambe mutekulwila wavo umo, nameme wa ku cisemwa camulikumi, vakamupandakane ku vanu va Shukulu Kalunga.

⁴ Omwo vavyanene kumyanako vyakulya na mema mu vungenzi vweni vwakutunda ku Ingito. Co lalo valanyele Mbalame muna Mbeole, uje watundile ku nganda ya Petole mu Mesopotamya, nakumisinga.

⁵ Nameme ngoco Shukulu Kalunga Njambi yeni katolililile kuli Mbalame, oloni watengulwile cisingo kucipwisa civezikiso, omwo Shukulu Kalunga Njambi yeni wamizemene.

⁶ Kesi mukalizivasane navo nambe kulikwata navo vusamba matangwa eni oshe a kulutwe.

⁷ “Kesi mukashaule vaEndome omwo vakevo vapwa vandolome veni. Co kesi mukashaule lalo vaka-Ingito embwe, omwo mwapwile mu vaka-kwija mu lifuti lyavo.

⁸ Vatekulwila vavo va mu cisemwa camucitatu vakasa kuvapandakana ku vanu va Shukulu Kalunga.

Kujelesa cilombo ca mashwalale

⁹ “Omo muli mu cilombo a simbu ya nzita, mukalitenga ku cuma coshe cije cakujeneka kujela.

¹⁰ Nga munalume umo kajelele omwo nalituwisila ngoco mbuto yendi a simbu ya vutsiki, co akaye anja ya cilombo akakale kuje.

¹¹ Co ku cingwezi akajwele, co omo litangwa litoka akeluke lalo mu cilombo.

¹² “Munapande kukala na mutambela umo wa mushondo anja ya cilombo kuje mwasa kuyako omo mushaka kuya nakutundisa mazilo ali mwimo.

¹³ Mukambate citi cakupangesa, ngecivene, omo mukatumbama asi nakutundisa vyuma vili mwimo, co mukainda citeke nakuvishitika.

¹⁴ Mu ngila eyi mukanyunga cilombo ceni cikapwe cakujela, omwo Shukulu Kalunga Njambi yeni ali amo neni mu cilombo ceni mukuminyunga ngeci mukafungulule vitozi veni. Kesi mulinge cuma cimo ca vunyengwe cije cikaluvalesa Shukulu Kalunga ngeci amikengese nima.

Mashiko akuliseza-seza

¹⁵ “Nga ndungo atewa kutunda kuli shukulu yendi, co aija kuli yeni nakuliita ngeci mumunyunge, kesi mukamwilwisile lalo kuli shukulu yendi.

¹⁶ Ikeye akaangule nganda yoshe-iyoshe yakatumbama, oloni kesi mukamuyandese embwe.

¹⁷ “Kesi kukakale cikwizi akati ka vana va vanakazi va vaIsalele, nambe kesi kukakale vundeyi akati ka vana va vanalume va vaIsalele embwe.

¹⁸ Kesi mukanene vimbongo vya mu vukwizi nambe vya mu vundeyi ku Njuvo ya Shukulu Kalunga Njambi yeni mukushulisa cisingo embwe, omwo vyuma vyoshe evi vivali vyapwa vya vunyengwe ku mesho a Shukulu Kalunga.

¹⁹ “Kesi mukakumwise vimbongo na kakondweso. Nambe vyakulya, nambe cuma cimo ceka kuli mukweni kaIsalele, kesi mukamufwetese kakondweso.

²⁰ Mukafwetesa lika kakondweso vije mukakumwisa kuli muka-kwija, oloni kesi mukakumwise na kakondweso kuli mukweni kaIsalele embwe. Ononokeni lishiko eli ngeci Shukulu Kalunga Njambi yeni akamivezikise mu vyuma vyoshe vimukapanga mu lifuti lije limukashwana.

²¹ “Omo mukalisinga cisingo kuli Shukulu Kalunga Njambi yeni, kesi mukeshwale kulinga vije mwakulaesele, omwo Shukulu Kalunga Njambi yeni ashaka yeni mushulise cisingo ceni. Kujeneka kushulisa cisingo kunapu vuvi.

²² Oloni kukwesi mulonga nga kumulisingi cisingo kuli Shukulu Kalunga.

²³ Ngecivene, cuma coshe cije mukendeka na tunwa tweni mukanyanyame nakucilinga ngwe omo munalisingi kuli Shukulu Kalunga Njambi yeni, omwo mwalisingile na cizango.

²⁴ “Omo mukakovela mu citungu ca mukweni ca mikolovozi ya vushuka vwa vinyu mukasa kulya vushuka vwoshe mushaka, oloni kesi mukambateko vumo mu vinjeke vyeni embwe.

²⁵ Omo mukakovela mu lihya lya mukweni muje muli vimbuto vinahi, mukasa kulya vimbuto vije vimwasa kushutozola na mavoko eni, oloni kesi mukavitete na moko.