Kwituluka mu Mashiko 22 - Livulu lya Shukulu Kalunga

¹ “Nga munu akamona ngombe nambe manga wa mukwavo kaIsalele nazimbala, kesi akamwecelele ngoco embwe, akamwilwise kuli vavenyaye.

² Oloni nga vavenyaye wakala kulyala nendi, nambe kazivuka vavenyaye, co akatwale uje cimuna kwimbo lyendi akakaleko noo vavenyaye akaija nakumushakezeka, co akamwaneye.

³ Co akalinge cuma cimo nga awana cimulu, nambe vuzalo, nambe vyuma vyoshe vije vyanazimbalesa mukwavo kaIsalele. Co nga avyalula aviilwise kuli vavenyavyo.

⁴ “Co nga munu amona cimulu nambe ngombe wa mukwavo kaIsalele nawila mu ngila, kesi akamwecelele ngoco embwe, amukwase ngeci amwindwileye.

⁵ “Vanakazi kesi vakazale vuzalo vwa vanalume, nambe vanalume lalo kesi vakazale vuzalo vwa vanakazi, omwo Shukulu Kalunga Njambi yeni wazinda woshe alinga cuma cangacije ca vunyengwe.

⁶ “Nga ukawana lishwa lya kazila ku muti, nambe asi, na vaina vanavutamena a mavunda, nambe a vana vendi, kesi ukambatele kumo vana na vaina.

⁷ Ukambatao lika vana va tuzila, oloni ukecela vaina, ngeci ukakale mwamuvwa ano asi simbu yakama.

⁸ “Omo mukatunga njuvo yaiha, co mukakako civumbe cacihi cakuzengeleka akamwa ya njuvo, kutewa mukakala na mulonga nga munu akandumukao na kutsa.

⁹ “Kesi mukakune miyati ivali ya vimbuto mu citungu ceni ca mikolovozi ya vushuka vwa vinyu. Nga mukalingamo, co mukonwa mikolovozi ya vushuka vwa vinyu amo na vimbuto vikwavo vije mukakuna.

¹⁰ “Kesi mukalimise ngombe na cimulu amolika nakuvakutiiya ku mandauluwa imolika embwe.

¹¹ “Kesi mukazale vuzalo vwakulikumbasana amolika na maka a manga na linyu embwe.

¹² “Mukatongela vinzombo ku mitambela iwana ya vuzalo vweni.

Mashiko akunyunga vulo

¹³ “Nga munalume akambata mumbanda, co kulutwe oni amuvyana,

¹⁴ ngecivene, akatenguluka nakumukutiiya vyuma vya makuli, co akendeka ngwendi, ‘Omo njamwambatele kunjamuwanene ngeci ikeye napu mumbanda wa kulimona na munalume embwe.’

¹⁵ “Nga eci vakacilinga, co vaje visemi va uje mumbanda vakambate vizivukiso vya vukaleo kuli vakulunu vaje vali mu nganda.

¹⁶ Co ishe ya uje mumbanda akendeke kuli vakevo ngwendi, ‘Yange njashombwesele munange kuli ou munalume, co ololo ikeye namuvyana.

¹⁷ Co ikeye natenguluka kwendeka makuli ngwendi ikeye kapwile mumbanda uje kanda alimone na munalume omo wamwambatele. Oloni vukaleo vwa munange ovu, omwo ikeye kalimwene na munalume.’ Co nanga ya vushombolwa vwendi vakaijangumwine ku mesho a vakulunu.

¹⁸ Co vaje vakulunu va nganda ije vakakwate uje munalume nakumupupa.

¹⁹ Co vakevo lalo vakamufwetese mavundungulu a siliva 100 nakwana aje mavundungulu kuli ishe ya uje mumbanda, omwo uje munalume nazivisa shwamwa uje mumbanda wa kaIsalele. Nameme ngoco, ikeye akatwaleo kupwa munakazi wendi vene, co uje munalume kakasa kumukondola noo kutsa.

²⁰ “Oloni nga eyi n̄anda ikapwa ya vushunga, kuyesi na vukaleo vwakumwesa ngeci kuma uje mumbanda kalimwene na munalume,

²¹ asinoni uje mumbanda vakamutwala ku cikolo ca njuvo ya ishe. Vanalume va muje mu nganda vakamwasheleko mamanya nakumutsiya, omwo ikeye nalingi cuma cacivi manene ca shwamwa akati ka vanu va Isalele akulimona na munalume omo ikeye kanda ashomboke, ali ku njuvo ya ishe. Mu ngila eyi mukatundisa vuvi ovu mu Isalele.

²² “Nga munalume vanamukwata na munakazi wa mukwavo, co muvuvali vwavo vakavatsiye. Mu ngila eyi mukatundisa vuvi ovu mu Isalele.

²³ “Nga munalume vamukwata mu nganda na mumbanda uje vanendekeya laja kuli munalume weka,

²⁴ co vakavatuwise anja ya nganda vakavashe mamanya nakuvatsiya. Uje mumbanda akatsila omwo yakwonwa kusana vaka-kumwamena muje mu nganda, co munalume akatsa omwo ikeye naviisa mumbanda uje vanendekeya laja. Mu ngila eyi mukatundisa vuvi akati keni.

²⁵ “Oloni nga munalume ali mu shwata, co aliwana na mumbanda uje vanendekeya laja kuli munalume weka, co uje munalume amuwisa nakulinga nendi vuvi, co a n̄anda eyi vakatsiye lika munalume.

²⁶ Kesi vakalinge cuma cimo kuli uje mumbanda embwe, omwo ikeye kalingile vuvi vuje vwanapande kutsila. Co n̄anda eyi inalifu ngwe omo munalume akatukila kulwisa mukwavo nakumutsiya.

²⁷ Omwo uje munalume wawanene uje mumbanda wakwendekeya mu shwata, co nameme uje mumbanda watambekele ngeci vakumukwase, oloni naumo wai wakeleko nakumukwasa.

²⁸ “Nga munalume awana mumbanda uje kanda alimone na munalume ikeye kesi wakwendekeya, co amukwata nakulinga nendi vuvi, co vavawana,

²⁹ uje munalume akafwetele ishe ya uje mumbanda mavundungulu a siliva makumi atanu. Co ikeye akapwe munakazi wendi, omwo namuviisa. Kakasa lalo kumukondola noo kutsa.

³⁰ “Munu kesi akambate umo munakazi wa ishe nakulinga nendi vuvi embwe.