Kwituluka mu Mashiko 20 - Livulu lya Shukulu Kalunga

Mashiko aa nzita

¹ “Omo mukaya ku nzita nakulwa na vitozi veni, mukamona, matemba avo, na tuvalu twavo, na nzita yakama kutuvakana yeni, oloni kesi mukavazivile lyova embwe, omwo Shukulu Kalunga Njambi yeni uje wamitundisile mu Ingito, ali amo neni.

² Omo yeni kanda mucishangumuke kulwa, muka-kukombelela akaije kulutwe lweni nakwendeka ku mashwalale. Ikeye akendeka ngwendi,

³ ‘Tolilileni yeni vaIsalele! Ku litangwa lya lelo mulinakuya ku nzita. Kesi muzive lyova lya vitozi veni, nambe mulijujukile mu vimbunge vyeni, nambe kuvupuka,

⁴ omwo Shukulu Kalunga Njambi yeni alinakuya neni, nakumilwila ku vitozi veni.’

⁵ “Asinoni vamyata vakendeka kuli vanu nakuvehula ngwavo, ‘Kuli munu umo kuno natungu njuvo yendi, oloni ikeye kaikundikile ndi? Nga kwali, co eluke kwimbo, kutewa vakamutsiila mu nzita, munu weka akakundika ije njuvo yendi.

⁶ Kuli munu umo kuno nakunu citungu ca mikolovozi ya vushuka vwa vinyu, oloni kanda acilye vushuka vwamwo? Nga kwali, co eluke kwimbo, kutewa vakamutsiila mu nzita, co munu weka akalya vushuka vwamwo.

⁷ Kuli munu umo kuno nendekeya munakazi ikeye kanda ete? Nga kwali, co eluke kwimbo, kutewa vakamutsiila mu nzita, co munu weka akambata uje munakazi yanendekeya.’

⁸ “Co vamyata vakendeka lalo kuli vaje vanu ngwavo, ‘Kuli munu umo kuno uje wapwa muka-munjunju na lyova? Nga kwali, co eluke kwimbo, kutewa akajajesa vakwavo.’

⁹ Co omo vamyata vanamanesa kwendeka kuli mashwalale, co vakaangula vantwama ku munga imo na imo.

¹⁰ “Omo muketa kuyehi na nganda ije mukashaka kulwa nayo, co akulivanga mukaane vanu vamwo simbu yakuliita.

¹¹ Nga vakevo vakamishokolwela vikolo nakuliita, co voshe vakapwe vinzinda veni vakumipangela.

¹² Oloni nga vanu vaije nganda shavo kuliita, vakevo vashaka kulwa neni, co mukazengeleka ije nganda na mashwalale veni.

¹³ Co omo Shukulu Kalunga Njambi yeni akakundika ije nganda mu mavoko eni, co mukatsiya vanalume voshe valimo.

¹⁴ Oloni vanakazi, na vanike, na vimuna, na vyuma vyoshe vya vitozi veni vije vili mu nganda mukavyambata kupwa vyuma vyakupukula. Mukavwaelela navyo omwo Shukulu Kalunga Njambi yeni namyanavyo.

¹⁵ Omu mukemwo mumukalinga na vinganda vyoshe vije vya ku mafuti a kulyala manene neni.

¹⁶ “Oloni omo mukafungulula vinganda mu lifuti lije Shukulu Kalunga Njambi yeni akamyanalyo, co kesi mukasezemo cuma cimo cakuyoya.

¹⁷ Oloni mukavanyongesa voshe njwa! VaHiti, na vaAmoli, na vaKanana, na vaPelezi, na vaHivi, na vaNjevushi mukavanyongesa voshe, ngwe mwanamishiki Shukulu Kalunga Njambi yeni,

¹⁸ ngeci kesi vakamilongese kulinga vyuma vya vunyengwe vije vivakalingi vakevo mukulemesa vinjambi vavo, kutewa mukavulumuna kuli Shukulu Kalunga Njambi yeni.

¹⁹ “Omo mukafungulula nganda, kesi mukashinje miti ya vushuka vwamwo embwe, nameme mukalwilamo simbu yakama manene. Co mukalya vushuka, oloni kesi mukazilise miti, omwo miti kesi ikeyo vitozi veni embwe.

²⁰ Co mwasa kushinja miti yeka nakuyipangesa ndendelo yakulondela civumbe ca nganda ije mulinakulwa nayo noo munayifungulula.