Kwituluka mu Mashiko 19 - Livulu lya Shukulu Kalunga

Vinganda mwakutewela

¹ “Omo Shukulu Kalunga Njambi yeni akanyongesa miyati ya vanu vaje vali mu lifuti lije lyakamyana Shukulu Kalunga Njambi yeni, omo mukavashekamo nakukala mu vinganda vyavo na mu vinjuvo vyavo,

² co mukalyangunwina vinganda vitatu vyakutewela mu lifuti lije Shukulu Kalunga Njambi yeni akamyanalyo kulishwana.

³ Co mukateta lifuti mu mitambela itatu nakuvwaesa vitapalo, ngeci uje munu natsii mukwavo na cintulu ase kutewela ku vinganda vije ngeci vakamunyungilemo.

⁴ Eli likelyo lishiko lya ali munu uje atsiya mukwavo. Nga munu atsiya mukwavo na cintulu, uje kesi citozi cendi, co ikeye akatewele ku nganda yoshe-iyoshe ya vinganda vije ngeci akakale mwamuvwa.

⁵ Ngwe omwo vanu vavali vaya mu shwata amolika nakucava vitale, co nga umo wa ali vakevo ashinja muti, co njaviti isokokela mukwavo, co mukwavo atsa, uje munu akatewele ku nganda imo ya vije vinganda vitatu ngeci akakale mwamuvwa.

⁶ Nga ije nganda ili kulyala manene, co nga uje munu alinakumukava mukulinga shambandinga nendi amukwata, amutsiya, oloni uje munu kapandele kutsa omwo kapwile citozi cendi.

⁷ Ngecivene, njamishiki ngwange mukalyangunwine vinganda vitatu vyakutewela.

⁸ “Nga Shukulu Kalunga Njambi yeni akaamesa lifuti lyeni ngwe mwalisingile na vakukulwila veni, nakumyana lifuti lyoshe lyavakulaesele,

⁹ co mukaangwilako lalo vinganda vyeka vitatu vyakutewela. Ikeye akamyamesela lifuti eli nga mukanyunga mashiko awa oshe njinamishikawo ku litangwa lya lelo, nakuzema Shukulu Kalunga Njambi yeni nakwenda mu vingila vyendi.

¹⁰ Lingeni ngeci, kutewa maninga a mulonga kesi vakaetile mu lifuti lyeni, lije Shukulu Kalunga Njambi yeni alinakumyanalyo kulishwana, ngeci kesi mukakale na mulonga wakwitila maninga.

¹¹ “Oloni nga munu azinda mukwavo nakumuvandamena, co amukatukila nakumupupa ngeci atse, co atewela ku nganda imo ngeci vakamunyunge,

¹² co vakulunu va nganda yendi vakatume kukamushaka kuje ngeci vakamwane ku mavoko a muka-kulinga shambandinga vakamutsiye.

¹³ Kesi mukamuzivile mema ku mbunge embwe. Munapande kutundisa vuvi vwakwitila maninga a mulonga mu Isalele, ngeci mukakale mwamuvwa.

Vinginga vyalaja

¹⁴ “Kesi mukashwenyese nginga ya vushwana vwa mukweni, ije ivemikile vakukulwila veni mu lifuti lije lyakamyana Shukulu Kalunga Njambi yeni kulishwana.

Mashiko a vakaleo

¹⁵ “Kucitava ngeci munu vamwane mulonga a vukaleo vwa munu umolika embwe, kunapande kukale vukaleo vwa vanu vavali nambe vatatu, ngeci uje munu vamwane mulonga.

¹⁶ Nga munu umo akakutiiya mukwavo mulonga wa makuli,

¹⁷ muvuvali vwavo vakemane ku mesho a Shukulu Kalunga ku mwela uje wakumulemesela, co vakavasompe kuli vaka-kukombelela, na maako vaje vakakalako a simbu ije.

¹⁸ Co vaje maako vakehwisise mwamuvwa mulonga, nga uje munu mwa vushunga nakutiiya mukwavo kaIsalele vya makuli,

¹⁹ co mukamulinge ngwe muje mwanesi kulingile ndolome yendi. Co mu ngila eyi mukatundisa vuvi ovu akati keni.

²⁰ Omo vanu voshe vakaziva vije vinalingiwa, co vakakala na lyova, naumo wai lalo akalinga cuma ca cifwa cangacije.

²¹ Co a mulonga wa cifwa cangacije kesi mukamuzivile mema ku mbunge embwe, cihiso cendi cinapande kupwa mwonyo na mwonyo, lisho na lisho, liyo na liyo, livoko na livoko, lindi na lindi.