Kwituluka mu Mashiko 17 - Livulu lya Shukulu Kalunga

¹ “Kesi mukakombelele kuli Shukulu Kalunga Njambi yeni ngombe nambe manga uje ali na kapenga, omwo vyuma vyangacije vyapwa vya vunyengwe ku mesho a Shukulu Kalunga Njambi yeni.

² “Nga mukaziva mu nganda yeni imo munalume umo nambe munakazi umo nalingi cuma cacivi ku mesho a Shukulu Kalunga Njambi yeni, nakupokola cikumiiyo cendi,

³ akulemesa nakupangela vinjambi veka, nambe kulemesa litangwa, nambe ngonde, nambe vingongonosi, vije vyanavindika Shukulu Kalunga,

⁴ nga mukaziva vukaleo vwangacije, co mukehwisise mwamuvwa. Co kengeni nga cuma eci ca vunyengwe vanacilingi mu Isalele,

⁵ co mukatwale uje munu anja ya nganda nambe munalume nambe munakazi, nakumutsiya na mamanya.

⁶ Nameme ngoco, mukamutsiye nga kuli vakaleo vavali nambe vatatu. Co ikeye kuvapandele kumutsiya nga kuli mukaleo umolika embwe.

⁷ Vakeleo vakalivange kumwasha mamanya, asinoni vanu voshe vakamwashe mamanya uje munu nakumutsiya. Co mu ngila eyi mukatundisa vuvi akati keni.

⁸ “Nga milonga imo ikakaluwa akuyisompa ngeci mwa milonga yakuyongwela munu nga ikeye natsi ku monde nambe vanalingi wakutsiya na cintulu, nambe milonga yakuvulumuna munu a muvila, nambe n̄anda yakulipangela vushwana. Omo vanalingi evi, co mukaya ku mwela uje wakaangula Shukulu Kalunga Njambi yeni wakumulemesela.

⁹ Asinoni mukambulula uje mulonga kuli muka-kukombelela wa ku naanga ya Levi na kuli lyaako uje akakalako matangwa aje, mukavehula, co vakevo vakamileka nguli yakuteta mulonga.

¹⁰ Mukalinga ngwe muvakamileka a n̄anda ije ku mwela wakaangula Shukulu Kalunga Njambi yeni, co mukanyanyama akulinga mwoshe muje muvakaminangula.

¹¹ Co mukatava kusompa kwavo, ngeci mukavangeye vilongesa vyavo mwoshe muje muvinapu.

¹² Nga munu umo ajeneka kwononoka kuli muka-kukombelela uje muka-kupangela Shukulu Kalunga Njambi yeni, nambe kuli lyaako, co uje munu vakamutsiye, ngeci mukatundise vuje vuvi mu Isalele mwoshe.

¹³ Co vanu voshe omo vakazivako, co vakakala na lyova kuvakalingi lalo cuma cakufwa ngacije nakwamuka.

Cifwa ca mwene ivakaangula

¹⁴ “Omo muketa mu lifuti lije lyakamyana Shukulu Kalunga Njambi yeni kulishwana nakukalamo, asinoni mukayongola kukala na mwene ngwe miyati yoshe vaje vanamizengeleka.

¹⁵ Mwa vushunga uje munu imukaangula kupwa mwene, kuvanga akapwe uje yakaangula Shukulu Kalunga Njambi yeni. Ikeye akapwe umo wa ali vandolome veni vene, co kesi mukapwise muka-kwija mwene yeni embwe.

¹⁶ Oloni mwene kapandele kukala na tuvalu vavangi-vangi va nzita yendi embwe, nambe kutuma vanu ku Ingito nakukalanda tuvalu embwe, omwo Shukulu Kalunga wendekele ngeci kesi vakelukileko kuje.

¹⁷ Co mwene kesi akakale na vanakazi vavangi embwe, kutewa mbunge yendi ikatanguka kuli Shukulu Kalunga, nambe kesi akalitumisile ikeye vavenya siliva na ngolinde.

¹⁸ Omo akatumbama a litanda lyendi lya vumwene, co akalisonekele ikeye vavenya livulu lya mashiko a Njambi awa na vilongesa vyakutunda mu livulu livanatulika vaka-kukombelela va ku naanga ya Levi.

¹⁹ Ngecivene, uje mwene akakale na lije livulu nakulavamo matangwa oshe akuyoya kwendi, co akalilongese kukomoka Shukulu Kalunga Njambi yendi, nakunyunga mwamuvwa majwi oshe a lishiko eli na vizilika evi nakuvilinga,

²⁰ kutewa mbunge yendi ikalyalesa akati ka vandolome vendi vaIsalele nakupokola mashiko a Shukulu Kalunga mukulinga nevi nevi. Asinoni akashwana myaka yaingi, co vatekulwila vendi vakashwana Isalele ku visemwa vyavingi.