Kwituluka mu Mashiko 16 - Livulu lya Shukulu Kalunga

Ciwano ca Pasovala

¹ “Mukanyunge ngonde ya Avive nakulisamba a Ciwano ca Pasovala kuli Shukulu Kalunga Njambi yeni, omwo mu ngonde ije vene ku vutsiki, mukemwo Shukulu Kalunga Njambi yeni wamitundisile mu Ingito.

² Co mukakombelela n̄ombelo ya manga nambe ya ngombe kuli Shukulu Kalunga Njambi yeni ya Ciwano ca Pasovala ku mwela uje wakaangula Shukulu Kalunga Njambi yeni wakumulemesela.

³ Omo mukalya vyakulya vije, kesi mukalye makende akwaka musima embwe. A matangwa atanu na avali mukailya na makende akujeneka musima. Mukawatumbula ngweni makende a tuyando omwo mwatundile mu Ingito lumbisi. Simbu yoshe yakuyoya kweni mukanuka litangwa lije mwatundile mu lifuti lya Ingito, lifuti lije lya tuyando.

⁴ A matangwa atanu na avali mu lifuti lyeni mu vinjuvo vyeni, kesi mukakale musima. Co situ ya cimuna uje mukakombelela a litangwa lyakulivanga ku cingwezi, kesi mukaisezeo, munapande kuyilya vutsiki vuje vene.

⁵ “Kesi mukakombelele cimuna wa Ciwano ca Pasovala mu limbo lyoshe-ilyoshe lije lyakamyana Shukulu Kalunga Njambi yeni,

⁶ kuvanga lika ku mwela uje wakaangula Shukulu Kalunga Njambi yeni wakumulemesela. Kukekwo mukakombelela n̄ombelo ya Ciwano ca Pasovala ku cingwezi akulauka kwa litangwa a simbu ije mwatundile nayo mu Ingito.

⁷ Co mukoca ije situ nakuyilila mu mwela uje wakaangula Shukulu Kalunga Njambi yeni wakumulemesela, co alikaki mukeluke ku membo eni.

⁸ A matangwa atanu na limo mukalya makende akujeneka musima, co a litangwa lyamucitanu na avali mukalikungulula nakulemesa Shukulu Kalunga Njambi yeni. Co kesi mukapange vipangi a litangwa lije.

Ciwano ca Kuteja

⁹ “Mukalava visimano vitanu na vivali kutunda a simbu ije mushangumuka kuteja vimbuto.

¹⁰ Asinoni mukanyunga Ciwano ca Kuteja mukusingimika Shukulu Kalunga Njambi yeni. Mukamwane mulambu weni wa n̄ombelo ya cizango ngwe ku vivezikiso vije vyakamivezikisa Shukulu Kalunga Njambi yeni.

¹¹ Co mukajolela ku mesho a Shukulu Kalunga Njambi yeni, yeni na vana veni va vanalume, na ava va vanakazi, na vangamba veni va vanalume, na ava va vanakazi, na vaLevi vaje mulinakukala navo, na vaka-kwija, na visiwa, na vifwile vaje valinakukala akati keni. Mukalingila eci ku mwela uje wakaangula Shukulu Kalunga wakumulemesela.

¹² Mukanuke ngeci neni mwapwile mu vinzinda mu lifuti lya Ingito, co mukanyanyame nakunyunga vizilika evi.

Ciwano ca Mapapela

¹³ “Mukanyunga Ciwano ca Mapapela a matangwa atanu na avali omo mukongulula vimbuto vyeni vya ku lijungwilo, na vinyu vyeni vyakukamuna.

¹⁴ Mukajolela a ciwano ceni, yeni na vana veni va vanalume, na ava va vanakazi, na vangamba veni va vanalume, na ava va vanakazi, na vaLevi, na vaka-kwija, na visiwa, na vifwile vaje valinakukala akati keni.

¹⁵ A matangwa atanu na avali mukanyunga ciwano kuli Shukulu Kalunga Njambi yeni ku mwela uje wakaangula wakumulemesela, omwo Shukulu Kalunga Njambi yeni akamivezikisa a kuteja kweni na a vipangi vyoshe mukapanga na mavoko eni, co muvavoshe mukajolela amolika.

¹⁶ “Vanalume voshe va ku muyati weni vakalikungulwile ku mesho a Shukulu Kalunga Njambi yeni visimbu vitatu a mwaka ku mwela uje waakangula Shukulu Kalunga wakumulemesela, vakalikungulwile ku Ciwano ca Pasovala, na ku Ciwano ca Kuteja, na ku Ciwano ca Mapapela. Co vakanene mulambu.

¹⁷ Munu na munu akaane ngwe mwanasela, ngwe ku vivezikiso vije vyanamuvezikisa navyo Shukulu Kalunga Njambi yendi.

Vingila vya a kusompa

¹⁸ “Mukemika maako na vamyata mu membo eni oshe aje akamyana Shukulu Kalunga Njambi yeni ngwe ku miyati yeni. Vanalume ava vakasompa vanu mu vushunga.

¹⁹ Vakevo vanapande kusompa mu vushunga, kesi vamwese kahangu mukusompa kwavo. Co kuvapandele kutambula lizika-kanwa, omwo lizika-kanwa lizivalesa mesho a vaka-mana nakwingika majwi a vaka-vushunga.

²⁰ Simbu yoshe mukapwe vaka-kusompa mwamuvwa, ngeci mukayoye, nakushwana lifuti lije lyakamyana Shukulu Kalunga Njambi yeni.

²¹ “Kesi mukashimbikile manda ya citi ca Ashela njambi wa munakazi kumukulo wa mutula wa Shukulu Kalunga Njambi yeni.

²² Co kesi mukalishimbikile manda ya limanya lyakulemesela kamponya, omwo Shukulu Kalunga wazinda evi.