Kwituluka mu Mashiko 15 - Livulu lya Shukulu Kalunga

Mwaka wamucitanu na ivali

¹ “Kukuhwa kwa mwaka na mwaka wamucitanu na ivali mukasambesa makongo a vaje vakumwine vimbongo vyeni.

² Eyi ikeyo ngila yakusambesa. Munu woshe nakumwisa vimbongo kuli mukwavo kaIsalele, napande kumusambesa ku likongo lije. Co ikeye kapandele kwihula lije likongo kuli uje munu nambe kuli ndolome yendi embwe, omwo vavenya Shukulu Kalunga nasambesa laja lije likongo.

³ Mukatambula lika vije vivanakumwine vaka-kwija, oloni kumwapandele kutambula vije vivakakumuna vandolome veni embwe. Mukavasambesavyo.

⁴ “Mu lifuti lije, kumukakala umo wa ali vanu veni akapwe kautu embwe, omwo Shukulu Kalunga Njambi yeni akamivezikisa mu lifuti lije lyakamyana,

⁵ nga mwononoka lika ku lijwi lya Shukulu Kalunga Njambi yeni nakunyunga mashiko oshe awa njinamishiki ku litangwa lya lelo.

⁶ Co Shukulu Kalunga Njambi yeni akamivezikisa ngwe mwamikulaesele. Mukakumwisa vimbongo vyavingi ku mafuti amangi, oloni yeni kesi mukakumuneko embwe. Mukashwana mafuti amangi, oloni vakevo kuvakamishwana embwe.

⁷ “Nga lifuti lije limukakala lyakamyana Shukulu Kalunga Njambi yeni, mukakala kavushoko keni kaIsalele akashaka kumukwasa, kesi mukavyane kumukwasa nambe kumuzivila cipululu embwe.

⁸ Oloni, mukakala na mema ku mbunge, co mukamukumwisa vije vyanajeneka.

⁹ Kesi mukavyane kumukumwisa cuma cimo embwe, omwo mwaka wakumanesa makongo uli muyehi, kesi mukatave viyongola vyavivi vikakovele mu vimbunge vyeni. Nga mukavyana kumwana likongo, co akatambeka kuli Shukulu Kalunga omwo yeni, co mukakala na mulonga.

¹⁰ Mukavane ngoco na mbunge imo, omwo a cuma eci Shukulu Kalunga Njambi yeni akamivezikisa mu vipangi vyeni vyoshe na mu vyuma vyoshe vimukalinga.

¹¹ Co njimishika ngwange mukakale na mema ku mbunge ali kautu, omwo mu lifuti kumwesi vaka-kuyanda na tuutu.

Muvanapande kupangesela vinzinda

¹² “Nga ndolome yove kaIsalele, wa munalume nambe wa munakazi, vamulandesa kuli yove ngeci apwe ndungo, napande akakupangele myaka itanu naumo. Co omo mwaka wamucitanu na ivali weta, ukamweca ngeci akaliile ngoco.

¹³ Omo mukamwecela kesi mukamwecele akaye mavoko-voko embwe.

¹⁴ Mukamwaneko ku vije vyanamivezikisa Shukulu Kalunga, vimanga, na vimbuto, na vinyu.

¹⁵ Mwanuke ngeci neni mwapwile mu vinzinda mu lifuti lya Ingito, co Shukulu Kalunga Njambi yeni wamikulile, mukemwo njinamishiki mashiko awa ku litangwa lya lelo.

¹⁶ “Oloni nga uje ndungo kashaka kuya, amo ikeye wamizema yeni na naanga yeni, co ikeye ashaka kutumbama omwo ali mwamuvwa.

¹⁷ Co mukamutwale ku cikolo ca njuvo yeni, mukanone mumba mukamutive ku litwi lyendi ngeci akapwe ndungo yeni wa ku myaka yoshe, co mukalinga ngacije lalo kuli ndungo yeni wa munakazi.

¹⁸ Kesi mukalinyenge omo mwecela vindungo veni ngoco, omwo vanamipangela myaka itanu na umo ngwe ku litambelo lya fweto ya ngamba wakupangesa. Mukalinga eci ngeci Shukulu Kalunga Njambi yeni akamivezikise mu vyoshe vije vimukalinga.

Vingombe na vimanga vakulivanga kusemuka

¹⁹ “Mukaangunwina Shukulu Kalunga Njambi yeni va nkomba voshe va vingombe na vimanga vakulivanga kusemuka, kesi mukapangese cimuna umo nambe kuteula vimanga ava embwe.

²⁰ A mwaka na mwaka yeni na naanga yeni mukalila situ ya vimuna ava ku mesho a Shukulu Kalunga ku mwela wakulemesela uje wanaangula Shukulu Kalunga Njambi yeni.

²¹ Oloni nga vimuna ava vakakala na kapenga, nambe vulema, nambe vupuputwa, nambe katengu kamo kakavi, co kesi mukavakombelele kuli Shukulu Kalunga Njambi yeni.

²² Mukalila situ ya vimuna va cifwa cangacije ku vinjuvo vyeni. Yeni voshe, nambe vaje vanajele nambe vaje kuvajelele, mukalya amo ngwe mumukali situ ya mbambi nambe ya mengo.

²³ Oloni kesi mukalye maninga avo, mukawetile asi ngwe mumuketila mema.