Kwituluka mu Mashiko 14 - Livulu lya Shukulu Kalunga

Kuvindika vingila vyakulilila vatsi

¹ “Yeni munapu mu vanu va Shukulu Kalunga Njambi yeni. Ngecivene, omo mukalila a kutsa, kesi mukalicate a mivila yeni nambe kuteula vin̄ambu vya kumukulo wa maholo eni embwe, ngwe muvakalingi vanu vamo.

² Omwo yeni mwapwa mu vanu va Shukulu Kalunga Njambi yeni, ikeye wamyangwile ngeci mupwe vanu vendi, akati ka miyati yoshe eyi yakala ano asi.

Tusitu vakujeneka kujela na ava vakujela

³ “Kesi mukalye cuma coshe cije canatumbula Shukulu Kalunga ngwendi ca vunyengwe.

⁴ Ava vakevo tusitu vamukalya, vingombe, na vimanga, na vimembe,

⁵ na vimbambi, na makunda, na vimengo.

⁶ Co tusitu voshe vaje vakutyangunuka vimbemba vaje vakalekula nakuseka, vaje mukasa kuvalya.

⁷ Oloni kesi mukalye tusitu voshe-ivoshe kuvanga vaje vakutyangunuka vimbemba, co lalo vakalekula, nakuseka. Oloni kesi mukalye tumelo, na tulumba, na masheha, vakevo kesi vakulya nameme vakalekula, nakuseka, oloni kuvatyangunukile vimbemba.

⁸ Kesi mukalye vingulu, omwo vakevo kesi vakujela embwe, vakevo vakutyangunuka vimbemba oloni kuvesi kulekula, nakuseka. Kesi mukalye tusitu vangacije nambe kukwata a mitunu yavo ya kutsa embwe.

⁹ “Mwasa kulya visi voshe vaje vali na matendo na mavanda.

¹⁰ Oloni cuma coshe-icoshe cakuyoya cije cili mu mema kucesi na matendo na mavanda kesi mukacilye, kucajelele.

¹¹ “Mukalya tuzila voshe vaje vakujela.

¹² Oloni kumwapandele kulya ava, vingonga, na mashelele, na tucuvwi,

¹³ na vyungu, na makuvi,

¹⁴ na makololo, na muyati wavo woshe,

¹⁵ na vainavilanda, na mimbi,

¹⁶ na makungulu, na muyati wavo woshe,

¹⁷ na mambondo, na maanda,

¹⁸ na tunyange-nyange, na mamenekela, na muyati wavo woshe, na vapekokeni, na vandimandima.

¹⁹ Tulongolo voshe vakatuuka mu vinjame vaje vakala na mambava kesi vakujela embwe, co kesi mukavalye.

²⁰ Vyuma vyoshe vyakujela vije vili na mambava munasa kulya.

²¹ “Kesi mukalye kasitu woshe-iwoshe wakulitsila embwe. Mwaneni kuli vaka-kwija vaje valinakukala akati keni, nambe kumulandesa kuli vaka-kwija veka, omwo yeni mwapwa mu vanu va Shukulu Kalunga Njambi yeni. “Kesi mukateleke muna membe mu mavele a vaina embwe.

Lishiko lya cavulikumi

²² “Mukaangununa cavulikumi ku vyoshe vije mukateja mu mahya eni a mwaka na mwaka.

²³ Co mukavilila ku mwela wakulemesela uje waangula Shukulu Kalunga Njambi yeni. Co kuje mukalya cavulikumi ca vimbuto vyeni, na vinyu, na mazi a olive, na vingombe veni vakulivanga kusemuka, na vimanga veni vakulivanga kusemuka. Mukalinga eci ngeci mukalilongese kusingimika Shukulu Kalunga Njambi yeni simbu yoshe.

²⁴ Nga mwela wakulemesela uje wanaangula Shukulu Kalunga uli kulyala manene na kwimbo lyeni, ngeci mutwaleko cavulikumi ku vije vyanamivezikisa Shukulu Kalunga, cooni mukalinga ngeci,

²⁵ mukalandesa vije vyamulikumi, co mukambata vimbongo nakuvitwala ku mwela wakulemesela uje wanaangula Shukulu Kalunga.

²⁶ Co mukalanda cuma coshe cimukashaka na vimbongo vije, nambe situ ya ngombe, nambe situ ya manga, nambe vinyu, nambe vyakunwa vyakulula, co mukavilila kuje ku mesho a Shukulu Kalunga Njambi yeni nakujolela, yeni na vavushoko vweni.

²⁷ “Kesi mukevale vaLevi vaje valinakukala mu vinganda vyeni, omwo vakevo kuvesi na mutambela nambe vushwana akati keni.

²⁸ Kukuhwa kwa mwaka na mwaka wamucitatu mukanena cavulikumi ca ku vimbuto vyeni vyoshe vya mwaka uje, co mukavitulika mu vishete vyeni.

²⁹ Vyakulya evi vinapu vya vaLevi, omwo vakevo kuvesi na mutambela nambe vushwana akati keni, na vaka-kwija, na visiwa, na vifwile, vaje valinakukala mu vinganda vyeni. Co vakevo vakaija nakwambata vyoshe vivanajeneka. Mukalinga eci, ngeci Shukulu Kalunga Njambi yeni akamivezikise mu vyuma vyoshe vimukapanga na mavoko eni.