Kwituluka mu Mashiko 13 - Livulu lya Shukulu Kalunga

¹ “Nga akati keni akasholoka muka-kwimanena, nambe muka-kunungulula vinjozi akamikulaesa vizivukiso nambe vikomokeso,

² ngeci amitwamenene kukulemesa nakupangela vinjambi vaje kumwalemesele laja. Nameme nga vije vyakendeka vikapwa vya vushunga,

³ kesi mukatolilile ku majwi endi. Omwo Shukulu Kalunga Njambi yeni alinakumupangesa nakumyeseka, kumona nga muzema Shukulu Kalunga Njambi yeni na vimbunge vyeni vyoshe, na mwonyo weni woshe.

⁴ Mukakavangeya Shukulu Kalunga Njambi yeni nakumukomoka, nakunyunga mashiko endi oshe, nakwononoka ku lijwi lyendi, co mukamupangela nakumukakateya.

⁵ Oloni mukatsiye muka-kunungulula vinjozi nambe muka-kwimanena, uje akamileka kutengulukila Shukulu Kalunga Njambi yeni, uje wamitundisile mu lifuti lya Ingito nakumipatula ku vunzinda. Munu wa cifwa cangacije akamitangula ku ngila ije yamishikile Shukulu Kalunga Njambi yeni kwendamo. Munapande kumutsiya, ngeci mukatundise vuvi vuje vuli akati keni.

⁶ “Nga ndolome yove, nambe munove wa munalume, nambe munove wa munakazi, nambe munakazi wove iwazema, nambe musamba wove wa a mbunge akushongangeya ngeci mulemese vinjambi veka, vaje yeni na vakukulwila veni kumwalemesele.

⁷ Umo wavo asa kumikokweya ngeci mulemese vinjambi va vanu vaje vanamizengeleka vaje vali muyehi neni, nambe vinjambi va vanu vaje vali kulyala neni.

⁸ Kesi mukamutave amisindiye nambe kumutolilila embwe. Kesi mukamutetele nambe kumuzivila mema ku mbunge embwe, co kesi mukamwamene embwe.

⁹ Oloni mukamutsiye. Pweni vakulivanga kumwasha mamanya, asinoni munu na munu akamwashe mamanya.

¹⁰ Mukamutsiye na mamanya omwo ikeye nesekele kumitundisa kuli Shukulu Kalunga Njambi yeni, uje wamitundisile ku Ingito, kuje mwakele mu vunzinda.

¹¹ Omo vanu va Isalele voshe vakaziva evi vinalingiwa, co vakakala na lyova, co naumo wai lalo akalinga vuvi vwa cifwa cangacije.

¹² “Omo mukakala mu membo eni aje akamyana Shukulu Kalunga Njambi yeni, co mukaziva lingwavo

¹³ ngeci kuli vanalume vamo vitangwizi va ku muyati weni, vanatangula laja vanu va mu limbo lyavo kulemesa vinjambi vaje kumwalemesele laja.

¹⁴ Co nga mukaziva lingwavo lyangacije, munapande kwilula nga ikeyo inapu n̄anda ya vushunga, cuma cangacije ca vunyengwe cinalingiwa akati keni,

¹⁵ co tsiyeni vanu voshe vakala muje mu nganda na vingombe vavo voshe.

¹⁶ Ngecivene, mukakungulwila vivala vyavo vyoshe mukati ka nganda, co mukenyeka ije nganda na vyoshe vilimo kupwa n̄ombelo kuli Shukulu Kalunga Njambi yeni. Co ije nganda ikapwe ngundu ku myaka yoshe. Naumo wai akaitungulula lalo.

¹⁷ Kesi mukambateko cuma cimo ku vije vivasompelele kunyonga, asinoni Shukulu Kalunga akatenguluka ku vukalu vwendi nakumizivila mema ku mbunge, co akamitumisa ngwe mwalisingile na vakukulwila veni,

¹⁸ nga mukononoka ku lijwi lya Shukulu Kalunga Njambi yeni nakunyunga mashiko endi oshe awa njinamishiki ku litangwa lya lelo, nakulinga vije vyashaka.