Kwituluka mu Mashiko 12 - Livulu lya Shukulu Kalunga

Mwela umolika wakulemesela

¹ “Awa akewo mashiko na vilongesa vije vimukononoka mu lifuti lije lyanamyana Shukulu Kalunga, Njambi ya vakukulwila veni. Munapande kuwononoka matangwa oshe akuyoya kweni ano asi.

² Mu lifuti lije limukashwana mukanyongesa myela yoshe ije vakalemesela vanu vinjambi vavo a minkinda, na a malundu, na mu minzinze ya miti.

³ Co mukasiwula mitula yavo nakupujula vimanda vyavo vya mamanya, nakwenyeka viti vyakulemesela Ashela njambi yavo wa munakazi, nakupokozola tumponya twakushonga twa vinjambi vavo, nakuzimangana lizina lyavo mu myela ije yakulemesela.

⁴ “Kesi mukalemese Shukulu Kalunga Njambi yeni mu ngila eyi ivalinakulemesa nayo vanu ava vinjambi vavo.

⁵ Oloni mukashakezeka mwela uje wakaangula Shukulu Kalunga Njambi yeni akati ka miyati yeni, kuje vanu vakaija ku mesho endi nakumulemesa.

⁶ Yeni mukatwala vin̄ombelo vyeni kuje vya kwenyeka, na vin̄ombelo vikwavo, co mukaana cavulikumi, na mulambu uje mulinakwana, na vin̄ombelo vyeni vya cikulaeso kuli Shukulu Kalunga, na vin̄ombelo vyeni vya cizango, na va ntwatwa va ku vutanga vwa vi muna veni.

⁷ Yeni na naanga yeni mukalya nakujolela mu vyoshe vimukalinga ku mesho a Shukulu Kalunga Njambi yeni uje namivezikisa.

⁸ “Kesi mukalinge ngwe mumunakala nakulinga muno ku litangwa lya lelo embwe, munu na munu nakala nakulinga mwoshe mwanashakela.

⁹ Omwo kanda mucikovele nakushwana lifuti lije lyalinakumyana Shukulu Kalunga Njambi yeni ngeci mukahwime nakuyoya mu kwoloka.

¹⁰ Oloni omo mukajavuka Ndonga ya Yondau, mukakala mu lifuti lije lyanamyana Shukulu Kalunga Njambi yeni nakulishwana, co mukahwima ku vitozi veni voshe vaje vamizengeleka, co mukakala mu kwoloka.

¹¹ Asinoni Shukulu Kalunga Njambi yeni akaangula mwela umo kuje kumukamulemesela, co kuje vene mukatwala vyuma vyoshe vije vinjinamishiki, vin̄ombelo vyeni vya kwenyeka, na vin̄ombelo vyeni vikwavo, na cavulikumi, na mulambu uje mulinakwana, na vin̄ombelo vyeni vyoshe vya cikulaeso vije mulinakulikulaesa navyo kuli Shukulu Kalunga.

¹² Co mukajolela ku mesho a Shukulu Kalunga Njambi yeni, yeni na vana veni va vanalume, na ava va vanakazi, na vangamba veni va vanalume, na ava va vanakazi, na vaLevi vaje vali mu vinganda vyeni omwo vakevo kuvesi na mutambela nambe vushwana akati keni.

¹³ Mukanyanyama kesi mukakombelele vin̄ombelo vyeni vya kwenyeka ku mwela woshe-iwoshe mumona.

¹⁴ Oloni kuvanga lika ku mwela uje wakaangula Shukulu Kalunga ku muyati umo a miyati yeni, kukekwo lika kumukakombelela vin̄ombelo vyeni vya kwenyeka. Co kukekwo lalo kumukalingila vyoshe vije vinjilinakumishika.

¹⁵ “Oloni yeni munasa kutsiya nakulya situ ya vimuna veni kwoshe kuje kumukakala. Co munasa kulya yaingi ngwe mwanamivezikisilayo Shukulu Kalunga Njambi yeni. Yeni voshe, nambe munu uje najele, nambe uje kajelele mwasa kulya, ngwe munu mwakali vene situ ya mbambi nambe ya mengo.

¹⁶ Oloni kesi mukalye maninga avo embwe, munapande kuwetila asi ngwe mumuketila mema.

¹⁷ Co nacimo cai cije cimukaana kuli Shukulu Kalunga cimukalila mu mitambela mumuli nakukala embwe, nambe cavulikumi ku vimbuto vyeni, nambe ku vinyu vyeni vyaviha, nambe ku mazi eni a olive, nambe ku va ntwatwa va vimuna veni, nambe vin̄ombelo vyeni vya cikulaeso vije mulinakulikulaesa kuli Shukulu Kalunga, nambe vin̄ombelo vyeni vya cizango, nambe milambu ikwavo lalo.

¹⁸ Oloni evi mukavilila ku mesho a Shukulu Kalunga Njambi yeni, ku mwela uje wakaangula Shukulu Kalunga Njambi yeni kumulemesela, yeni na vana veni va vanalume, na ava va vanakazi, na vangamba veni va vanalume na ava va vanakazi, na vaLevi vaje valinakuyoyela mu vinganda vyeni. Co mukajolela ku mesho a Shukulu Kalunga Njambi yeni a vyuma vyoshe vije vimukalinga.

¹⁹ Ngecivene, nyanyameni kesi mukevale vaLevi simbu yoshe ije mukakala mu lifuti lyeni.

²⁰ “Omo Shukulu Kalunga Njambi yeni akaamesa lifuti lyeni, ngwe muje wamikulaesele, co mukalya situ oshe aje amushakela kuyilila.

²¹ Nga mwela uje wakaangula Shukulu Kalunga Njambi yeni kumulemeselamo uli kulyala manene, co oshe aje amushakela, mwasa kutsiya ngombe nambe manga uje yanamyana Shukulu Kalunga, co mukalila ije situ kwimbo, ngwe muje njamishikile.

²² Munu woshe uje najele nambe kajelele, asa kulya ku situ eyi, ngwe muje mwakali vene situ ya mbambi nambe ya mengo.

²³ Oloni kesi mukalye situ na maninga ayo, omwo mwonyo wakala mu maninga, co yeni kumwapandele kulila kumo mwonyo na situ.

²⁴ Kesi mukalye maninga embwe, oloni mukawetile asi ngwe mumuketila mema.

²⁵ Nga mwononoka lishiko eli, co Shukulu Kalunga akavwaelela, co mukakala mwamuvwa yeni na vatekulwila veni.

²⁶ Twaleni vin̄ombelo vyeni ku mwela umolika wakulemesela, na mulambu weni wa cikulaeso uje munalikulaesa nawo kuli Shukulu Kalunga.

²⁷ Co mukakombelela vin̄ombelo vyeni vya kwenyeka, na situ na maninga, a mutula wa Shukulu Kalunga Njambi yeni. Maninga a vin̄ombelo vyeni mukawetila kumukulo wa mutula wa Shukulu Kalunga Njambi yeni. Co mukalya situ.

²⁸ Nyanyameni nakwononoka vyuma vyoshe vije vinjinamishiki ngeci mukavezike, yeni na vana veni, na vatekulwila veni ku myaka yoshe, omwo mukalinga vyavivwa na vije vikavwaelesa Shukulu Kalunga Njambi yeni.

Mosesa anangula akulemesa vinjambi veka

²⁹ “Omo Shukulu Kalunga Njambi yeni akanyongesa miyati ije ili kulutwe lweni kuje kumulinakuya nakukovela mu lifuti lyavo ngeci mukatungemo.

³⁰ Omo Shukulu Kalunga nanyongesa laja miyati eyi, ngecivene, yeni kumwapandele kukavangeya vilinga vya vinjambi vavo, mukapwa vaka-kuvindama. Co kesi mukeseke kwihula nakuwana mu ngila mukajo vakalemesela vinjambi vavo, ngeci neni lalo mukavatembunwine embwe.

³¹ Kesi mukalemese Shukulu Kalunga Njambi yeni mu cifwa cije vakalemesa naco vinjambi vavo embwe. Omwo valemesa vinjambi vavo, vakalingi vyuma vya vunyengwe vije vyazinda Shukulu Kalunga. Vakevo vakakombelela mu tuhya kuli vinjambi vavo nameme vana vavo va vanalume nambe vana vavo va vanakazi.

³² “Vyuma vyoshe vije vinjinamishiki mukavilinga nakunyanyama. Kesi mukawezeleleko cuma cimo nambe kutundisako cuma cimo embwe.