Kwituluka mu Mashiko 11 - Livulu lya Shukulu Kalunga

Vukama vwa Shukulu Kalunga

¹ “Ngecivene, mukazema Shukulu Kalunga Njambi yeni, nakunyunga kushika kwendi, na vizilika vyendi, na vilongesa vyendi, na mashiko endi simbu yoshe.

² Anukeni litangwa lya lelo muje mwamilongesele Shukulu Kalunga a vyuma vije mwalimwenenene yeni vavenya na mesho eni. Kesi vana veni vavimwene embwe, oloni yeni vene mwamwene vukama vwa Shukulu Kalunga, na livoko lyendi lya nzili, na livoko lyendi lya kwolola,

³ na vizivukiso vyendi na vikomokeso vyendi, vije vyalingile kuli mwene wa Ingito, na lifuti lyendi lyoshe.

⁴ Mwamwene vati Shukulu Kalunga mwanyongesele mashwalale va nzita ya mu Ingito, amo na tuvalu twavo, na matemba avo, omo mema a Lishali Lyakuvenga avakupwile omo vakele nakumikava.

⁵ Mwazivuka vije vyalingile Shukulu Kalunga kuli yeni mu mambo omo yeni te kanda mwete kuno.

⁶ Anukeni vije vyalingiwile kuli Ndatane, na Avilame, vana va Elyave va ku muyati wa Luvena. Co ku mesho a vanu va Isalele voshe livu lyeshamene nakuvaleula, amolika na naanga yavo, na vimbalaka vyavo, na vangamba vavo voshe, na vimuna vavo.

⁷ Mukemwo vene, yeni vavenya mwalimwenenene vyuma vyoshe vyakama vije vyalingile Shukulu Kalunga.

Vivezikiso vije vikasholoka mu lifuti lya cikulaeso

⁸ “Ngecivene, mukononoka mashiko oshe awa njilinakumishikawo ku litangwa lya lelo, ngeci mukase kujavuka Ndonga ya Yondau nakushwana lifuti lije mushaka kukovela.

⁹ Ngecivene, mukakale simbu yakama mu lifuti lije lyakulaesele Shukulu Kalunga vakukulwila veni kulyana kuli vatekulwila vavo, lifuti lyalivwa nevi vyakujenekamo vyai.

¹⁰ Lifuti lije mumuli nakuya nakulishwana kulyafwile ngeci mwa lifuti lya Ingito embwe, kuje kumwakele akulivanga. Akukuna vimbuto vyeni, kuvanga kupanga manene nakuvitilila mema ngwe munu etilila mema mu citungu ca visapa-sapa.

¹¹ Oloni lifuti lije mumuli nakuya lyapwa lifuti lya minkinda na vyana, lifuti lyajula na mema a nyonzi.

¹² Shukulu Kalunga Njambi yeni ikeye wanyunga lifuti lije. Simbu yoshe mesho endi ali a lifuti lije kutunda kukushangumuka kwa mwaka nakweta kukuhwa kwawo.

¹³ “Ngecivene, mukononoka mashiko ange awa anjilinakumishika ku litangwa lya lelo. Mukazema Shukulu Kalunga Njambi yeni nakumupangela na vimbunge vyeni vyoshe, na mwonyo weni woshe.

¹⁴ Nga mulingamo, co akanyokesa nyonzi mu lifuti lyeni a simbu yayo, nyonzi ya musanda na ya likuvula-shoke, ngeci mukateje vimbuto vyeni, co mukakala na vinyu vyaviha, na mazi a olive.

¹⁵ Co ikeye akamenesa mwila wakulya vingombe veni. Co yeni mukakala na vyakulya vyavingi.

¹⁶ Nyanyameni kutewa vimbunge vyeni vikongumukila kweka kutunda kuli Shukulu Kalunga mukulemesa nakupangela vinjambi veka.

¹⁷ Nga mukalingamo, co mukashambeya vukalu vwa Shukulu Kalunga. Co akashoka melu, nyonzi kuyikanyoko, livu likominina ngo, na vimbuto kuvikasa kumena. Co vwasi-vwasi mukanyonga, nameme likelyo linapu lifuti lyalivwa lije lyanamyana Shukulu Kalunga.

¹⁸ “Ngecivene, mukanyunga majwi ange awa mu vimbunge vyeni na mu mwonyo weni. Mukaakutiiya a mavoko eni, nakuwazala a maholo eni kupwa canukiso.

¹⁹ Mukaalongesa kuli vana veni, nakuwasimutwiya kuli vakevo omo muli mu vinjuvo vyeni, nambe omo mulinakwenda mu ngila, nambe omo mulinakuhwima, nambe omo mulinakupanga.

²⁰ Mukawasoneka a vipamba vya vikolo vya vinjuvo vyeni na a vi kolo vyeni.

²¹ Co yeni na vana veni mukayoya simbu yakama mu lifuti lije Shukulu Kalunga Njambi yeni walikulaesele kulyana kuli vakukulwila veni. Co mukayoya myaka yoshe muje ngwe omo lilu lyakala akamwa ya asi.

²² “Nga mukolesa nakunyunga mashiko oshe awa anjinamishiki, nakuzema Shukulu Kalunga Njambi yeni, nakwenda mu vingila vyendi vyoshe, nakukakateya kuli ikeye,

²³ asinoni ikeye akasheka miyati yoshe ku mesho eni, co mukafungulula miyati ije yakama na nzili kutuvakana yeni.

²⁴ A livu lyoshe aje mukalyata likapwa lyeni. Co lifuti lyeni likaama kutunda ku mambo ya mu mbwela nakweta ku kunto ku Minkinda ya Lembanone, nakutunda ku Ndonga ya Yufuleti mu ngangela nakweta ku Lishali lya Menditelenyani mu kangombe ka yambi.

²⁵ Naumo wai akemana kulutwe lweni. Shukulu Kalunga Njambi yeni akavazivisa lyova lyakumijujwa, ngwe muje mwamikulaesele, wai akamivindika.

²⁶ “Litangwa lya lelo njimyana vyuma vivali, civezikiso na cisingo ngeci mwangule.

²⁷ Mukavezika nga mwononoka mashiko a Shukulu Kalunga Njambi yeni, awa anjilinakumishika ku litangwa lya lelo.

²⁸ Oloni vakamisinga, nga kumwononoka mashiko a Shukulu Kalunga Njambi yeni, nakutengulukila kweka nakulemesa vinjambi veka vaje kumwalemesele laja.

²⁹ Omo Shukulu Kalunga Njambi yeni namikovelesa mu lifuti lije limukashwana, mukambulula vivezikiso a Munkinda wa Ngelizime, na cisingo a Munkinda wa EVaLe

³⁰ Eyi minkinda ivali yakala mu kangombe ka yambi ku Ndonga ya Yondau mu lifuti lya vaKanana vaje vakala mu Cana ca Yondau. Minkinda eyi ivali yakala kuyehi na miti yakujela ya ku Mole yalishungama na Ngilingale.

³¹ Ololo muli kuyehi nakujavuka Ndonga ya Yondau nakushwana lifuti lije lyanamyana Shukulu Kalunga Njambi yeni. Co omo munalishwana mukakalamo.

³² Mukanyanyama nakwononoka mashiko na vilongesa vyoshe vije vinjinamyana ku litangwa lya lelo.