Kutuuka 9 - Livulu lya Shukulu Kalunga

Cikomokeso camucitanu ca kutsa tusitu

¹ Asinoni Shukulu Kalunga wendekele kuli Mosesa ngwendi, “Ya kuli mwene ukamuleke ngwove Shukulu Kalunga, Njambi ya vaHevelu nendeka ngwendi, ‘Ecela vanu vange vaye ngeci vakanjilemese.

² Nga uvyana lalo kuvecela ngeci vaye, anga ucivakakateya,

³ co njikakutumina cihiso ca mushongo wakukomokesa a vimuna vove voshe, naa tuvalu twove, naa vimulu vyove, naa tumelo vove, naa vingombe vove, naa vimanga vove, naa vimembe vove.

⁴ Oloni njikaangununa akati ka vimuna va vaIsalele na vaje va vaka-Ingito, ngeci cimuna naumo wai wa vaIsalele akatsa.

⁵ Yange Kalunga, njinemika simbu ngeci imene kukalingiwa cuma eci mu lifuti.’ ”

⁶ Alikaki Shukulu Kalunga walingile ngwe muje mwendekele, co vimuna voshe va vaka-Ingito vatsile, oloni cimuna naumo wai wa vaIsalele watsile.

⁷ Mwene watumine vanu mukwihwisisa vika vyalingiwa, co vamulekele ngeci naumo wai cimuna wa vaIsalele natsi. Oloni mwene wakaluwisile manene mbunge yendi, co katavele ngeci vanu vaye.

Cikomokeso camucitanu na cimo ca mazimbo

⁸ Asinoni Shukulu Kalunga wendekele kuli Mosesa na Alone ngwendi, “Jomoneni mavoko akushula a lito lya mu lutengo, ngeci Mosesa akalikuve mwilu ku mesho a mwene.

⁹ Likelyo likashandokela mu lifuti lya Ingito mwoshe, co kwoshe-ikwoshe kulikapekumukila likatuwisa mazimbo akapwa vimbandu ali vanu naa tusitu.”

¹⁰ Ngecivene, vambatele lito lya mu lutengo vakemanene ku mesho a mwene, co Mosesa walikuvile mwilu, asinoni lyasholwele mazimbo aje emukile vimbandu ali vanu naa tusitu.

¹¹ Co vaka-manseno kuvasele kwimana ku mesho a Mosesa omwo mazimbo akele ali vakevo na ali vaka-Ingito voshe.

¹² Oloni Shukulu Kalunga wakaluwisile mbunge ya mwene, ngwe vene muje mwendekele Shukulu Kalunga, mwene katolililile kuli Mosesa na Alone.

Cikomokeso camucitanu na vivali ca nyonzi ya mamanya

¹³ Asinoni Shukulu Kalunga wendekele kuli Mosesa ngwendi, “Meneka mutondo-tondo ukaliwane na mwene ukamuleke ngwove Shukulu Kalunga Njambi ya vaHevelu nendeka ngwendi, ‘Ecela vanu vange vaye, ngeci vakanjilemese.

¹⁴ A simbu ino njikatuma mishongo yakukomokesa ali yove, na ali vamyata vove na ali vanu vove, ngeci ukazivuka ngwove kukwesi weka lalo wakufwa ngwe yange muno mu kaye mwoshe.

¹⁵ Nga njajundwile livoko lyange nakukupupa yove na vanu vove na mushongo wa ciita, nga wanyonga laja.

¹⁶ Oloni akukumwesa nzili yange, njakutavele kuyoya ngeci lizina lyange likatsimane mu kaye mwoshe.

¹⁷ Nameme ngoco anga ucilyalesa nakuvyana kwecela vanu vange vaye.

¹⁸ Ngecivene, imene a simbu ino vene njikanyokesa nyonzi yakama ya mamanya, ije kutunda ku visimbu vyalaja kuvaimwene mu Ingito nakweta ku lelo.

¹⁹ Co ololo shika a vimuna vove na vyuma vyoshe vili anja muvyengeke mu vinjuvo vyeni, omwo nyonzi ya mamanya ikanyokela a vanu naa tusitu vaje vakakala anja vakujeneka kukongweya, co voshe vakatsa.’ ”

²⁰ Vaje vamyata va mwene vakele na lyova a vije vyendekele Shukulu Kalunga, vakovelesele vindungo vavo na vimuna vavo mu vinjuvo.

²¹ Oloni vaje kuvombileko mbunge kukunangula kwa Shukulu Kalunga, vasezele vindungo vavo na vimuna vavo mushandangala yangoco.

²² Asinoni Shukulu Kalunga wendekele kuli Mosesa ngwendi, “Jundula livoko lyove ulinike mwilu, co nyonzi ya mamanya ikanyokela mu lifuti lyoshe lya Ingito, ali vanu, naa vimuna, naa vimbuto vyoshe vili mu mahya.”

²³ Omo Mosesa wajundwile mulamu wendi mwilu, co Shukulu Kalunga watumine cililimo ca nyonzi ya mamanya, co ije mihyato yahyahyatele asi oshe. Ngecivene, Shukulu Kalunga wanyokesele nyonzi ya mamanya mu Ingito mwoshe.

²⁴ Shukulu Kalunga watumine lisindu-mbowe lya nyonzi ya mamanya, na mihyato yahyahyatele noku-noku. Lyapwile lisindu-mbowe lyakama manene lije kutunda ku visimbu vyalaja kuvalimwene mu Ingito nakweta na lelo.

²⁵ Co mu Ingito mwoshe nyonzi ya mamanya yatikile vyuma vyoshe vije vyakele mushandangala yangoco, amo na vanu na vimuna. Co yatikile vyakumena vyoshe vya mu mahya, nakupokozola miti yoshe.

²⁶ Oloni mu lifuti lya Ngoshene, muje mwakele vaIsalele, mukemwo lika mwasalele kumwanyokele nyonzi ya mamanya.

²⁷ Asinoni mwene wasanene Mosesa na Alone wendekele kuli vakevo ngwendi, “A simbu ino njinalingi vuvi, Shukulu Kalunga nalingi mwamuvwa, co yange na vanu vange tunaviisa.

²⁸ Lombeleni kuli Shukulu Kalunga omwo tunapwisamo a cililimo na nyonzi ya mamanya! Njikamitava ngeci muye, kumukakala lalo muno.”

²⁹ Co Mosesa wendekele kuli ikeye ngwendi, “Omo yange njicituuka lika muno mu nganda, njikajundula mavoko ange nakulomba kuli Shukulu Kalunga. Co cililimo cikalikela, nyonzi ya mamanya kuyikanyoko lalo, ngecivene, ukazivuke ngwove kuma kaye kapwa ka Shukulu Kalunga.

³⁰ Oloni njazivuka ngwange yove na vamyata vyove anga kumukakomoka Shukulu Kalunga Njambi.”

³¹ Vwanda na mbale ya maumwa vyaviile, omwo mbale yakele muyehi nakuhya, co vwanda vwakele na matindi,

³² oloni tiliku kuyaviile, omwo ikeyo te kanda icihye.

³³ Asinoni Mosesa wasezele mwene, watuukile mu nganda, wajundwile mavoko endi mukulombela kuli Shukulu Kalunga. Co cililimo, na nyonzi ya mamanya, vyoshe vyalikelele, co nyonzi kuyanyokele.

³⁴ Omo mwene wamwene ngeci nyonzi na cililimo vinalikela, co walingile lalo vuvi. Ikeye na vamyata vendi vacikaluwisile vimbunge vyavo ngwe vene simbu yoshe,

³⁵ ngwe vene muje mwendekele Shukulu Kalunga ali Mosesa, mwene kavatavesele vaIsalele kuya.