Kutuuka 6 - Livulu lya Shukulu Kalunga

¹ Asinoni Shukulu Kalunga wendekele kuli Mosesa ngwendi, “Ololo oni ukamona vinjikalinga kuli mwene, omwo njikamusindiya ecele vanu vange vaye. Njikamusindiya ngeci akavasheke mu lifuti lyendi.”

Njambi asana Mosesa

² Njambi wendekele kuli Mosesa wamulekele ngwendi, “Yange njapwa Kalunga.

³ Yange njalisholwele kuli Avilahama, na kuli Isake, na kuli Yakomba, ngwe Njambi Muka-nzili yoshe, oloni lizina lyange lya Kalunga kuvalizivukile.

⁴ Co lalo njalikumiiye navo cikumiiyo cange, njavakulaesele kuvana lifuti lya Kanana, mu lifuti muje muvakele omo vapwile vangenzi.

⁵ Co ololo njinazivi kukemanga kwa vaIsalele, ava vanafukiwa mu vundungo kuli vaka-Ingito, ngeci njinanuka cikumiiyo cange.

⁶ Ngecivene, leka vaIsalele ngwove, ‘Yange njapwa Kalunga, njikamipatula mu vundungo vweni kuli vaka-Ingito. Njikajundula livoko lyange lya nzili mukusholola cihiso cakukomokesa ali vakevo, oloni yeni njikamikula.

⁷ Njikamipwisa vanu vange, co njikapwa Njambi yeni. Asinoni mukazivuka ngeci yange njapwa Kalunga, Njambi yeni uje wamipatwile mu vundungo mu Ingito.

⁸ Co njikamitwala mu lifuti lije njakulaesele kulyana kuli Avilahama, na Isake, na Yakomba, co njikalyana kuli yeni kupwa vushwana vweni. Yange njapwa Kalunga.’ ”

⁹ Co Mosesa walekele vyuma evi kuli vaIsalele, oloni kuvamutolililile, omwo vimbunge vyavo vyazeyele akufukiwa mu vundungo vwavukalu ngacije.

¹⁰ Asinoni Shukulu Kalunga wendekele kuli Mosesa ngwendi,

¹¹ “Ya ukaleke mwene wa Ingito ngeci napande kwecela vaIsalele vatunde mu lifuti lyendi.”

¹² Oloni Mosesa wakumbulwile Shukulu Kalunga ngwendi, “Kenga vanu va Isalele kuvanjitolililile, co vatijo mwene akatolilila yange muka-cikukuma?”

¹³ Co Shukulu Kalunga washikile Mosesa na Alone ngwendi, “Lekeni vaIsalele na mwene wa Ingito ngweni yange njinakushiki kutwamenena vaIsalele nakuvatundisa mu Ingito.”

Naanga ya Mosesa na Alone

¹⁴ Luvena, ikeye ntwatwa ya Yakomba, wakele na vana vendi vawana va vanalume, mazina avo, Hanoki, na Palu, na Hezelone, na Kalemi. Ava vakevo vapwile vakukulwila va vikota vaje valilukile mazina avo.

¹⁵ Simyoni wakele na vana vendi vatanu naumo va vanalume, mazina avo, Njemwele, na Njamine, na Ohande, na Njakine, na Zohale, na Shaulu muna munakazi wa ku Kanana. Ava vakevo vapwile vakukulwila va vikota vaje valilukile mazina avo.

¹⁶ Levi wakele na vana vendi vatatu va vanalume, mazina avo, Ngeleshone, na Kohate, na Melali. Ava vakevo vapwile vakukulwila va vikota vaje valilukile mazina avo. Levi wayoyele myaka 137.

¹⁷ Ngeleshone wakele na vana vendi vavali va vanalume, Limbeni, na Shimei, co vakele na vatekulwila vavangi.

¹⁸ Kohate wakele na vana vendi vawana va vanalume, mazina avo, Amelame, na Izehale, na Hevelone, na Uziyele. Kohate wayoyele myaka 133.

¹⁹ Melali wakele na vana vendi vavali va vanalume, mazina avo, Maheli na Mushi. Eci cikeco cikota ca Levi ngwe ku vatekulwila vavo.

²⁰ Amelame wambatele vaten̄azi yendi Njokevende, uje wakitile Alone, na Mosesa, co Amelame wayoyele myaka 137.

²¹ Izehale wakele na vana vendi vatatu va vanalume, mazina avo, Kola, na Nefenge, na Zikeli.

²² Uziyele lalo wakele na vana vendi vatatu va vanalume, mazina avo, Mishaele, na Elezafane, na Siteli.

²³ Alone wambatele Elishemba muna Aminandave ndokazi ya Naheshone, co ikeye wakitile Nandave, na Avihu, na Elyazale, na Itamale.

²⁴ Kola wakele na vana vendi vatatu va vanalume, mazina avo, Asile, na Elekana, na Aviyasafe. Ava vakevo vakukulwila va vimunga vya vikota vya Kola.

²⁵ Elyazale muna Alone wambatele umo wa ku vana va Putiyele va vanakazi, co wakitilileko Finehase. Ava vakevo vakulunu va naanga ya Levi ngwe ku cikota na cikota cavo.

²⁶ Vakevo vene va Alone na Mosesa vaje Shukulu Kalunga wendekele navo ngwendi, “Tundiseni vanu va Isalele mu Ingito.”

²⁷ Vakevo vanalume vaje valekele mwene wa Ingito ngeci ecele vaIsalele.

Kushika kwa Shukulu Kalunga kuli Mosesa na Alone

²⁸ Shukulu Kalunga wendekele kuli Mosesa mu lifuti lya Ingito,

²⁹ wendekele kuli ikeye ngwendi, “Yange njapwa Kalunga. Leka mwene wa Ingito vyuma vyoshe vije vinjinakuleke.”

³⁰ Oloni Mosesa wakumbulwile Shukulu Kalunga ngwendi, “Kenga, yange nji muka-cikukuma, co mwene akanjitolilila vatijo?”