Kutuuka 5 - Livulu lya Shukulu Kalunga

Mosesa na Alone ku mesho a mwene wa Ingito

¹ Asinoni Mosesa na Alone vaile kuli mwene wa Ingito vendekele ngwavo, “Shukulu Kalunga, Njambi ya Isalele, nendeka ngwendi, ‘Ecela vanu vange vaye mu mambo, ngeci vakanjilingile ciwano cakunjilemesa.’ ”

² Oloni mwene wavakumbulwile ngwendi, “Shukulu Kalunga ikeye iyajo owo njimutolilile, ngeci njitave vaIsalele kuya? Yange kunjimuzivuka owo Shukulu Kalunga, co kunjitava ngeci vaIsalele vaye.”

³ Ngecivene, Mosesa na Alone vamukumbulwile ngwavo, “Njambi ya vaHevelu ikeye nalisholwele kuli yetu. Co tutave kuya mu mambo tukenda matangwa atatu, tukakombelele Shukulu Kalunga Njambi yetu. Nga kutuyi, co akatutsiya na mushongo nambe na moko ya mukwale.”

⁴ Oloni mwene wa Ingito wendekele kuli Mosesa na Alone ngwendi, “Omwo vikajo mutundisa vanu ku vipangi vyavo? Ilukeni ku vipangi vyeni!”

⁵ Mwene wendekele ngwendi, “Yeni vanu munakiti manene kutuvakana vaka-Ingito. Co ololo mushaka kulikela kupanga!”

⁶ A litangwa lije vene, mwene washikile vaka-Ingito vaka-kupangesa vaje vindungo, na vantwama va vaIsalele vaka-kwendesa vipangi ngwendi,

⁷ “Kesi mukavane lalo mwila wakupangesa vindopi ngeci mwalaja, veceleni vakaliwanenewo vakevo vavenya.

⁸ Oloni nameme ngoco kushakiwa vuje vene vungi vwa vindopi ngwe vuje vwalaja, kesi kutundisako ndopi imo embwe. Vali na vulwa kuvesi nakupanga vipangi vyakupwisamo ngeci valinakunjilomba simbu yoshe njivatave vaye nakukakombelela kuli Njambi yavo!

⁹ Ava vanu vapangeseni manene na nzili, ngeci vaungame na vipangi, kesi vatolilile ku vin̄anda vya makuli angoco.”

¹⁰ Asinoni vaje vaka-kupangesa vindungo na vantwama va vaIsalele vaka-kwendesa vipangi vaile nakwendeka kuli vaIsalele ngwavo, “Mwene nendeka ngwendi kesi tukamyane lalo mwila.

¹¹ Ikeye nendeka ngwendi yeni nakuliwanena mwila yeni vavenya kwoshe oko mukauwanena, oloni anga mucilinga vungi vwa vindopi ngwe vene muje mwalaja.”

¹² Ngecivene, vanu vaile nakushakezeka vishoni mu Ingito mwoshe kupwisa ngwe mwila.

¹³ Co vaje vaka-kuvapangesa vavasindiiye ngwavo, “A litangwa naa litangwa munapande kulinga vungi vwa vindopi ngwe vuje mwakele nakulinga laja omo vakele nakumyana mwila.”

¹⁴ Co vaje vaka-Ingito vaka-kupangesa vindungo vapupile vantwama va vaIsalele, vaje vavapwisile vantwama va vipangi. Vavehwile ngwavo, “Omwo vikajo kumwalingile vungi vwa vindopi ngwe mumwalingile laja?”

¹⁵ Co vantwama va vaIsalele va vipangi vaile kuli mwene nakumwihula ngwavo, “Omwo vikajo ulinakutupangesela ngeci?

¹⁶ Kuvesi nakutwana mwila, oloni nameme ngoco vacili nakutushika kulinga vindopi! Valinakutupupanga, oloni mulonga unapu wa vanu vove.”

¹⁷ Co mwene wavakumbulwile ngwendi, “Yeni mu volwa kumushaka lika kupanga, ngeci mulinakunjilomba ngweni njimitave muye nakukombelela kuli Shukulu Kalunga.

¹⁸ Ngecivene, ilukeni ku vipangi vyeni! Omwo naumo wai akamyana mwila, oloni munapande kulinga vungi vwa vindopi ngwe vene vuje vwalaja.”

¹⁹ Co vaje vantwama va vaIsalele va vipangi vamwene ngeci vali mu vukalu, omwo vavalekele ngwavo, “Kesi mutepulule ku vungi vwa vindopi vije mwakele nakulinga a litangwa na litangwa.”

²⁰ Omo vatundile kuli mwene, valiwanene na Mosesa na Alone, vakele nakuvavandamena.

²¹ Vendekele kuli Mosesa na Alone ngwavo, “Shukulu Kalunga amone vimunalingi, co amihise omwo munatuzindisa kuli mwene na vantwama vendi. Yeni munavana moko yakututsiisa.”

Kulinyenga kwa Mosesa kuli Shukulu Kalunga

²² Asinoni Mosesa welukilile lalo kuli Shukulu Kalunga wendekele nendi ngwendi, “Yove Shukulu Kalunga, vikajo uyandesela vanu vove ngacije? Omwo vikajo wanjituminine kuno?

²³ Tunde aje njaililile kuli mwene nakwendeka mu lizina lyove, co aje vene ikeye washangumukile kuyandesa manene vanu vove. Co yove nacimo cai ciwunalingi cakuvakwasa!”