Kutuuka 40 - Livulu lya Shukulu Kalunga

Kushimbika nakukundika Mbalaka Mwakuliwanena

¹ Shukulu Kalunga wendekele kuli Mosesa ngwendi,

² “A litangwa lyakulivanga ku ngonde yakulivanga, shimbika Mbalaka Mwakuliwanena.

³ Akamo Cikasa ca Cikumiiyo muje muli Mashiko Likumi, co fwikako livamba kulutwe lwaco.

⁴ Kovelesamo mesa, akao vivala vyayo, asinoni kovelesamo citumbikilo ca vindeya nakwimikao vindeya.

⁵ Aka mutula wa ngolinde wakwenyekela insense yakunika lwengo lwaluvwa kulutwe lwa Cikasa ca Cikumiiyo, co shukika livamba ku cikolo ca Mbalaka.

⁶ Co aka mutula wa milambu ya kwenyeka kulutwe lwa Mbalaka.

⁷ Aka mbashiya yakujwelela akati ka Mbalaka na mutula, ishulise mema.

⁸ Tungilako cipango cakuzengulwisa Mbalaka nakushukikako livamba ku cikolo.

⁹ “Asinoni vwavesa Mbalaka na vivala vyayo vyoshe na mazi akuvwava nakuvikundika ngeci vipwe vyakujela.

¹⁰ Co ukavwavesa lalo mutula na vivala vyawo vyoshe nakuvikundika, ngeci vyoshe vipwe vyakujela.

¹¹ Co lalo, mu ngila eyi vene, jelesa mbashiya yakujwelela na lisanda lyayo.

¹² “Asinoni nena Alone na vana vendi ku cikolo ca Mbalaka, ngeci uvajwelese na mema.

¹³ Zika Alone vuzalo vwakujela, mukundike oku umuvwavesa, ngeci anjipangele kupwa muka-kukombelela.

¹⁴ Nena lalo vana vendi uvazike visanya.

¹⁵ Asinoni vavwavese, ngwe muunavwavesa ishavo, ngeci vanjipangele kupwa vaka-kukombelela. Kuvwavesa oku kukavapwisa vaka-kukombelela ku visemwa vyavo vyoshe vya kulutwe.”

¹⁶ Mosesa walingile vyuma vyoshe ngwe muje mwamushikile Shukulu Kalunga.

¹⁷ Co a litangwa lyakulivanga ku ngonde yakulivanga mu mwaka wamucivali omo vanatundu laja mu Ingito, vashimbikile Mbalaka Mwakuliwanena.

¹⁸ Ngecivene, Mosesa waakele masanda ayo, nakwimika vivuliko vyayo, wavikwatesele na mambanze avyo, co wemikile lalo vimanda vyayo.

¹⁹ Co wajangumwine cakufwika akamwa ya Mbalaka nakwakao cakufwika ca akamwa, ngwe muje mwamushikile Shukulu Kalunga.

²⁰ Asinoni wanonele vitale vivali vya mamanya wavyakele mu Cikasa ca Cikumiiyo. Co waakele mikambo mu makulo a Cikasa, co waakele cifwiko ca mema ku mbunge akamwa yaco.

²¹ Waakele Cikasa mu Mbalaka nakushukikako livamba lyakuvambako. Mu ngila eyi mukemwo mwanyungilile Cikasa ca Cikumiiyo ngwe muje mwamushikile Shukulu Kalunga.

²² Co Mosesa waakele mesa mu Mbalaka, ku mutambela wa ku kunto anja ya livamba,

²³ waakeleo makende aje valambwile kuli Shukulu Kalunga, ngwe muje mwamushikile Shukulu Kalunga.

²⁴ Co waakele citumbikilo ca vindeya mu Mbalaka ku mutambela wa mu mbwela, calishungamene na mesa.

²⁵ Co Mosesa washwamekele vindeya muje mu Mbalaka ku mesho a Shukulu Kalunga, ngwe muje mwamushikile Shukulu Kalunga.

²⁶ Co waakele mutula wa ngolinde mu Mbalaka, kulutwe lwa livamba,

²⁷ wenyekeleleo insense yakunika lwengo lwaluvwa, ngwe muje mwamushikile Shukulu Kalunga.

²⁸ Asinoni washukikile livamba ku cikolo ca Mbalaka,

²⁹ co kulutwe lwa livamba waakeleko mutula wakwenyekela milambu. Wakombeleleleo milambu ya kwenyeka na milambu ya vimbuto, ngwe muje mwamushikile Shukulu Kalunga.

³⁰ Co waakele mbashiya yakujwelela mukati ka Mbalaka na mutula, waishulisile na mema.

³¹ Mukemwo vakele nakujwelela Mosesa, na Alone, na vana vendi.

³² Vajwelelelemo oshe aje avakovelela mu Mbalaka nambe ku mutula, ngwe muje mwamushikile Shukulu Kalunga Mosesa.

³³ Co Mosesa washimbikile cipango cakuzengeleka ku Mbalaka Mwakuliwanena na mutula nakushukikako livamba ku cikolo ca cipango. Co wamanesele vipangi vyoshe.

Lishelwa lya akamwa ya Mbalaka Mwakuliwanena

³⁴ Asinoni lishelwa lyafwikile Mbalaka, co ceke ca vumpau vwa ku mesho a Shukulu Kalunga cashulisile Mbalaka.

³⁵ Co Mosesa kasele kukovela mu Mbalaka, omwo lishelwa lyafwikile Mbalaka, co ceke ca vumpau vwa ku mesho a Shukulu Kalunga cashulisile Mbalaka.

³⁶ Co a vungenzi vwavo vwoshe vuvendele, omo lishelwa lyatundile a Mbalaka, co vaIsalele vendele,

³⁷ oloni nga lishelwa kulyatundileo, co kuvendele noo a litangwa lije omo lishelwa lyatundile a Mbalaka.

³⁸ Co simbu yoshe mu vungenzi vwavo vwoshe vamwene lishelwa lya Shukulu Kalunga akamwa ya Mbalaka a simbu ya mutanya, co tuhya twakele nakushukuma mu lishelwa a simbu ya vutsiki ku mesho a vanu voshe va Isalele.