Kutuuka 4 - Livulu lya Shukulu Kalunga

Njambi aana Mosesa nzili yakulinga vikomokeso

¹ Asinoni Mosesa wakumbulwile Shukulu Kalunga ngwendi, “Kenga, vaIsalele kuvakanjikulaela nambe kutolilila ku lijwi lyange omwo vakendeka ngwavo, ‘Shukulu Kalunga kalisholwele kuli yove’ ”

² Ngecivene, Shukulu Kalunga wamwihwile ngwendi, “Vikajo ovyo unakwata mu livoko lyove?” Co wamukumbulwile ngwendi, “Njinakwata mulamu.”

³ Shukulu Kalunga wendekele ngwendi, “Umbile asi.” Omo Mosesa waumbilile asi, co mulamu wemukile linyoka, co watewele.

⁴ Asinoni Shukulu Kalunga wendekele kuli Mosesa ngwendi, “Olola livoko lyove umukwate ku mukila.” Ngecivene, Mosesa wolwele livoko lyendi wamukwatele, co walimukile mulamu lalo.

⁵ Shukulu Kalunga wendekele ngwendi, “Ya ukalinge ngacije cikapwe vukaleo kuli vaIsalele ngeci Shukulu Kalunga, Njambi ya vakukulwila vavo, ikeye Njambi ya Avilahama, na Isake, na Yakomba, nalisholwele kuli yove.”

⁶ Shukulu Kalunga wendekele kuli Mosesa lalo ngwendi, “Aka livoko lyove mukati ka cikoveyo a nulo yove.” Co Mosesa waakele livoko mukati ka cikoveyo a nulo yendi, co omo walitundisilemo, kengeni lyavengele na mushongo wa mbumba.

⁷ Asinoni Shukulu Kalunga wendekele kuli ikeye ngwendi, “Ilwisila lalo livoko lyove mukati ka cikoveyo a nulo yove.” Co Mosesa welwisilile lalo livoko lyendi mukati ka cikoveyo a nulo yendi, co omo walitundisilemo, kengeni lyapwile lyalivwa ngwe muje muwapwile muvila wendi laja.

⁸ Shukulu Kalunga wendekele ngwendi, “Nga kuvakakukulaela nameme kuzivisisa a cikomokeso eci cakulivanga, co a eci camucivali vakazivisisa.

⁹ Oloni nga kuvakakulaela a vikomokeso evi vivali, nambe kutolilila evi ukendeka, co ukakupula mema mu Ndonga ya Nailo nakuwetila anunda. Co mema aje ukakupula mu Ndonga ya Nailo akemuka maninga.”

¹⁰ Oloni Mosesa wendekele ngwendi, “Embwe Shukulu Kalunga, kesi munjitume yange, omwo kunjizivukamo kwendeka mwamuvwa, nambe a matangwa a kunima, nameme tunde aje washangumukile kwendeka nange. Njapwa muka-cikukuma.”

¹¹ Co Shukulu Kalunga wendekele kuli ikeye ngwendi, “Iyajo watangele kanwa ka munu? Iyajo wamupwisa kasinda-matwi nameme kaveveve? Iyajo akamumwesa nameme kumupwisa kapuputwa? Kuma kesi yange Kalunga njikalingimo ndi?

¹² Ngecivene, ololo, ya! Njikakukwasa akwendeka, co njikakuleka vije viwukendeka.”

¹³ Oloni Mosesa wakumbulwile ngwendi, “Embwe Shukulu Kalunga, njalombo mutumeko weka.”

¹⁴ Co a cuma eci Shukulu Kalunga waluvalele na Mosesa wendekele ngwendi, “Vati ndolome yove Alone, kaLevi? Njazivuka ngeci ikeye asa kwendeka mwamuvwa. Ololo ali mu ngila nakukushesha, co omo akakumona akavwaelela mu mbunge yendi.

¹⁵ Ukendeka nendi nakumuleka evi vyanapande kwendeka. Co njikamikwasa muvuvali vweni akwendeka, njikamileka muvuvali vweni vimukalinga.

¹⁶ Ikeye akapwa muka-kukwendekelako kuli vanu. Co yove ukapwa ngwe Njambi kuli ikeye akumuleka vyakendeka.

¹⁷ Oloni ambata ou mulamu mu livoko lyove, ngeci ukalinge nawo vikomokeso.”

Mosesa eluka ku Ingito

¹⁸ Asinoni Mosesa welukile kuli ishemweno Yetolo, co wendekele kuli ikeye ngwendi, “Mwane njitaveni njiiluke kuli vavushoko vwange ku Ingito njikavamone nga vacili nakuyoya.” Co Yetolo wamutavele ngwendi, “Ya, enda mwamuvwa.” Co waile.

¹⁹ Shukulu Kalunga wendekele kuli Mosesa omo acili mu Mindyani ngwendi, “Iluka ku Ingito omwo vaje vashakele kukutsiya voshe vanatsi.”

²⁰ Ngecivene, Mosesa waile na munakazi wendi na vana vendi va vanalume, wavaakele a cimulu, co welukile ku Ingito. Mosesa wambatele mulamu mu livoko lyendi uje wamulekele Njambi kuyanawo.

²¹ Shukulu Kalunga wendekele lalo kuli Mosesa ngwendi, “Omo ukeluka ku Ingito, anuka kulinga vikomokeso vyoshe evi njinakwanavyo kuvilinga ku mesho a mwene. Oloni njikakaluwisa mbunge ya mwene, co ikeye kakatava vanu ngeci vaye.

²² Asinoni ukendeka kuli mwene ngwove Shukulu Kalunga nendeka ngwendi, ‘Isalele wapwa munange wa munalume, ikeye ntwatwa yange.

²³ Njakulekele ngwange tava ngeci munange aye akanjilemese. Oloni nga uvyana, co njikatsiya munove wa ntwatwa wa munalume.’ ”

²⁴ Omo vakele mu cilombo a ngila yakuya ku Ingito, co Shukulu Kalunga waliwanene na Mosesa, washakele kumutsiya.

²⁵ Asinoni munakazi wendi Zipola wanonele limanya lyakuvambuka, watuwile munendi wa munalume, co wambatele cije cikonde wacakele ku mendi a Mosesa ngwendi, “Mwa vushunga, yove unapu munalume wange wa maninga.”

²⁶ Zipola wendekele ngacije kuli Mosesa omwo akutuuka. Ngecivene, Shukulu Kalunga wamenene mwonyo wa Mosesa.

²⁷ A simbu ije vene Shukulu Kalunga wendekele kuli Alone ngwendi, “Ya mu mambo ukaliwane na Mosesa.” Ngecivene, Alone waile waliwanene nendi ku munkinda wa Njambi, co omo Alone waliwanene nendi, wamutsembele.

²⁸ Asinoni Mosesa walekele Alone vyuma vyoshe vije Shukulu Kalunga wamulekelevyo omo wamutumine ku Ingito. Co wamulekele lalo vikomokeso vyoshe vije Shukulu Kalunga wamushikilevyo kuvilinga.

²⁹ Ngecivene, Mosesa na Alone vaile ku Ingito vakungulwile vantwama voshe va vaIsalele.

³⁰ Co Alone wavalekele vyoshe vije vyendekele Shukulu Kalunga kuli Mosesa, asinoni Mosesa walingile vikomokeso vyoshe ku mesho a vanu.

³¹ Co vanu vakulaelele, omo vazivile ngeci Shukulu Kalunga nezile kuli vakevo nakumona tuyando twavo muvalina kuvapangesela na muuka, co vatsikamene a mavuli nakulemesa.