Kutuuka 39 - Livulu lya Shukulu Kalunga

Kutonga vuzalo vwa vaka-kukombelela

¹ Co vatongelele vaka-kukombelela vuzalo vwavuvwa vwa ulu yakuzivuluka, na yakuvenguluka, na yakuvenga, vyakuzala omo vapangele mu Mwela Wakujela. Co vatongelele Alone vuzalo vwakujela vwa vuka-kukombelela, ngwe muje Shukulu Kalunga washikile Mosesa.

² Co vatongele kangamuna ka nanga yaivwa ya linyu, na ulu yakuzivuluka, na yakuvenguluka, na yakuvenga, na nsambo ya ngolinde yakupepuka.

³ Co vafulile ngolinde nakuyipasha nakuyiteta tupapi-tupapi nakutushela mu nanga yaivwa ya linyu, na ulu yakuzivuluka, na yakuvenguluka, na yakuvenga.

⁴ Co vatongele tumiva tuvali twa a vitsili vya kangamuna, twakutongela noku-noku ngeci twase kutupateka.

⁵ Voshele mwamuvwa mwiva wa kandombe na vinanga vyakulifwa na kangamuna, co vautongelele a kangamuna ngeci vyapwile cuma cimo, ngwe muje Shukulu Kalunga washikile Mosesa.

⁶ Co vavwaesele tumamanya tuvali twa kanelya, vatwakele mu tukwatelo twa ngolinde, vatalekeleo na vutongwe mazina likumi na avali a vana va Yakomba.

⁷ Co vatwakele a tumiva twa a vitsili vya kangamuna, twimanene miyati likumi na ivali ya Isalele, ngwe muje Shukulu Kalunga washikile Mosesa.

Kutonga kananga ka a nulo

⁸ Co vatongele kananga ka a nulo na cifwa cimolika ngwe kangamuna, na ngolinde, na ulu yakuzivuluka, na yakuvenguluka, na yakuvenga, na linyu yaivwa yakwosha mwamuvwa.

⁹ Kapwile mumolika nomu-nomu kakwetekela muvali, masentimita 22 mu vulaja na masentimita 22 mu vwihi.

¹⁰ Co vaakeleo mindando iwana ya tumamanya twa seo yakama. Mu mundando wamucimo vaakelemo tumamanya twa lumbi, na topaze, na nganete,

¹¹ co mu mundando wamucivali vaakelemo emalinde, na safile, na ndaimonde.

¹² Co mu mundando wamucitatu vaakelemo takwoise, na angeta, na amesita.

¹³ Co mu mundando wamuciwana vaakelemo mbelilu, na kanelya, na njasipa. Co otu tumamanya vatwakele mu tukwatelo twa ngolinde.

¹⁴ Co tumamanya otu likumi na tuvali kamo na kamo vatalekeleo lizina lya umo na umo wa vana va Yakomba, mukwimanena miyati likumi na ivali ya vaIsalele.

¹⁵ A kananga ka a nulo vafulilileo malyenge a ngolinde yakujela akwosha ngwe nsambo.

¹⁶ Vafulile tukwatelo tuvali twa ngolinde na makulo avali a ngolinde, co makulo aje avali vawakwatesele ku vimbango vya kwilu ya kananga ka a nulo.

¹⁷ Vaakele malyenge aje avali a ngolinde ku makulo avali kumukulo wa kananga ka a nulo,

¹⁸ co vakwatesele vishongo vikwavo vivali vya malyenge a ngolinde ku tukwatelo tuvali, co mu ngila eyi vawakwatesele na tumiva tuje twakele a vitsili ku mbando ya kangamuna.

¹⁹ Co vafulile makulo avali a ngolinde, akwatesele kwisi ya vimbango vya kananga ka a nulo ku mukundwilo wa mukati wakwata ku kangamuna.

²⁰ Co vafulile lalo makulo avali a ngolinde akwatesele kwisi ya tumiva tuvali twa a vitsili ku mbando ya kangamuna, kuyehi na mutongo, akamwa ya mwiva wa kandombe wakwosha mwamuvwa.

²¹ Ngwe muje Shukulu Kalunga washikile Mosesa, co vakutiiye makulo a kananga ka a nulo ku makulo aa kangamuna na mukole wakuzivuluka, ngeci kaje kananga ka a nulo kakele akamwa ya mwiva wa kandombe wakwosha mwamuvwa ngeci kesi kashengenye.

Kutonga vuzalo vukwavo vwa vaka-kukombelela

²² Co vatongele cikoveyo cacilaja cakwita mwisi ya kangamuna na ulu yakuzivuluka,

²³ vacakele mbengwa mwakutuwisila mutwe, co ku mbengwa eyi vetisileko lupula kutewesa kutavuka.

²⁴ Co ku mukundwilo waco vaakeleko mapomingilanete a nanga yaivwa ya linyu, na ulu yakuzivuluka, na yakuvenguluka, na yakuvenga akushoveya.

²⁵ Co lalo vafulile vingenjo vya ngolinde yakujela, nakuvishovasana na mapomingilanete vavizengelekele ku mukundwilo wa cikoveyo.

²⁶ Vingenjo na mapomingilanete vavishovasanene nakuvizengeleka kumukundwilo wa cikoveyo ngwe muje Shukulu Kalunga washikile Mosesa.

²⁷ Co vatongelele visanya Alone na vana vendi,

²⁸ na kalupusa, na tukofwi, na tuputula twa linyu,

²⁹ na mwiva wa kandombe wa nanga yaivwa ya linyu, na ulu yakuzivuluka, na yakuvenguluka, na yakuvenga, vyakushoveya nakushelasana, ngwe muje Shukulu Kalunga washikile Mosesa.

³⁰ Vafulile mande ya ngolinde yakujela yakupasha kupwa cizivukiso cakujela cakukundika, co vatalekeleo “Wakukundika kuli Shukulu Kalunga.”

³¹ Co vaikutiiye kulutwe lwa kalupusa na mukole wakuzivuluka, ngwe muje Shukulu Kalunga washikile Mosesa.

Kumanesa vipangi

³² Vipangi vyoshe vya ku Mbalaka Mwakuliwanena vyahwile. VaIsalele valingile vyuma vyoshe ngwe muje Shukulu Kalunga washikile Mosesa.

³³ Vanenele Mbalaka kuli Mosesa na vivala vyayo vyoshe, na vikwateso vyayo vyakweteka ngwe malovo, na vivuliko vyayo, na mambanze ayo, na vimanda vyayo, na masanda ayo.

³⁴ Na vilambu vyakufwikao vya maka a majamba a vimanga vyakulomba na mushumbelo wakuvenga, na vilambu vyakufutungula vyakufwikao, na livamba.

³⁵ Na Cikasa ca Cikumiiyo muje mwakele vitale vya mamanya a vukaleo, na mikambo yaco, na cifwiko caco.

³⁶ Na mesa na vivala vyayo vyoshe, na makende akulambula kuli Njambi.

³⁷ Citumbikilo ca vindeya ca ngolinde yakujela, na vindeya vyaco, na vivala vyaco vyoshe, na mazi a mu vindeya.

³⁸ Na mutula wa ngolinde, na mazi akuvwavesa, na insense yakunika lwengo lwaluvwa, na livamba lya ku cikolo ca Mbalaka.

³⁹ Mutula wa vunengu na mishele yawo ya vunengu, na mikambo yawo, na vivala vyawo vyoshe, na mbashiya yakujwelela na lisanda lyayo.

⁴⁰ Mavamba a cipango na vimanda vyaco na masanda aco, na livamba lya ku cikolo ca cipango na mikole yaco, na vipampalingo vya Mbalaka, na vivala vyoshe vyakupangesa mu Mbalaka.

⁴¹ Vuzalo vwavuvwa vwa vaka-kukombelela vwakuzala omo vakovela mu Mwela Wakujela, vuzalo vwakujela vwa Alone muka-kukombelela novu vwa vana vendi.

⁴² Co vaIsalele valingile vipangi vyoshe ngwe muje Shukulu Kalunga washikile Mosesa.

⁴³ Co Mosesa welwile vyuma vyoshe, wamwene ngeci vanavilingi vyoshe ngwe muje mwashikile Shukulu Kalunga vene. Co Mosesa wavavezikisile.