Kutuuka 38 - Livulu lya Shukulu Kalunga

Kushonga mutula wa milambu ya kwenyeka

¹ Co washongele mutula wa mavaya a mungongo wa milambu ya kwenyeka. Woshe wapwile mumolika, mamita 2.2 mu vulaja na mamita 2.2 mu vwihi, na mamita 1.3 mu kulova.

² Co washongele lalo vyakushongomoka akamwa ku vimbango viwana, vikevyo vyapwile cuma cimo na mutula, co woshe wamutunu vausatele na vunengu.

³ Wafulile lalo vivala vyoshe vya mutula, mapanda, na vifwosholo, na tumalonga, na vikwateso, na mapanda akwambatela tuhya. Vyoshe evi wavipangesele vunengu.

⁴ Co wafulilileo mishele ya vunengu yakushelasana, wayakele mwisi ya livalo lya mutula, ngeci yetele akati ka mutula.

⁵ Wafulile makulo awana, co waakele mu vimbango viwana.

⁶ Washongele lalo mikambo yakwambatela ya mavaya a mungongo, waisatele na vunengu,

⁷ wakovelesele mikambo mu makulo ku mutambela umo na umo wa mutula. Co vashongele mutula wa mavaya, wasezele mako mukati.

Kufula mbashiya ya vunengu

⁸ Wafulile mbashiya ya vunengu na lisanda lyayo lya vunengu, lyapwile lya tulikengelo twa vanakazi vakele nakupanga ku cikolo ca Mbalaka Mwakuliwanena.

Cipango ca Mbalaka Mwakuliwanena

⁹ Co watungilile Mbalaka Mwakuliwanena cipango ca mavamba a linyu yaivwa yakushelasana mwamuvwa. Co ku mutambela wa mu mbwela, mavamba apwile mamita 44 mu vulaja,

¹⁰ akukwatesa na vimanda makumi avali vya vunengu na masanda makumi avali a vunengu, na vikwateso na mambanze vyakufula na siliva.

¹¹ Walingile cuma cimo na ku mutambela wa ku kunto ya cipango.

¹² Co ku mutambela wa mu kangombe ka yambi ka cipango kwakele mavamba a mamita 22 mu vulaja, na vimanda likumi, na masanda lalo likumi, na vikwateso, na mambanze wavifulile na siliva.

¹³ Co ku mutambela wa mu ngangela, kuje kwakele cikolo, cipango capwile mamita 22, mumolika na ku mutambela wa mu kangombe ka yambi.

¹⁴ Co ku mutambela umo wa cikolo kwakele livamba lya mamita 6.6 mu vulaja, na vimanda vitatu, na masanda atatu.

¹⁵ Co ku mutambela ukwavo kwakele livamba lya mamita 6.6 mu vulaja, na vimanda vitatu, na masanda atatu.

¹⁶ Co mavamba oshe aje azengulwisile cipango vawatongele na vinanga vyavivwa vya linyu yaivwa yakushelasana mwamuvwa.

¹⁷ Co masanda a vimanda vawafulile na vunengu, na vikwateso, na mambanze, na vyakufwika ku vishongo ya vimanda vivasatesele na siliva. Co vimanda vyoshe vyazengelekele kuje ku cipango vavinungilile na mambanze a siliva.

¹⁸ Co livamba lya ku cikolo ca cipango valitongele na vinanga vyavivwa vya linyu vyakushelasana na ulu yakuzivuluka, na yakuvenguluka, na yakuvenga vyakushoveya nakushelasana. Lyapwile mamita 9 mu vulaja, na mamita 2 mu kulova, lyalifwile ngwe mavamba a ku cipango.

¹⁹ Valikwatesele na vimanda viwana, na masanda awana a vunengu. Co vikwateso vyavyo, na vyakufwika ku vishongo vyavyo, na mambanze avyo vyapwile vyakusata na siliva.

²⁰ Vipampalingo vyoshe vya Mbalaka na vya cipango vyapwile vyakufula na vunengu.

Vutale vwakupangesa mu Mbalaka Mwakuliwanena

²¹ Ou ukewo mukana wa vutale vuvapangesele mu Mbalaka Mwakuliwanena, muje vatulikilile vitale vivali vya mamanya vije vivasonekele Mashiko Likumi. Mosesa washikile vaLevi kusoneka mukana ou ku livoko lya Itamale muna Alone muka-kukombelela.

²² Mbezalele muna Uli, mutekulu wa Hule wa ku muyati wa Yunda, walingile vyuma vyoshe vije Shukulu Kalunga wavishikile kuli Mosesa.

²³ Co mukwasi wendi Oholyave muna Ahisamake, wa ku muyati wa Ndani, wapwile muka-kutaleka a mamanya, na muka-kushova nakushoveya, na muka-kushela vinanga vyavivwa vya linyu, vyakuzivuluka, na vyakuvenguluka, na vyakuvenga.

²⁴ Co ngolinde yoshe ije ivakundikile kuli Shukulu Kalunga ya Mbalaka yapwile makilo 1,000, ije vesekele ngwe ku vulemu vwa vimbongo vije vishakiwa ku Mbalaka yakujela.

²⁵ Siliva yatundile kukulava vungi vwa vanu yapwile makilo 3,430, ije vesekele ngwe ku vulemu vwa vimbongo vije vishakiwa ku Mbalaka yakujela.

²⁶ Seteko eyi yapwile ngwe seteko ya vanu vaje valisonekesele, munu na munu wafwetele ngwe muje vasetekele ku vulemu vwa vimbongo vije vishakiwa ku Mbalaka yakujela. Co vapwile vanalume 603,550 vaje vakele na myaka makumi avali nambe kutuvakana vakevo valisonekesele.

²⁷ Vulemu vwa siliva vwa makilo 3,400 vukevwo vapangesele masanda 100 a Mbalaka yakujela na livamba lyakwo, co vulemu vwa makilo 34 vukevwo vapangesele lisanda na lisanda.

²⁸ Co siliva yasaleleko yapwile makilo 30, Mbezalele waifulile mambanze, na vikwateso vya vimanda, nakuyisata ku vishongo vya vimanda.

²⁹ Co vunengu vuje vuvakundikile kuli Shukulu Kalunga vwapwile makilo 2,425.

³⁰ Co wavupangesele masanda a ku cikolo ca Mbalaka Mwakuliwanena, na mutula wa vunengu, na mishele yawo ya vunengu yakushelasana, na vivala vyoshe vya ku mutula,

³¹ na masanda oshe a cipango, na ku cikolo ca cipango, na vipampalingo vyoshe vya Mbalaka nevi vya cipango.