Kutuuka 37 - Livulu lya Shukulu Kalunga

Kushonga Cikasa ca Cikumiiyo

¹ Mbezalele washongele Cikasa ca Cikumiiyo ca mavaya a mungongo, capwile masentimita 110 mu vulaja, na masentimita 66 mu vwihi, na masentimita 66 mu kulova.

² Asinoni wacisatele na ngolinde yakujela mukati na akamwa, co wazengulwisileko mukundwilo wa ngolinde.

³ Wafulile makulo awana a ngolinde akwambatela aje akwatele ku mendi aco awana, makulo avali ku mutambela na mutambela.

⁴ Co washongele mikambo yakwambatela ya mavaya a mungongo, waisatele na ngolinde,

⁵ waishilwisile mukati ka makulo ku mutambela na mutambela wa cikasa.

⁶ Co wafulile cifwiko ca ngolinde yakujela, capwile masentimita 110 mu vulaja na masentimita 66 mu vwihi.

⁷ Wafulile vakelumbi vavali va mambava vakupameya na ngolinde, co wavafulilile ku shongo imo na imo ya cifwiko ca mema ku mbunge,

⁸ co wakele kelumbi umo ku shongo imo ya cifwiko, na kelumbi mukwavo ku shongo ikwavo ya cifwiko. Wavapameyeyeye amo na cifwiko, ngeci vyapwile cuma cimo.

⁹ Co vaje vakelumbi va mambava valikengele vihanga vyavo umo na umo aje a cifwiko, co aje mambava avo akujangumuka afwikile cifwiko.

Kushonga mesa ya makende akulambula kuli Njambi

¹⁰ Mbezalele washongele mesa ya mavaya a mungongo, yapwile masentimita 88 mu vulaja, na masentimita 44 mu vwihi, na masentimita 66 mu kulova kwayo.

¹¹ Co waisatele na ngolinde yakujela, wazengulwisileko mukundwilo wa ngolinde.

¹² Co waishongelele livalo lyakupwa masentimita 7.5 lyakuyizengulwisa. Co waakele lalo mukundwilo wa ngolinde wakuzengulwisa livalo.

¹³ Waifulilile makulo a ngolinde awana akuyambatela nakuwaka ku vimbango viwana, ku mendi ayo.

¹⁴ Makulo akukwatesa mikambo yakwambatela mesa wawakele kuyehi na livalo.

¹⁵ Co washongele lalo mikambo ya mavaya a mungongo nakuyisata na ngolinde.

¹⁶ Wafulile vyuma vyoshe vya mesa na ngolinde yakujela, na malonga, na vinganja, na vinjava, amo na tumalonga twatundondo twakupangesa a milambu ya vinyu.

Kufula citumbikilo ca vindeya

¹⁷ Co lalo wafulile citumbikilo ca vindeya ca ngolinde yakujela. Lisanda lyaco na manda yaco wavifulile na ngolinde yakupameyeya, amo na vishani vyaco vyakucakeya, amo na vintemo na mavundungulu aco, ngeci vipwe cuma cimolika.

¹⁸ Co minango itanu na umo yatundile ku mutambela umo na umo wa manda, ku mutambela umo na umo kwatundile itatu.

¹⁹ Co ku minango itanu naumo ku umo na umo kwakele vishani vyakucakeya vitatu, cifwa cavyo ngwe vishani vya alumonde na mavundungulu na vintemo.

²⁰ Co manda ya citumbikilo ca vindeya yakele na vishani vyakucakeya viwana vyakufwa ngwe vishani vya alumonde na mavundungulu na vintemo.

²¹ Co a manda ya citumbikilo ca vindeya akele livundungulu limo mwisi ya minango ivali, co livundungulu limo mwisi ya minango ivali, na livundungulu limo mwisi ya minango ivali kuje ku minango itanu na umo ije itunda a citumbikilo ca vindeya.

²² Ngecivene, mavundungulu na minango, na citumbikilo ca vindeya vyapwile cuma cimolika cakupameyeya na ngolinde yakujela.

²³ Co wafulile vindeya vitanu na vivali a citumbikilo cavyo, wafulile vimana vyavyo na malonga akushalamena a ngolinde yakujela.

²⁴ Co wapangesele makilo 35 a ngolinde yakujela yakufulisa citumbikilo ca vindeya na vivala vyaco vyoshe.

Kushonga mutula wakwenyekela insense

²⁵ Wapangele mutula wa mavaya a mungongo wakwenyekela insense. Co wapwile mumolika nomu-nomu, masentimita 45 mu vulaja na masentimita 45 mu vwihi, na masentimita 90 mu kulova. Co na vyakushongomoka vyawo vya mu vimbango viwana vyapwile cuma cimolika na mutula.

²⁶ Wausatesele na ngolinde yakujela akamwa yawo, na mu mitambela yoshe iwana, na ku vyakushongomoka vyawo, wazengulwisileko mukundwilo wa ngolinde.

²⁷ Co wafulile makulo avali a ngolinde akwambatela nakuwakwatesa kwisi ya mukundwilo wayo ku mitambela yoshe ivali, mukukwatesa mikambo yakuwambatela.

²⁸ Washongele mikambo ya mavaya a mungongo, co wayisatesele na ngolinde.

Mwakulingila mazi akuvwavesa na insense

²⁹ Co walingile mazi akuvwavesa akujela na insense yakujela yakunika lwengo lwaluvwa. Co wavitsingasanene vipwe vyakunika lwengo lwaluvwa.