Kutuuka 35 - Livulu lya Shukulu Kalunga

Mashiko aa Litangwa Lyakuhwima

¹ Mosesa wasanene mbunga yoshe ya vanu va Isalele amolika, co wavalekele ngwendi, “Evi vikevyo vyanashiki Shukulu Kalunga ngeci muvilinge.

² Mukapanga vipangi vyeni a matangwa atanu na limo, oloni a litangwa lyamucitanu na avali linapu lyakujela, Litangwa Lyakuhwima valikundika kuli Shukulu Kalunga. Woshe akapanga vipangi a litangwa eli vanapande kumutsiya.

³ Co nambe tuhya kesi mutuvweke mu vinjuvo vyeni a Litangwa Lyakuhwima.”

Milambu yakutungisa Mbalaka yakujela

⁴ Mosesa wendekele kuli vanu va Isalele voshe ngwendi, “Evi vikevyo vyanashiki Shukulu Kalunga.

⁵ Lambuleni kuli Shukulu Kalunga. Munu woshe uje ashaka kulinga ngacije alambule ngolinde, na siliva, na vunengu,

⁶ na vinanga vyavivwa vya linyu, vyakuzivuluka, na vyakuvenguluka, na vyakuvenga, na vinanga vyakutonga na maka a vimembe,

⁷ na vilambu vya majamba a vimembe vyakulomba na mushumbelo wakuvenga, na vilambu vyavivwa, na mavaya a mungongo,

⁸ na mazi a mu vindeya, na n̄undu yakwaka mu mazi akuvwavesa, nakwaka a insense yakunika lwengo lwaluvwa,

⁹ na tumamanya twa kanelya, na tumamanya tukwavo twa seo yakama twakwaka a kangamuna naa kananga ka a nulo ya Muka-kukombelela Wakama.

Vyuma vya mu Mbalaka Mwakuliwanena

¹⁰ “Vanalume voshe vaka-vutongwe vaje vali akati keni vaije, ngeci vakupange vyuma vyoshe vije vyanashiki Shukulu Kalunga.

¹¹ Mbalaka na vyakufwikao, na vikwateso vyakweteka ngwe malovo, na vivuliko vyayo, na mambanze ayo, na vimanda vyayo, na masanda ayo.

¹² Cikasa ca Cikumiiyo, na mikambo yaco na cifwiko caco, co na livamba lije lyakuvambako.

¹³ Mesa na mikambo yayo, na vivala vyayo vyoshe, na makende akulambula kuli Njambi.

¹⁴ Citumbikilo ca vindeya cakwaka ndeya na vivala vyavyo, na vindeya na mazi avyo.

¹⁵ Mutula wakwenyekela insense, na mikambo yawo, na mazi akuvwavesa, na insense yakunika lwengo lwaluvwa, na livamba lya ku cikolo ca Mbalaka.

¹⁶ Mutula wa milambu ya kwenyeka, na mishele yawo ya vunengu, na mikambo yawo, na vivala vyawo vyoshe, na mbashiya yakujwelela na lisanda lyayo.

¹⁷ Mavamba a cipango, na vimanda vyaco na masanda aco, na livamba lya ku cikolo ca cipango.

¹⁸ Vipampalingo na mikole vya Mbalaka na vya cipango.

¹⁹ Vuzalo vwavuvwa vwa vaka-kukombelela vwakuzala omo vapanga mu Mwela Wakujela, vuzalo vuje vwakujela vwa Alone muka-kukombelela novu vwa vana vendi.”

Vanu vanena milambu yavo

²⁰ Mbunga yoshe ya vanu va Isalele vaile vasezele Mosesa,

²¹ co munu woshe uje mbunge yendi yamusindiiye na woshe uje wakele na cizango cakulinga ngacije wanenele mulambu kuli Shukulu Kalunga yakutungisa Mbalaka Mwakuliwanena. Co vanenele vyuma vyoshe vije vyashakiwile mukupangesa Mbalaka Mwakuliwanena, na vipangi vyayo vyoshe, amo na vuzalo vwakujela vwa vuka-kukombelela.

²² Voshe vaje vatavele kulambula na mbunge yoshe, vanalume na vanakazi, vanenele vimande vyakuvalama, na vimbilingwa, na tunzeya, na sungu na vyuma vyoshe vya ngolinde, co vavikundikile kuli Shukulu Kalunga.

²³ Co munu na munu uje wakele na nanga yaivwa ya linyu, na yakuzivuluka, na yakuvenguluka, nambe yakuvenga, na nanga ya maka a vimembe, na vilambu vya majamba a vimanga vyakulomba na mushumbelo wakuvenga, nambe vilambu vyakufutungula mwamuvwa, vavinenele.

²⁴ Voshe vaje vasele kulambula siliva nambe vunengu, vanenele mulambu wavo kuli Shukulu Kalunga, na voshe vaje vakele na mavaya a mungongo akupangesa ku vipangi vyoshe-ivyoshe vaanenele.

²⁵ Vanakazi voshe vatongwe vanenele vwanda vuje vombwele na mavoko avo vwa linyu yaivwa, na vwanda vwakwombola vwakuzivuluka, na vwakuvenguluka, na vwakuvenga.

²⁶ Lalo vombwele vwanda vwa maka a vimembe.

²⁷ Vantwama vanenele tumamanya twa kanelya na tumamanya tukwavo twa seo twakwaka a kangamuna naa kananga ka a nulo,

²⁸ na n̄undu na mazi a mu vindeya, na mazi akuvwavesa, na mazi insense akunika lwengo lwaluvwa.

²⁹ Co vanu voshe va Isalele, vanalume na vanakazi, vaje vimbunge vyavo vyavasindiiye, vanenele milambu yavo ya cizango kuli Shukulu Kalunga yakupangesa vipangi vyoshe ngwe muje mwashikile Shukulu Kalunga Mosesa kulingamo.

Kusana Mbezalele na Oholyave

³⁰ Co Mosesa wendekele kuli vaIsalele ngwendi, “Shukulu Kalunga naangula Mbezalele muna Uli, mutekulu wa Hule wa ku muyati wa Yunda.

³¹ Njambi namushulisa na Munzinzime wendi, namwana vutongwe, nakunanguka, nakuzivisisa a cipangi coshe ca vutongwe,

³² nakuyongola vutumbe vwa vutongwe vwakushova nakushovasana, nakupangesa ngolinde, na siliva, na vunengu,

³³ nakulamozola tumamanya twa seo yakama, nakutwaka mu tukwatelo, nakushonga mavaya, amo na cipangi coshe ca vutongwe.

³⁴ Shukulu Kalunga naana kuli Mbezalele na kuli Oholyave muna Ahisamake wa ku muyati wa Ndani, kunanguka kwa kulongesa vakwavo vutongwe vwa vipangi vyoshe.

³⁵ Co Shukulu Kalunga navaana vutongwe vwakama vwakupanga vyuma vyakuliseza-seza vije vakalingi vaka-kutaleka a tumamanya, na vaka-kushova nakushoveya, na vaka-kushela vinanga vyavivwa vya linyu, na ulu yakuzivuluka, na yakuvenguluka, na yakuvenga, na vinanga vikwavo. Vakevo vapange vipangi vyakuliseza-seza vya vutongwe.