Kutuuka 34 - Livulu lya Shukulu Kalunga

Vitale vyamucivali vya mamanya

¹ Shukulu Kalunga wendekele kuli Mosesa ngwendi, “Lamuna vitale vya mamanya vivali ngwe vije vyakulivanga, ngeci njitalekeo majwi ngwe aje akeleo akulivanga, aje akele a vitale vije viwapokwele.

² Livwaesele cimweja imene mutondo-tondo, ukalamate ku Munkinda wa Sinai tukaliwanene akamwa ya munkinda.

³ Oloni naumo wai akalamata amo nove, munu naumo wai akasholoka kuje ku munkinda, nambe vimanga nambe vingombe kesi vakalile kuje kwisi ya munkinda embwe.”

⁴ Ngecivene, Mosesa walamwine vitale vivali vya mamanya, co alikaki mutondo-tondo wavyambatele nakulamata navyo ku Munkinda wa Sinai, ngwe mwamushikile Shukulu Kalunga.

⁵ Shukulu Kalunga washulukilile mu lishelwa, wakwimanene amo na Mosesa, co walitumbwile ikeye vavenya lizina lyendi lyakujela lya Shukulu Kalunga.

⁶ Asinoni Shukulu Kalunga wetile kulutwe lwendi, co walitumbwile lizina lyendi ngwendi, “Yange Kalunga, njapwa Njambi uje washula na kutetela na mema ku mbunge, uje kesi kuluvala vwasi, muka-kulongwa na muka-kumwesa cizemo cije kucesi kutenguluka.

⁷ Yange njimwesa cizemo cije kucesi kutenguluka ku makulukazi a vanu, nakuvasambesa ku milonga yavo na ku kupenga-penga kwavo, na ku vuvi vwavo. Oloni kunjikajuka kunyanyamesa vana na vatekulu ku cisemwa camucitatu neci camuciwana a vuvi vwa visemi vavo.”

⁸ Vwasi-vwasi Mosesa watsikamene a mavuli nakulemesa.

⁹ Ikeye wendekele ngwendi, “Shukulu Kalunga, nga mwa vushunga yove ulinakuvwaelela nange, njilomba ngeci uye amo netu. Nameme vanu ava vapwa vakukaluwa vimbunge, oloni tusambese kukukaluwa kwetu na ku vuvi vwetu, tutambule nakutupwisa vanu vove.”

Kutungulula cikumiiyo

¹⁰ Co Shukulu Kalunga wendekele kuli Mosesa ngwendi, “Kenga, ololo njilinakulikumiiya cikumiiyo na vanu va Isalele. Njikalinga vikomokeso vije kanda njivilinge akati ka miyati yoshe ano asi. Vanu voshe vakamona vyuma vyakujujwisa, vije vinjikalinga yange Kalunga, omwo njikalinga cuma cakumikomokesa manene.

¹¹ Co ononokeni mashiko awa njilinakumyanawo ku litangwa lya lelo. Kenga, njikasheka vaAmoli, na vaKanana, na vaHiti, na vaPelezi, na vaHivi, na vaNjevushi, omo yeni mulinakuya kulutwe.

¹² Nyanyameni! Kesi mukalizivasane na vanu va mu lifuti lije mukakovela, omwo eci cikapwa ciliva kuli yeni.

¹³ Oloni yeni mukasiwule mitula yavo, nakunyongesa vimanda vyavo vyakulemesela, co mukavujula vimweso vya Ashela njambi yavo wa munakazi.

¹⁴ “Ngecivene, kesi mukalemese njambi weka lalo, omwo yange Kalunga, njapwa Njambi wa lifuwa.

¹⁵ Co kesi mukalizivasane na vanu va mu lifuti lije omo valemesa vinjambi vavo nakuvakombelela, kutewa vakamilanya ngeci mukalikumbasane navo, co vakamyeseka mukalye ku vyakulya vanakombelela ku vinjambi vavo.

¹⁶ Co omo vana veni va vanalume vakambata vana vavo va vanakazi, co vakavatangula kukulaela kwavo, co vakalemesa vinjambi vavo.

¹⁷ “Kesi mukanyongolole vinjambi va vutale nakuvalemesa embwe.

¹⁸ “Co nyungeni Ciwano ca Makende Akujeneka Musima, ngwe muje njamishikile. Lyeni makende akujeneka musima a matangwa atanu na avali mu ngonde ya Avive, omwo mu ngonde ije vene ikeyo mwatundile mu Ingito.

¹⁹ “Mwana woshe wa ntwatwa wa munalume na nkomba woshe wa cimuna wakulivanga kusemuka wapwa wange.

²⁰ Oloni mwasa kukula cimulu woshe wakulivanga kusemuka nakwingisamo muna manga mu mwela wendi. Nga yove shove kumukula, co mupokole mukoshi. Oloni kuleni mwana woshe wa ntwatwa wa munalume. “Munu naumo wai akaija ku mesho ange mavoko-voko kujeneka mulambu.

²¹ “Matangwa atanu na limo mukapanga vipangi vyeni, a litangwa lyamucitanu na avali kesi mukapange, nameme a simbu yakulima nambe a simbu ya kuteja.

²² “Mukanyunga Ciwano ca Kuteja, omo mukashangumuka kuteja vimbuto vyeni vyakulivanga. Co lalo mukanyunga Ciwano ca Mapapela a civatu ca nyonzi, omo mukakungulula vushuka vweni.

²³ “Visimbu vitatu a mwaka, vanalume veni voshe vanapande kwija, nakunjilemesa yange Kalunga, Njambi ya vaIsalele.

²⁴ Omo yange njikasheka vavenya lifuti kulutwe lweni, nakwamesa lifuti lyeni, co naumo wai akamifungulula mu lifuti lyeni a visimbu vya viwano evi vitatu.

²⁵ “Kesi mukalambule makende akulinga na musima omo mukombelela kasitu kuli yange. Ku Ciwano ca Pasovala kesi mukasezeko mutambela umo wa cimuna uje munatsii noo alikaki mutondo embwe.

²⁶ “Co a mwaka na mwaka neneni ku Njuvo ya Shukulu Kalunga Njambi yeni vimbuto mwateje akulivanga. “Kesi muteleke muna manga nambe muna membe na mavele a vaina embwe.”

²⁷ Shukulu Kalunga wendekele kuli Mosesa ngwendi, “Soneka majwi awa, omwo akewo anapu nsina ya majwi awa njilinakulikumiiya cikumiiyo amo nove na vaIsalele.”

²⁸ Co Mosesa wakele kuje na Shukulu Kalunga matangwa makumi awana vutsiki na mutanya, kalile vyakulya nameme kunwa mema. Co ikeye wasonekele a vitale majwi a cikumiiyo, akewo Mashiko Likumi.

Mosesa atunda ku Munkinda wa Sinai

²⁹ Omo Mosesa watundile ku Munkinda wa Sinai, wambatele vitale vivali vya Mashiko Likumi mu mavoko endi, co cihanga cendi cavyazimine omwo ikeye wakele nakwendeka na Shukulu Kalunga, oloni ikeye vavenya kalizivukile.

³⁰ Co omo Alone na vanu va Isalele voshe vakengele Mosesa, vamwene cihanga cendi civyazima, co vakele na lyova lyakumushwenya muyehi.

³¹ Oloni Mosesa wavasanene, ngecivene, Alone na vantwama voshe va mbunga vezile kuli ikeye, co Mosesa wendekele navo.

³² Munima yevi, vanu voshe va Isalele valikungulwile nakumuzengeleka, co Mosesa wavalekele mashiko oshe aje amwanene Shukulu Kalunga a Munkinda wa Sinai.

³³ Co omo Mosesa wamanesele kwendeka kuli vakevo, walifwikile lilesu ku cihanga cendi.

³⁴ Oloni omo Mosesa wakovelele mu Mbalaka Mwakuliwanena nakwendeka na Shukulu Kalunga, watundisile lilesu ku mesho endi. Omo watuukilemo, walekele vanu va Isalele vyuma vyoshe vije vyamushikile Shukulu Kalunga kuvyendeka,

³⁵ co vamwene cihanga cendi cakele nakuvyazima. Asinoni Mosesa walifwikile lalo lilesu ku cihanga cendi noo a simbu ikwavo wakovelele mu Mbalaka nakwendeka na Shukulu Kalunga.