Kutuuka 31 - Livulu lya Shukulu Kalunga

Kusana kwa Mbezalele na Oholyave

¹ Asinoni Shukulu Kalunga wendekele kuli Mosesa ngwendi,

² “Kenga, njinaangula Mbezalele muna Uli mutekulu wa Hule wa ku muyati wa Yunda,

³ co njinamushulisa na Munzinzime wange. Co njinamwana kuzivisisa na vutongwe, na kunanguka a cipangi coshe ca vutongwe,

⁴ na mukuyongola vutumbe vwa vutongwe vwakushova nakushovasana nakuvipangesa na ngolinde, na siliva, na vunengu,

⁵ nakulamozola tumamanya twa seo yakama nakutwaka mu tukwatelo, nakushonga mavaya, amo na cipangi ceka coshe ca vutongwe.

⁶ Co lalo njinaangula Oholyave muna Ahisamake, wa ku muyati wa Ndani, mukupanga amo nendi. Co lalo njinaana kunanguka kuli voshe vakwavo vaka-kupanga na vutongwe, ngeci vakevo vase kulinga vyuma vyoshe vije njinashiki ngeci vavilinge,

⁷ Mbalaka Mwakuliwanena, na Cikasa ca Cikumiiyo na cifwiko ca mema ku mbunge na vivala vyoshe vya mu Mbalaka,

⁸ na mesa na vivala vyayo, na citumbikilo ca vindeya ca ngolinde yakujela na vivala vyayo vyoshe, na mutula wakwenyekela insense,

⁹ na mutula wa milambu ya kwenyeka na vivala vyawo vyoshe, na mbashiya yakujwelela na lisanda lyayo,

¹⁰ na vuzalo vwavuvwa vwa vuka-kukombelela vwa Alone na vuzalo vwa vana vendi vwakupangesa omo vapanga vipangi vyakukombelela,

¹¹ na mazi akuvwavesa, na insense yakunika lwengo lwaluvwa ya mu Mwela Wakujela. Akupanga vyuma vyoshe evi, munapande kuvipanga mwamuvwa ngwe munjinamishiki.”

Litangwa Lyakuhwima

¹² Co Shukulu Kalunga washikile Mosesa

¹³ kuleka vanu va Isalele ngwendi, “Nyungeni Litangwa Lyakuhwima, omwo likelyo lyapwa cimweso akati keni nange ku visemwa vyeni vyoshe vya kulutwe, mukumimwesa ngeci yange Kalunga njinamipwisa vanu vange.

¹⁴ Ngecivene, munapande kunyunga Litangwa Lyakuhwima, omwo likelyo linapu lyakujela. Co woshe uje kalinyungu, oloni apanga a litangwa lije, napande kutsa.

¹⁵ Matangwa atanu na limo mukapanga vipangi vyeni, oloni a litangwa lyamucitanu na avali likapwa litangwa lyakujela lyakuhwima omo lyakundama kuli yange Kalunga. Co woshe uje akapanga a litangwa lije napande kutsa.

¹⁶ Ngecivene, vanu va Isalele vanapande kunyunga litangwa eli kupwa cimweso ca cikumiiyo ku visemwa vyavo vyoshe vya kulutwe.

¹⁷ Litangwa eli linapu cimweso ca ku myaka yoshe akati ka vanu va Isalele nange, omwo yange Kalunga, njatangele lilu na asi mu matangwa atanu na limo, co a litangwa lyamucitanu na avali njalikelele kupanga vipangi, co njahwimine.”

¹⁸ Omo Njambi wamanesele kushika Mosesa a Munkinda wa Sinai, co wamwanene vitale vivali vya vukaleo vya mamanya aje Njambi vavenya wasonekeleo mashiko na livoko lyendi.