Kutuuka 30 - Livulu lya Shukulu Kalunga

Mutula wakwenyekela insense

¹ “Shonga mutula wa mavaya a mungongo akwenyekela insense.

² Co unapande kupwa mumolika nomu-nomu, masentimita 45 mu vulaja na masentimita 45 mu vwihi, na masentimita 90 mu kulova. Co na vyakushongomoka vyawo vya mu vimbango viwana vinapande kupwa mumolika na mutula.

³ Usate na ngolinde yakujela akamwa yawo, na mu mitambela yoshe iwana, na ku vyakushongomoka vyawo, co ku shongo yawo zengulwisako mukundwilo wa ngolinde.

⁴ Fula makulo avali a ngolinde akwambatela, nakuwakwatesa kwisi ya mukundwilo wayo, ku mitambela yoshe ivali mukukwatesa mikambo yakuwambatela.

⁵ Shonga mikambo ya mavaya a mungongo, co isate na ngolinde.

⁶ Asinoni aka mutula anja ya livamba lije lilinakujenjela kulutwe lwa Cikasa ca Cikumiiyo na cifwiko ca mema ku mbunge a cije cili akamwa ya Cikasa ca Cikumiiyo. Kuje kukekwo kunjikaliwana nove.

⁷ Co a mutondo a mutondo omo Alone akavwaesa vindeya, enyekeleo insense yakunika lwengo lwaluvwa.

⁸ Napande kulinga cuma cimo omo ashwameka vindeya ku simbu ya cingwezi. Co mulambu ou wa insense yakunika lwengo lwaluvwa unapande kutwalao ku mesho a Shukulu Kalunga ku visemwa vyeni vyoshe vya kulutwe.

⁹ Co a mutula ou kesi ukombeleleo insense yeka embwe, nambe mulambu wa kasitu, nambe mulambu wa vimbuto vya vinona, co lalo kesi witileo mulambu wa vinyu.

¹⁰ Co Alone akaambesa mutula lumo a mwaka akwaka maninga a vyakushongomoka vyawo viwana, akavyambesa na maninga a mulambu wa a vuvi lumo a mwaka mu visemwa vyeni vyoshe vya kulutwe. Mutula ou wapwa wakujela kuli yange Kalunga.”

Vimbongo vyakwambesa myonyo ya vanu

¹¹ Co Shukulu Kalunga wendekele kuli Mosesa ngwendi,

¹² “Omo usonekesa vanu va Isalele, co munu na munu akalikule ikeye vavenya ngeci kesi akakovele mu vukalu vwa mushongo wakulitambwisa simbu vacili nakusonekesa vanu.

¹³ Munu woshe uje vasonekesa napande kulambula ngwe na vulemu vwa vimbongo vije vivashaka. Co munu napande kulambula evi kupwa mulambu kuli yange Kalunga.

¹⁴ Munu woshe uje valava mukusonekesa oku, woshe uje ali na myaka makumi avali nambe kutuvakana, napande kulambula kuli yange Kalunga.

¹⁵ Fuki kakalambula vimbongo vyavingi nambe kautu kakalambula vimbongo vyavindondo, omo valambula vimbongo mukwambesa myonyo yavo.

¹⁶ Ukatambula vimbongo vyakwambesa kuli vanu va Isalele, co ukavipangesa mukuvwaesa ku vipangi vya Mbalaka Mwakuliwanena. Co vimbongo evi vikapwe vyakwambesa myonyo yavo, co yange nalumo lwai njikevala vanu vange.”

Mbashiya ya vunengu

¹⁷ Shukulu Kalunga wendekele kuli Mosesa ngwendi,

¹⁸ “Fula mbashiya ya vunengu yakujwelela, na lisanda lyayo lya vunengu, yake mukati ka Mbalaka Mwakuliwanena na mutula, co akamo mema.

¹⁹ Co Alone na vana vendi vakajwele ku mavoko na ku mendi avo

²⁰ omo kanda vakovele mu Mbalaka nambe kushwenya ku mutula nakulambula mulambu wa vyakulya. Co kuvakavatsii.

²¹ Co vanapande kujwela ku mavoko na ku mendi avo, ngeci kesi vatse. Eli likelyo lishiko lyavo amo na vatekulwila vavo livakanyunga ku visemwa vyavo vyoshe vya kulutwe.”

Mazi akuvwavesa

²² Shukulu Kalunga wendekele kuli Mosesa ngwendi,

²³ “Ambata n̄undu yaivwa manene, makilo atanu na limo a miila, makilo atatu a sinamone yakunika lwengo lwaluvwa, na makilo atatu lalo a kane yakunika lwengo lwaluvwa.

²⁴ Co na makilo atanu na limo a akasha (vyoshe evi vaviseteke kwesekesa na seteko ije ishakiwa.) Wezelelako na malita awana a mazi a olive,

²⁵ co ukatsingasana n̄undu eyi na mazi a olive, vipwe mazi akujela akuvwava akunika lwengo lwaluvwa.

²⁶ Co apangese mukuvwavesa Mbalaka Mwakuliwanena, na Cikasa ca Cikumiiyo,

²⁷ na mesa na vivala vyayo vyoshe, na citumbikilo ca vindeya na vivala vyavwo vyoshe, na mutula wakwenyekela insense,

²⁸ na mutula wa milambu ya kwenyeka amolika na vivala vyawo vyoshe, na mbashiya yakujwelela na lisanda lyayo.

²⁹ Co mu ngila eyi ukajelesa vyuma evi, ngeci vikapwe vyakujela, co munu woshe nambe cuma coshe cikambolako, co cikavulumuka a nzili yakujela kwavyo.

³⁰ Asinoni vwavesa Alone na vana vendi, nakuvajelesa kupwa vaka-kukombelela mu vipangi vyange.

³¹ Co endeka kuli vanu va Isalele ngwove, ‘Awa mazi akujela akuvwavesa mukaapangesa mu vipangi vyange mu visemwa vyeni vyoshe.

³² Kumwapandele kuwetila ali munu woshe-iwoshe embwe, co lalo kesi mukashinge mazi eka akulifwa na mazi awa omwo akeo anapu akujela, co apangeseni kupwa akujela vene.

³³ Munu woshe akalinga mazi ngwe awa, nameme kuwapangesa ku munu kesi muka-kukombelela kuli yange, kakapu lalo umo wa vanu vange embwe.’ ”

Insense

³⁴ Co Shukulu Kalunga wendekele kuli Mosesa ngwendi, “Ambata n̄undu eyi yakunika lwengo lwaluvwa yaseteko imo, sitakete, na onyeka, na ngalevamune, na fulankininsense yakujela.

³⁵ Vitsingasane mwamuvwa ngeci insense ipwe ngwe n̄undu yaivwa, yakunika lwengo lwaluvwa. Co akako mwongwa ngeci vipwe vyavivwa vyakujela.

³⁶ Tsekako vimo vipwe vunga vwavuvwa, co vitwale mu Mbalaka Mwakuliwanena, nakuvishamwina kulutwe lwa Cikasa ca Cikumiiyo. Co insense eyi ipangese kupwa yakujela.

³⁷ Co kesi mukalishingile n̄undu yeka ngwe eyi insense embwe. Vipwiseni cuma cakujela cakukundika kuli yange.

³⁸ Nga munu umo atembunwina evi nakuvipangesa kupwa vyakunika lwengo lwaluvwa, co kakapu lalo umo wa vanu vange embwe.”