Kutuuka 3 - Livulu lya Shukulu Kalunga

Njambi asana Mosesa

¹ Omo Mosesa wakele nakunyunga vutanga vwa ishemweno Yetolo muka-kukombelela wa ku Mindyani, watwalele vutanga kuje kwasikisilile mambo, co wetele ku Sinai munkinda wa Njambi.

² Kangelo ka Shukulu Kalunga washolokele kuli ikeye mu cifwa ca mulangi wa tuhya uje washolokele mukati ka liputa. Co Mosesa wamwene liputa lilinakushukuma, oloni kulyenyele.

³ Ngecivene, Mosesa wayongwele ngwendi, “Eci cinapu cimona cakukomokesa, njinapande kushwenyako ngeci njimone mwamuvwa. Omwo vikajo liputa kulyesi nakwenya?”

⁴ Co omo Shukulu Kalunga wamwene Mosesa nashwenye kuyehi nakumona, wamusanene mukati ka liputa ngwendi, “Mosesa! Mosesa!” Co Mosesa wakumbulwile ngwendi, “Ewa, yange uno Shukulu.”

⁵ Njambi wendekele ngwendi, “Kesi ushwenye kuyehi. Tundisa vin̄aku vyove, omwo oo awunemana anapu a livu lyakujela.”

⁶ Co wendekele lalo ngwendi, “Yange Njambi ya vakukulwila vove, Njambi ya Avilahama na Isake na Yakomba.” Co Mosesa wafwikile ku mesho endi omwo wakele na lyova lya kukenga kuli Njambi.

⁷ Asinoni Shukulu Kalunga wendekele ngwendi, “Mwa vushunga, njinamono tuyando twa vanu vange muvali nakuvapangesela mu Ingito. Njazivi valinakulila ngeci vavapatule ku vundungo vwa vaje valinakuvayandesa. Njamono a tuyando twavo twoshe.

⁸ Ngecivene, njinaija mukuvapatula ku livoko lya vaka-Ingito, nakuvatundisa mu lifuti eli lya Ingito nakuvatwala mu lifuti lyalivwa nevi vyakujenekamo vyai, muje ololo mucili vaKanana, na vaHiti, na vaAmoli, na vaPelezi, na vaHivi, na vaNjevushi.

⁹ Mwa vushunga njinazivi mutambi wa vanu vange, co njamono muvali nakuvayandesela vaka-Ingito.

¹⁰ Ngecivene, ololo ya, njilinakukutuma kuli mwene wa Ingito ngeci ukatundise vanu vange vaIsalele mu lifuti lyendi.”

¹¹ Oloni Mosesa wendekele kuli Njambi ngwendi, “Yange iyajo ngeci njiye kuli mwene nakukatundisa vaIsalele mu Ingito?”

¹² Njambi wamukumbulwile ngwendi, “Yange njikakala amo nove, co eci cikapwa cizivukiso kuli yove ngeci yange njakutumu. Omo ukatundisa vanu vaIsalele mu Ingito, co mukanjilemesa a munkinda uno vene.”

¹³ Oloni Mosesa wendekele kuli Njambi ngwendi, “Omo yange njiya kuli vaIsalele nakwendeka navo ngwange, ‘Njambi ya vakukulwila veni ikeye nanjitumu kuli yeni,’ co omo vakevo vakanjihula ngwavo, ‘Iyajo lizina lyendi?’ Co njikavaleka ngwange vati?”

¹⁴ Njambi wendekele kuli Mosesa ngwendi, “Yange Ou Njapwa Munjapwa. Omu mukemwo muukendeka navo ngwove, ‘Njapwa, ikeye nanjitumu kuli yeni.’ ”

¹⁵ Njambi wendekele lalo kuli Mosesa ngwendi, “Endeka kuli vaIsalele ngwove, ‘Yange Kalunga, Njambi ya vakukulwila veni, ikeye Njambi ya Avilahama, na Isake, na Yakomba, ikeye nanjitumu kuli yeni.’ Eli likelyo likapwa lizina lyange ku myaka yoshe, omu mukemwo muvakanjitumbula ku visemwa vyoshe vikaija kulutwe.

¹⁶ Ya ukakungulwile amo vantwama va Isalele voshe ukavaleke ngwove, ‘Shukulu Kalunga, Njambi ya vakukulwila veni, Njambi ya Avilahama, na Isake, na Yakomba, nalisholwele kuli yange. Valeke ngwove Njambi nakenge ali yeni, co namono vika vaka-Ingito valinakumilinga.

¹⁷ Co nayongola ngeci akamitundisa mu tuyando twa mu Ingito, nakumitwala mu lifuti lyalivwa nevi vyakujenekamo vyai, lifuti lya vaKanana, na vaHiti, na vaAmoli, na vaPelezi, na vaHivi, na vaNjevushi.’ ”

¹⁸ “Vanu vange vakatolilila evi ukendeka kuli vakevo. Co yove na vantwama va Isalele mukaya kuli mwene wa Ingito mukamuleka ngweni, ‘Shukulu Kalunga, Njambi ya vaHevelu, nalisholwele kuli yetu. Ololo tukulomba ngeci ututave tuye vungenzi vwa matangwa atatu mu mambo tukakombelele vin̄ombelo kuli Shukulu Kalunga Njambi yetu.’

¹⁹ Oloni njazivuka ngeci mwene wa Ingito kakamitavesa kuya kuvanga livoko lya nzili limusindiiye.

²⁰ Co njikolola livoko lyange nakupupa Ingito na vikomokeso vyange vyoshe vinjikalinga ali vakevo. Co munima yevi asinoni akamitava muye.

²¹ “Njikamwesa ngozi vanu vange ku mesho a vaka-Ingito, co cikapwa ngeci omo mukaya kumukayi mavoko-voko embwe.

²² Oloni munakazi woshe wa kaIsalele akalomba vyuma vya senga na vya siliva na vya ngolinde, na vuzalo kuli mundambo wendi wa kaIngito na kuli uje yalinakukala nendi mu njuvo yendi. Co vakavizika vana vavo va vanalume na ava va vanakazi, co mu ngila eyi mukapukula vufuko vwa vaka-Ingito.”