Kutuuka 29 - Livulu lya Shukulu Kalunga

Mwakukundikila Alone na vana vendi kupwa vaka-kukombelela

¹ “Evi vikevyo viwukalinga mukukundika Alone na vana vendi ngeci vanjipangele kupwa vaka-kukombelela. Ambata muna ngombe wa nkomba na majamba vavali va vimanga vakujeneka kapenga.

² Co pangesa vunga vwavuvwa vwakuseneta, vwakujeneka musima, oca makende amo na mazi a olive, amo kesi mwakeo mazi, co amo apwe a cifwa ca tumashama-shama twatundondo twakukwita mazi.

³ Co aake mu mutonga nakuwalambula kuli yange omo mukakombelela ngombe wa nkomba na majamba a vimanga vavali.

⁴ “Co nena Alone na vana vendi ku cikolo ca Mbalaka Mwakuliwanena, co vajwelese.

⁵ Asinoni zika Alone vuzalo vwa vuka-kukombelela. Vukevwo ovu, sanya, na cikoveyo cacilaja cije cakuzala mwisi ya kangamuna, na kangamuna, na kananga ka a nulo, na mwiva wa kandombe wakutunga mwamuvwa.

⁶ Co muzike kalupusa ku mutwe wendi, kutiiyao mande yakujela ije yakutaleka na majwi awa ‘Wakukundika kuli Shukulu Kalunga.’

⁷ Asinoni ambata mazi akumuvwavesa, etile a mutwe wendi, co muvwavese.

⁸ “Asinoni nena vana vendi nakuvazika visanya,

⁹ co vazitike miva mu vimbunda vyavo nakuvazika tukofwi ku mitwe yavo. Omu mukemwo muukakundika Alone na vana vendi. Co vakevo na vatekulwila vavo vakanjipangela kupwa vaka-kukombelela ku myaka yoshe.

¹⁰ “Co nena ngombe wa nkomba kulutwe lwa Mbalaka Mwakuliwanena, leka Alone na vana vendi ngeci vakambeke mavoko avo a mutwe wa ngombe wa nkomba,

¹¹ co tsiila ngombe wa nkomba ku mesho ange ku cikolo ca Mbalaka Mwakuliwanena.

¹² Ambata maninga amo a ngombe wa nkomba, akwite na mulavo wove ku vyakushongomoka vya mutula. Asinoni itila aje maninga anasalao ku lisanda lya mutula.

¹³ Co juvununa mazi oshe acitata-mila, na mutambela uje wauvwa wa lishuli, na vinso vivali amo na mazi avyo, co vyenyekele a mutula vipwe mulambu kuli yange.

¹⁴ Oloni unapande kwenyekela situ yoshe ya ngombe wa nkomba, na cilambu cayo, na mila yakwo anja ya cilombo. Ou ukewo mulambu wakutundisa vuvi vwa vaka-kukombelela.

¹⁵ “Asinoni ambata lijamba umo wa vimanga, co leka Alone na vana vendi vakambeke mavoko avo a mutwe wa lijamba.

¹⁶ Co mutsiye nakwambata maninga endi, nakuwashamwina a mitambela yoshe iwana ya mutula.

¹⁷ Asinoni vatozola uje lijamba vipuka-vipuka, co kusha vya mwimo na mapondo endi, vyake amo na mutwe na vipuka vikwavo.

¹⁸ Co enyekela lijamba woshe a mutula kupwa mulambu wa kwenyeka kuli yange Kalunga. Vweko vwavuvwa vwa mulambu ou wa vyakulya vukanjivwaelelesa.

¹⁹ “Co ambata lijamba mukwavo uje wakupangesa mukukundika, co leka Alone na vana vendi vakambeke mavoko avo a mutwe wendi.

²⁰ Asinoni mutsiye nakwambatako maninga amo, co akwite ku shongo ya litwi lya Alone lya ku cilyo na vana vendi lalo, na ku manyetete a ku cilyo ca mavoko avo, co na ku manyetete a ku manasha a ku cilyo cavo. Co aje maninga anasalao ashamwine ku mitambela yoshe iwana ya mutula.

²¹ Co ambatako maninga amo aje ali a mutula na mazi amo akuvwavesa, ashamwine ali Alone na a vuzalo vwendi, na ali vana vendi na a vuzalo vwavo. Asinoni ikeye na vana vendi, na vuzalo vwavo, vakapwa vakukundika kuli yange.

²² “Co vatozola mazi a lijamba, na mukila wa mazi, na citata-mila, na mutambela wauvwa wa lishuli, na vinso vivali na mazi avyo, na lindi lya ku cilyo omwo ikeye lijamba lyakwimikisa.

²³ Ku makende aje ali mu mutonga, aje vakombelelele kuli yange, ambatao mukasha umo ku muyati na muyati, umo wakwaka mazi a olive, ukwavo wakujeneka mazi, co umo wa tumashama-shama twatundondo.

²⁴ Co aka vyakulya vyoshe evi mu mavoko a Alone na vana vendi mukuvikundika kupwa vwana vwavuvwa kuli yange.

²⁵ Asinoni vitambule kuli vakevo nakuvyenyekela a mutula, akamwa ya milambu ya kwenyeka, kupwa mulambu wa vyakulya kuli yange Kalunga. Vweko vwavuvwa vwa mulambu ou wa vyakulya vukanjivwaelelesa.

²⁶ “Co ambata n̄undo ya lijamba lya manga nakuyikundika kuli yange kupwa vwana vwavuvwa. Co mbazuvwila eyi ya cimuna ikapwa yove.

²⁷ “Ngecivene, jelesa vilyo vya lijamba lya manga vyakukundika vije vyapwile vya Alone na vana vendi, vikevyo n̄undo na lindi vije vakundikile kuli yange kupwa vwana vwavuvwa.

²⁸ Eyi ikapwa mbazuvwila ya Alone na vana vendi ku simbu yoshe ivanapande kutambula kuli vanu va Isalele kutunda ku milambu yavo ya kulitombola. Ovu vukevwo vwana vwa vanu vuvakana kuli yange Kalunga.

²⁹ “Co vuzalo vwakujela vwa Alone vukapwe vwa vana vendi na ava vakamukava munima ngeci vavuzale omo vavavwavesa nakuvemika ku vipangi.

³⁰ Muna Alone wa munalume, ou akashwana mu mwela wendi kupwa muka-kukombelela omo akovela mu Mbalaka Mwakuliwanena mukupanga mu Mwela Wakujela, akazala vuzalo ovu a matangwa atanu na avali.

³¹ “Co ambata situ ya lijamba lya manga ivapangesele akwimika Alone na vana vendi, co vaitelekele mu Mwela Wakujela.

³² Co vakailile ku cikolo ca Mbalaka Mwakuliwanena na makende aje asalele mu mutonga.

³³ Co vakevo vakalya vije vivapangesele mukuvaambesa mukuvemika omo vavakundikile. Vaka-kukombelela lika vakevo vakalya vyakulya evi, omwo vikevyo vyapwa vyakujela.

³⁴ Nga situ imo yakukundikisa nambe makende amo kuvavilile, co alikaki mutondo vavyenyeke kuvapandele kuvilya omwo vyakujela.

³⁵ “Co ukalinga ngeci kuli Alone na vana vendi akuvakundika matangwa atanu na avali ngwe munjinakushiki.

³⁶ Co a litangwa na litangwa unapande kukombelela ngombe wa nkomba kupwa mulambu wa a vuvi mukwambesa vuvi. Co lalo ukajelesa mutula omo ukombelela, co ukauvwavesa mukuujelesa.

³⁷ Linga eci a litangwa na litangwa a matangwa atanu na avali mukwambesa mutula, nakuujelesa, asinoni ukapwa wakujela, co nga munu umo nambe cuma cimo cikambolako cikavulumuka a nzili yakujela kwawo.

Milambu ya a litangwa na litangwa

³⁸ “A litangwa na litangwa simbu yoshe ya kulutwe, ukakombelela a mutula vana va vimanga vavali va mwaka umolika.

³⁹ Co ukakombelela muna manga umo ku mutondo, co mukwavo ku cingwezi.

⁴⁰ Co amo na muna manga wakulivanga lambula kilo imo ya vunga vwavuvwa vwakuseneta vwakukumbasana na lita imo ya mazi amavwa a olive. Co itilao lalo lita imo ya vinyu kupwa mulambu.

⁴¹ Co kombelela muna manga wamucivali ku cingwezi, mukombelele amo na vunga, na mazi a olive, na vinyu ku mutondo lalo. Ou unapu mulambu wa vyakulya kuli yange Kalunga. Co vweko vwawo vukanjivwaelelesa.

⁴² Mulambu ou ukapwa mulambu wa kwenyeka ku mesho ange ku cikolo ca Mbalaka Mwakuliwanena ku visemwa vyeni vyoshe. Kuje kukekwo njikaliwanena nove nakwendeka nove.

⁴³ Co kuje lalo njikaliwana na vanu va Isalele, na ceke ca vumpau vwa ku mesho ange cikajelesa Mbalaka.

⁴⁴ Co njikajelesa Mbalaka na mutula, njikaangununako Alone na vana vendi nakuvajelesa mukunjipangela kupwa vaka-kukombelela.

⁴⁵ Asinoni njikakala akati ka vanu va Isalele, co njikapwa Njambi yavo.

⁴⁶ Co vakazivuka ngeci yange njapwa Kalunga Njambi yavo, uje wavatundisile mu Ingito, ngeci njikale akati kavo. Yange njapwa Kalunga Njambi yavo.