Kutuuka 28 - Livulu lya Shukulu Kalunga

Vuzalo vwa vaka-kukombelela

¹ “Sana ndolome yove Alone na vana vendi, Nandave, na Avihu, na Elyazale, na Itamale. Vaangunune kuli vanu va Isalele ngeci vanjipangele vipangi vya vuka-kukombelela.

² Tongela ndolome yove Alone vuzalo vwakujela vwa vuka-kukombelela vwakumwana kasingimiko na vuvwa.

³ Co sana vanalume voshe vaka-vutongwe vaje njinaana vutongwe, valeke ngeci vatongele Alone vuzalo, ngeci apwe wakukundama ku vipangi vyange vya vuka-kukombelela.

⁴ Co valeke vatonge kananga ka a nulo, na kangamuna na cikoveyo cacilaja, na sanya yakushoveya, na kalupusa, na mwiva. Co vatongele ndolome yove Alone na vana vendi vuzalo vwakujela vwa vuka-kukombelela, ngeci vanjipangele vipangi vya vuka-kukombelela.

⁵ Co vanalume vaje vatongwe vapangese ulu yakuzivuluka, na yakuvenguluka, na yakuvenga, na ngolinde yakupepuka yakulengula ngwe nsambo, na nanga yaivwa ya linyu.

⁶ “Co vatonge kangamuna ka ulu yakuzivuluka, na yakuvenguluka, na yakuvenga, na nsambo ya ngolinde yakupepuka, na nanga yaivwa ya linyu yakushoveya.

⁷ Co kangamuna kakale na tumiva tuvali twa a vitsili twakutongela noku-noku.

⁸ Vakaoshe mwamuvwa mwiva wa kandombe na vinanga vyakulifwa na kangamuna, vautongele a kangamuna ngeci vipwe cuma cimo.

⁹ Co nona tumamanya tuvali twa kanelya nakutalekao mazina likumi na avali a vana va Yakomba va vanalume,

¹⁰ mazina atanu na limo a kamanya kamo, co atanu na limo a kamanya kakwavo lalo ngwe kukusemuka kwavo.

¹¹ Tonda mutongwe muka-kutaleka ataleke a tumamanya tuvali mazina a vana va Yakomba, co aka tumamanya otu mu tukwatelo twa ngolinde.

¹² Co tuje tumamanya tuli mu tukwatelo twake a tumiva twa a vitsili vya kangamuna, twimanene miyati likumi na ivali ya vaIsalele. Co mu ngila eyi, Alone akambata mazina avo a vitsili vyendi, co yange Kalunga njikanuka vanu vange simbu yoshe.

¹³ Co fula tukwatelo tuvali twa ngolinde,

¹⁴ na malyenge avali a ngolinde yakujela akwosha ngwe nsambo, co vawanungile kuje ku tukwatelo.

Kananga ka a nulo

¹⁵ “Tonga kananga ka a nulo ya Muka-kukombelela Wakama mukuwana vutumbe vwa cizango ca Njambi. Katonge ka cifwa ca kangamuna na ngolinde, na ulu yakuzivuluka, na yakuvenguluka, na yakuvenga, na linyu lyalivwa lyakwosha mwamuvwa.

¹⁶ Co kapwe mumo nomu-nomu nakuketekela muvali, masentimita 22 mu vulaja na masentimita 22 mu vwihi.

¹⁷ Akao mindando iwana ya tumamanya twa seo yakama. Mu mundando wamucimo akamo tumamanya twa lumbi, na topaze, na nganete,

¹⁸ co mu mundando wamucivali akamo emalinde, na safile, na ndaimonde,

¹⁹ co mu mundando wamucitatu, akamo takwoise, na angeta, na amesita,

²⁰ co mu mundando wamuciwana akamo mbelilu, na kanelya, na njasipa, co otu tumamanya twake mu tukwatelo twa ngolinde.

²¹ Co ku tumamanya otu likumi na tuvali kamo na kamo talekao lizina lya umo na umo wa vana va Yakomba, mukwimanena miyati ya vaIsalele.

²² A kananga ka a nulo fulilao malyenge a ngolinde yakujela akwosha ngwe nsambo.

²³ Co fula makulo avali a ngolinde ngeci akwate ku vimbango vya kwilu ya kananga ka a nulo,

²⁴ co kuta aje malyenge avali a ngolinde ku makulo avali ali mu vimbango vivali vya kwilu ya kananga ka a nulo.

²⁵ Co kwatesa vishongo vikwavo vivali vya malyenge avali a ngolinde ku tukwatelo tuvali, co mu ngila eyi vikwatese na tumiva tuje tuli a vitsili ku mbando ya kangamuna.

²⁶ Asinoni fula makulo avali a ngolinde akwatese kwisi ya vimbango vya kananga ka a nulo ku mukundwilo wa mukati wakwata ku kangamuna.

²⁷ Co fula makulo avali lalo a ngolinde ngeci akwatese kwisi ya tumiva tuvali twa a vitsili ku mbando ya kangamuna, kuyehi na mutongo, akamwa ya mwiva wa kandombe wakwosha mwamuvwa.

²⁸ Co kutiiya makulo a kananga ka a nulo ku makulo a kangamuna na mukole wakuzivuluka, ngeci kaje kananga ka a nulo kakale akamwa ya mwiva wa kandombe wakwosha mwamuvwa kesi kashengenye embwe.

²⁹ “Omo Alone akovela ku Mwela Wakujela, co akazala aka kananga ka a nulo kakutaleka mazina a miyati ya Isalele, ngeci yange Kalunga njikanuke vanu vange visimbu vyoshe.

³⁰ Co mu kananga ka a nulo akamo Ulime na Tumime, ngeci Alone akavyambate omo akovela ku mesho ange. Co a visimbu vyangacije ikeye napande kuzala aka kananga ka a nulo, ngeci ase kuwana vutumbe vwa cizango cange kuli vanu va Isalele.

Vuzalo vukwavo vwa vaka-kukombelela

³¹ “Tonga cikoveyo cacilaja, cakuzala mwisi ya kangamuna, citonge coshe na ulu yakuzivuluka.

³² Co cikale na mbengwa mwakutuwisila mutwe. Co ku mbengwa eyi vetiseko lupula kutewesa kutavuka.

³³ Co ku mukundwilo waco ukakako mapomingilanete a ulu yakuzivuluka, na yakuvenguluka, na yakuvenga, nakuwashovasana na vingenjo vya ngolinde.

³⁴ Vingenjo vya ngolinde na mapomingilanete vishovasane nakuvizengeleka ku mukundwilo wa cikoveyo.

³⁵ Co Alone akazale cikoveyo eci cacilaja omo apanga vipangi vyendi vya vuka-kukombelela. Omo aija ku mesho ange ku Mwela Wakujela nambe omo atundako, ngeci kutenda kwa vingenjo vacizive ngeci kesi atse.

³⁶ “Co fula mande ya ngolinde yakujela yakupasha ngwe vulami, co talekao ngwe muje vakataleka a mamanya a cizivukiso ngwove, ‘Wakukundika kuli Shukulu Kalunga.’

³⁷ Co ikutiiye kulutwe lwa kalupusa na mukole wakuzivuluka.

³⁸ Co Alone akaizale simbu yoshe mu luholo lwendi, ngecivene, yange Kalunga njikatambula milambu yoshe ije vaIsalele vakaikundika kuli yange, nameme nga vanu vanazimbala mu ngila yakwana milambu.

³⁹ “Co tonga sanya ya Alone yakushoveya ya nanga yaivwa ya linyu, co tonga lalo kalupusa ka nanga yaivwa ya linyu, na mwiva wa kandombe wakushoveya.

⁴⁰ “Co tongela vana va Alone visanya, na miva ya tundombe, na tukofwi ngeci vivane kasingimiko na vuvwa.

⁴¹ Co ukazika ndolome yove Alone na vana vendi vuzalo ovu, asinoni ukavavwavesa na mazi akuvajelesa nakuvakundika, ngeci vanjipangele kupwa vaka-kukombelela.

⁴² Co vatongele tuputula twakuzala twa nanga ya linyu, kutunda mu mbunda nakweta mu mavuli, ngeci kesi vende mushelengwa.

⁴³ Alone na vana vendi vanapande kuzala otu tuputula simbu yoshe omo vakovela mu Mbalaka Mwakuliwanena, nambe omo vashwenya kuyehi na mutula mu vipangi vyakukombelela mu Mwela Wakujela, ngeci kesi vakale mushelengwa, kutewa vatsa. Awa akewo mashiko a myaka yoshe kuli Alone na vatekulwila vendi.