Kutuuka 27 - Livulu lya Shukulu Kalunga

Mutula

¹ “Shonga mutula wa mavaya a mungongo. Unapande kupwa mumolika, mamita 2.2 mu vulaja na mamita 2.2 mu vwihi, na mamita 1.3 mu kulova.

² Co shonga vyakushongomoka akamwa ya mutula ku vimbango viwana ngeci vipwe cuma cimo na mutula, co vausate woshe wamutunu na vunengu.

³ Fula mapanda akukundwila lito, vifwosholo, na tulonga, na vikwateso, na mapanda akwambatela tuhya a liko. Vyoshe evi vyakupangesa vipwe vyakufula na vunengu.

⁴ Fula mishele ya vunengu yakushelasana, co mu vimbango viwana akamo makulo awana a vunengu akwambatela.

⁵ Co aka mishele mwisi ya livalo lya mutula, ngeci usikisile akati ka mutula.

⁶ Co shonga mikambo yakwambatela ya mavaya a mungongo, isate na vunengu,

⁷ kovelesa mikambo mu makulo ku mutambela umo na umo wa mutula omo vawambata.

⁸ Co shonga mutula na mavaya, ukaseza mako mukati, ngwe ku vutumbe vuje njakumwesele a munkinda.

Cipango ca Mbalaka Mwakuliwanena

⁹ “Tungila cipango ku Mbalaka ca mavamba a linyu yaivwa yakushelasana mwamuvwa. Co ku mutambela wa mu mbwela mavamba apwe mamita 44 mu vulaja,

¹⁰ akukwatesa na vimanda makumi avali vya vunengu na masanda makumi avali a vunengu, na vikwateso na mavalo vyakufula na siliva.

¹¹ Linga cuma cimo na ku mutambela wa ku kunto ya cipango.

¹² Co ku mutambela wa mu kangombe ka yambi ka cipango kukale mavamba a mamita 22 mu vulaja, na vimanda likumi na masanda lalo likumi.

¹³ Co ku mutambela wa mu ngangela, kuje kuli cikolo, cipango lalo cipwe mamita 22, mumolika na ku mutambela wa mu kangombe ka yambi.

¹⁴ Co ku mutambela umo wa cikolo kukale livamba lya mamita 6.6 mu vulaja, na vimanda vitatu na masanda atatu.

¹⁵ Co ku mutambela ukwavo wa cikolo kukale livamba lya mamita 6.6 mu vulaja, na vimanda vitatu na masanda atatu.

¹⁶ Ku cikolo ca cipango kukale livamba lya mamita 9 mu vulaja lyakutonga na vinanga vyavivwa vya linyu, vyakushelasana mwamuvwa na ulu yakuzivuluka, na yakuvenguluka, na yakuvenga, yakushoveya nakushelasana. Co likwatese na vimanda viwana mu masanda awana.

¹⁷ Co vimanda vyoshe vyakuzengulwisa cipango vakavinungile na mavalo a siliva, co vikwateso vyavyo vipwe vyakufula na siliva na masanda avyo a vunengu.

¹⁸ Co cipango cikapwe mamita 44 mu vulaja, na mamita 22 mu vwihi, na mamita 2.2 mu kulova. Co mavamba apwe akutonga na vinanga vyavivwa vya linyu na masanda a vunengu.

¹⁹ Co vyoshe vivala vyakupangesa mu Mbalaka na vipampalingo vyoshe vya Mbalaka na vya cipango vipwe vyakufula na vunengu.

Mwakunyungila vindeya

²⁰ “Shika vanu va Isalele vakunenele mazi a olive amavwa akushoma mu n̄unju akwaka mu vindeya, ngeci vyase kushukuma simbu yoshe.

²¹ Alone na vana vendi vakevo vakaka vindeya mu Mbalaka anja ya livamba lije lili kulutwe lwa Cikasa ca Cikumiiyo. Co vikashukuma ku mesho ange kutunda ku cingwezi nakweta ku mutondo. Co vaIsalele na vatekulwila vavo vakanyunge kushika oku.