Kutuuka 26 - Livulu lya Shukulu Kalunga

Mbalaka Mwakuliwanena

¹ “Vwaesa mukati ka Mbalaka yakujela, Mbalaka yange Mwakuliwanena, na vinanga vyavivwa likumi vya linyu lyalivwa vyakwosha na ulu yakuzivuluka, na yakuvenguluka, na yakuvenga, vishove na vutongwe na vifwa vya vakelumbi va mambava.

² Co tonga nanga imo na imo vipwe mumo, mamita likumi na avali mu vulaja na mamita avali mu vwihi.

³ Co vyoshe vitanu vitongele amolika kupwa livamba limo, linga cuma cimolika avikwavo vitanu lalo.

⁴ Co tonga vikongo vya nanga yakuzivuluka ku mukundwilo wa anja ya livamba limo na limo.

⁵ Tonga vikongo makumi atanu a mukundwilo wa livamba lyakulivanga, co na vikongo makumi atanu ku mukundwilo wa livamba lyamucivali, ngeci vikongo vilitombole.

⁶ Co fula vikwateso makumi atanu vya ngolinde vyakunungilisa mavamba avali ngeci ipwe mbalaka imolika.

⁷ “Co tonga vinanga likumi na imo vyakufwika akamwa ya Mbalaka vyakutonga na maka a vimembe.

⁸ Co vinanga vyoshe likumi na imo vinapande kupwa mumo, mamita likumi na atatu mu vulaja na mamita avali mu vwihi.

⁹ Co vyoshe vitanu vitongele amolika ngeci vipwe livamba limo, co vikwavo lalo vitanu na imo vitongele amolika kupwa livamba lyamucivali. Co etekela muvali nanga yamucitanu na imo akamwa kulutwe lwa Mbalaka.

¹⁰ Co tonga vikongo makumi atanu ku mukundwilo wa livamba limo na vikongo makumi atanu ku mukundwilo wa livamba likwavo.

¹¹ Co fula vikwateso vya vunengu makumi atanu, vishilwise mu vikongo, co kumbasana amo mavamba oshe avali kupwa livamba limo lyakufwika akamwa ya Mbalaka.

¹² Jenjeleka litambelo lya nanga yasalao kunima ya Mbalaka.

¹³ Co masentimita makumi atanu a livamba akasalako noku-noku ku shongo ya vulaja vwa livamba, akajenjele noku-noku kumukulo wa vulaja vwa Mbalaka mukuyifwika.

¹⁴ “Co tonga vilambu vikwavo vivali vyakufwikao, cilambu cimo ca vilambu vya majamba a vimanga vyakulomba na mushumbelo wakuvenga, co cikwavo ca vilambu vyavivwa vya vimembe vyakufutungula, vyakufwika akamwa.

¹⁵ “Co shonga vivuliko vya Mbalaka vyakushungama vya mavaya a mungongo.

¹⁶ Civuliko cimo na cimo cipwe mamita awana mu vulaja, co na masentimita 66 mu vwihi,

¹⁷ co ku civuliko na civuliko kukale vyakushongomoka vivali, ngeci vyase kunungila vivuliko amo. Co vyoshe vivuliko vikale nevi vyakushongomoka.

¹⁸ Co shonga vivuliko makumi avali vya ku mutambela wa mu mbwela,

¹⁹ co fula masanda a siliva makumi awana akale kwisi yavyo, co masanda avali kwisi ya civuliko cimo na cimo mukukwatesa vije vyakushongomoka vivali.

²⁰ Co shonga vivuliko makumi avali ku mutambela wa ku kunto ya Mbalaka,

²¹ co fula masanda a siliva makumi awana, avali akale kwisi ya civuliko cimo na cimo.

²² Co anima ya Mbalaka mu kangombe ka yambi, shongelao vivuliko vitanu na cimo,

²³ co shonga vivuliko vivali vikale mu vimbango vya Mbalaka.

²⁴ Co evi vivuliko vavinungile mu vimbango vivali vivali, kutunda kwisi yavyo nakweta kwilu. Co vivuliko vivali vya mu vimbango vivali vavilinge mu ngila eyi vene.

²⁵ Ngecivene, kukakale vivuliko vitanu na vitatu na masanda avyo a siliva likumi na atanu na limo, co kwisi ya civuliko cimo na cimo kukakale masanda avali.

²⁶ “Co lalo shonga mavalo likumi na atanu a mavaya a mungongo, atanu a vivuliko ku mutambela umo wa Mbalaka,

²⁷ co mavalo atanu a vivuliko ku mutambela ukwavo wa Mbalaka, co atanu ku vivuliko vya kunima ya Mbalaka mu kangombe ka yambi.

²⁸ Co livalo lyamukati likakingivale kutunda ku shongo ya Mbalaka nakweta ku shongo ikwavo.

²⁹ Co sata vivuliko na ngolinde nakuvikuta na makulo a ngolinde mukukolesa mavalo, co akeo lalo vaasate na ngolinde.

³⁰ Co imika Mbalaka ngwe ku vutumbe vuje njakumwesele a munkinda.

³¹ “Co tonga livamba lya nanga yaivwa ya linyu yakwosha na ulu yakuzivuluka, na yakuvenguluka, na yakuvenga, yakushelasana na cifwa ca vakelumbi va mambava.

³² Co lishukike na vikwateso vya ngolinde a vimanda viwana vya mavaya a mungongo vyakusata na ngolinde, vimane a masanda awana a siliva.

³³ Co shukika livamba mwisi ya vikwateso ku vimanda. Co aka Cikasa ca Cikumiiyo kunima ya livamba. Ngeci livamba likaangunune Mwela Wakujela na Mwela Wakujela Manene.

³⁴ Aka cifwiko ca mema ku mbunge a Cikasa ca Cikumiiyo mu Mwela Wakujela Manene.

³⁵ Anja ya Mwela Wakujela Manene aka mesa ku kunto ya Mbalaka, co na citumbikilo ca vindeya ku mutambela wa mu mbwela ya Mbalaka.

³⁶ “Co ku cikolo ca Mbalaka tongelako livamba lya nanga yaivwa ya linyu yakwosha na ulu yakuzivuluka, na yakuvenguluka, na yakuvenga, yakushoveya na vwanda vwakushelasana.

³⁷ Fula vikwateso vya ngolinde vya livamba eli nakushonga vimanda vitanu vya mavaya a mungongo vyakusata na ngolinde, co vimanda evi vimane a masanda atanu a vunengu.