Kutuuka 25 - Livulu lya Shukulu Kalunga

Milambu yakutungisa mbalaka yakujela

¹ Co Shukulu Kalunga wendekele kuli Mosesa ngwendi,

² “Leka vaIsalele valambule mulambu kuli yange, co tambula milambu yoshe-iyoshe ije vanu vashaka kwana kuli yange.

³ Co milambu eyi inapande kupwa ya ngolinde, na siliva, na vunengu,

⁴ na vinanga vyavivwa vya linyu, na ulu yakuzivuluka, na yakuvenguluka, na yakuvenga, na vinanga vyakutonga na maka a vimembe,

⁵ nou wa vilambu vya majamba a vimanga vyakulomba na mushumbelo wakuvenga, nou wa vilambu vyakufutungula mwamuvwa, nou wa mavaya a mungongo,

⁶ na mazi a mu vindeya, na n̄undu yakwaka mu mazi akuvwavesa, nakwaka mu insense yakunika lwengo lwaluvwa

⁷ na tumamanya twa kanelya, na tumamanya tukwavo twa seo yakama twakwaka a kangamuna ka Muka-kukombelela Wakama, na a kananga ka a nulo yendi.

⁸ Vanu vanapande kunjitungila mbalaka yakujela, ngeci njikakale akati kavo.

⁹ Itungeni na vyoshe vivala vyamwo ngwe ku vutumbe vuje vunjikamimwesa.

Cikasa ca Cikumiiyo

¹⁰ “Shonga cikasa ca mavaya a mungongo, masentimita 110 mu vulaja, na masentimita 66 mu vwihi, co na masentimita 66 mu kulova.

¹¹ Co mukati na anja cisate na ngolinde yakujela, co kumukulo waco zengulwisako mukundwilo wa ngolinde.

¹² Co fuleni makulo awana a ngolinde akwambatela akwate ku mendi aco awana, makulo avali ku mutambela na mutambela.

¹³ Co shonga mikambo yakwambatela ya mavaya a mungongo nakuyisata na ngolinde,

¹⁴ co yishilwise mukati ka makulo a mutambela na mutambela wa cikasa.

¹⁵ Co ije mikambo ikale vene muje mu makulo, co kumwapandele kuyitundisamo lalo.

¹⁶ Asinoni aka vitale vivali vya mamanya vya vukaleo mu cikasa, vije vinjikamyana, aje ali mashiko.

¹⁷ “Co fula cifwiko cije civatumbwile ca mema ku mbunge ca ngolinde yakujela, masentimita 110 mu vulaja na masentimita 66 mu vwihi.

¹⁸ Co fula vakelumbi vavali va mambava va ngolinde yakupameyeya,

¹⁹ umo na umo ku shongo ya cifwiko. Co vapameyeye amo na cifwiko ngeci vipwe cuma cimo.

²⁰ Co vaje vakelumbi va mambava valikenge vihanga vyavo aje a cifwiko ca mema ku mbunge, na mambava avo akujanjumuka afwike cifwiko.

²¹ Co aka vitale vivali vya mamanya vya vukaleo vinjikakwana mukati ka cikasa, co aka cifwiko ca mema ku mbunge akamwa yaco.

²² Co njikakuwana muje mu Mbalaka Mwakuliwanena akamwa ya cifwiko ca mema ku mbunge, mukati ka vaje vakelumbi vavali va mambava, co njikakwana mashiko ange oshe aali vanu va Isalele.

Mesa ya makende akulambula kuli Njambi

²³ “Co shonga mesa ya mavaya a mungongo, masentimita 88 mu vulaja, na masentimita 44 mu vwihi, co na masentimita 66 mu kulova kwayo.

²⁴ Isate na ngolinde yakujela, co zengulwisako mukundwilo wa ngolinde.

²⁵ Co shonga livalo lyakupwa masentimita 7.5 mu vwihi lyakuuzengulwisa, nakwaka lalo mukundwilo wa ngolinde wakuzengulwisa livalo.

²⁶ Co ifulile makulo a ngolinde awana akwambatela, co aake ku vimbango viwana, kuje kuli mendi ayo.

²⁷ Co aje makulo akukwatesa mikambo yakwambatela mesa vawake kuyehi na livalo.

²⁸ Co shonga mikambo ya mavaya a mungongo nakuyisata na ngolinde, ngeci vakambateleo mesa.

²⁹ Co fula malonga, na vinganja, na vinjava, amo na tulonga twatundondo twakupangesa a milambu ya vinyu. Co vyoshe evi vifule na ngolinde yakujela.

³⁰ Co aka mesa kulutwe lwa Cikasa ca Cikumiiyo, co makende akujela akulambula kuli yange akakale a mesa simbu yoshe.

Citumbikilo ca vindeya

³¹ “Fula citumbikilo ca vindeya na ngolinde yakujela. Co linga lisanda lyayo na manda yayo vyakufula na ngolinde yakupameyeya, na vishani vyavwo vyakucakeya, kuwezelelako vintemo na mavundungulu avwo, co vipwe cuma cimo lika.

³² Co minango itanu na umo ikatunde ku mutambela umo na umo wa manda, minango itatu itunde ku mutambela umo na umo.

³³ Co ku minango itanu na umo kukale vishani vyakucakeya vitatu, cifwa cavyo ngwe vishani vya alumonde na mavundungulu na vintemo.

³⁴ Co manda ya citumbikilo ca vindeya ikale na vishani vyakucakeya viwana vyakufwa ngwe vishani vya alumonde amo na mavundungulu na vintemo.

³⁵ Co a manda ya citumbikilo ca vindeya akale livundungulu limo mwisi ya minango ivali, na livundungulu limo mwisi ya minango ivali, co na livundungulu limo mwisi ya minango ivali, kuje ku minango itanu na umo ije itunda ku citumbikilo ca vindeya.

³⁶ Ngecivene, mavundungulu na minango, na citumbikilo ca vindeya vikapwa cuma cimo cakupameyeya na ngolinde yakujela.

³⁷ Co fula vindeya vitanu na vivali a citumbikilo cavyo nakuvimika ngeci vitwile ceke mukati ka Mbalaka.

³⁸ Co fula vimana vyawo na malonga akushalamena a ngolinde yakujela.

³⁹ Pangesa vulemu vwa makilo 35 vwa ngolinde yakujela akufula citumbikilo ca vindeya na vivala vyavwo vyoshe.

⁴⁰ Co unapande kuvipanga ngwe ku vutumbe vuje njakumweselevwo a munkinda.