Kutuuka 24 - Livulu lya Shukulu Kalunga

Cikumiiyo vacikolesa

¹ Co Shukulu Kalunga wendekele kuli Mosesa ngwendi, “Lamata kuno ku munkinda kuli yange, yove na Alone, na Nandave, na Avihu, na vantwama va Isalele makumi atanu na avali, co simbu mucili kulyala, tsikameni nakulemesa.

² Yove lika ushwenya kuyehi nange. Kesi kukale weka lalo, embwe. Co vanu kesi veseke kwija kuno ku munkinda.”

³ Co Mosesa waile walekele vanu vyoshe vyashikile Shukulu Kalunga na vilongesa vyendi vyoshe, co vanu voshe vakumbulwile ngwavo, “Tukalinga vyuma vyoshe vije vyanendeka Shukulu Kalunga.”

⁴ Co Mosesa wasonekele majwi oshe a Shukulu Kalunga. Co alikaki mutondo watungile mutula kwisi ya munkinda, co wemikileo mamanya a vimanda likumi na avali, ku miyati ya Isalele likumi na ivali lalo.

⁵ Asinoni watumine vakwenje, co venyekele vin̄ombelo kuli Shukulu Kalunga nakukombelela vingombe kupwa milambu ya kulitombola.

⁶ Co Mosesa wambatele litambelo lya maninga a vimuna, waakele a malonga, co litambelo likwavo walitilile ku mutula.

⁷ Asinoni wanonele livulu lya cikumiiyo, muje muvasonekele vyashikile Shukulu Kalunga, walilavelele kuli vanu. Co vanu vendekele ngwavo, “Tukononoka Shukulu Kalunga nakulinga vyuma vyoshe vije vyanatushiki.”

⁸ Asinoni Mosesa wanonele maninga aje akele a malonga nakuwashamwina a vanu. Co wendekele ngwendi, “Awa akewo maninga a cikumiiyo cije canalingi Shukulu Kalunga neni omo wamyanene mashiko oshe aje ashikile.”

⁹ Co Mosesa na Alone, na Nandave na Avihu, na vantwama va Isalele makumi atanu na avali valamatele ku munkinda,

¹⁰ vamwene Njambi ya Isalele. Co mwisi ya mendi endi mwakele cimo califwile ngwe luvula lwakujala na mamanya a safile cakuzivuluka ngwe lilu.

¹¹ Njambi kavulumwine vaje vantwama va vanu va Isalele, co vakevo vamwene Njambi, asinoni valile nakunwa amo.

Mosesa a Munkinda wa Sinai

¹² Co Shukulu Kalunga wendekele kuli Mosesa ngwendi, “Lamata a munkinda wije kuno kuli yange, co simbu yove ucili kuno, njikakwana vitale vivali vije vili na mashiko na vilongesa vije vinjasonekele ngeci ukavalongesevyo.”

¹³ Co Mosesa na mukwasi wendi Yoshwa valivwaesele, Mosesa walamatele ku munkinda wakujela.

¹⁴ Co Mosesa wendekele kuli vantwama ngwendi, “Tuvandameneni muno mu cilombo noo twiluka. Saleni na Alone, na Hule kuno, co woshe uje ali na vimo vyakusompa aye kuli vakevo.”

¹⁵ Mosesa walamatele ku Munkinda wa Sinai, co lishelwa lyafwikile munkinda.

¹⁶ Vumpau vwa Shukulu Kalunga vwashulukilile a Munkinda wa Sinai, co lishelwa lyafwikile munkinda matangwa atanu na limo. Co a litangwa lyamucitanu na avali Shukulu Kalunga wasanene Mosesa muje mu lishelwa.

¹⁷ Kuli vaIsalele vumpau vwa Shukulu Kalunga vwasholokele ngwe tuhya tulinakushukuma akamwa ya Munkinda wa Sinai.

¹⁸ Co Mosesa walamatele ku munkinda muje mu lishelwa, wakakele kuje matangwa makumi awana a vutsiki na mutanya.