Kutuuka 23 - Livulu lya Shukulu Kalunga

Vushunga na mema ku mbunge

¹ “Kesi mushandole lingwavo lya makuli, co kesi mukwase munu ali na mulonga akwana vukaleo vwa makuli.

² Kesi mulizivasane na vanu vavangi omo vakevo valinga mwamuvi nambe omo vendeka vukaleo vwakutengulula vushunga.

³ Kesi musompele vulemu omo vasompesa muka-kuutwa.

⁴ “Nga muwana ngombe wa nkomba nambe cimulu wa citozi cove nazimbala, mwilwisileye.

⁵ Nga cimulu ca citozi ceni camusindakana citele, co kesi mumutuvakane embwe, mukwaseni kumutundisa cije citele nakumwimika.

⁶ “Kesi muvyanene vushunga munu muka-kuutwa omo asholoka mu mbanja.

⁷ Kesi mukutiiye munu vya makuli, nambe kusompela kutsa uje munu kesi na mulonga, omwo njikahisa munu woshe uje alinga cuma cacivi ngacije.

⁸ Kesi mutave lizika-kanwa, omwo lizika-kanwa lilingisa vanu vupuputwa ku vije vya vushunga, co liviisa vin̄anda vya vaje kuvesi na mulonga.

⁹ “Kesi mupangese muka-kwija mwamuvi, mwazivuka vati muka-kwija akalizivi mu mbunge yendi, omwo neni mwapwile vaka-kwija mu Ingito.

Mwaka wamucitanu na ivali na litangwa lyamucitanu na avali

¹⁰ “A myaka itanu na umo mukalima mahya eni na kuteja vije mwakunine.

¹¹ Oloni a mwaka wamucitanu na ivali mukalikela kulima, co kumukatejemo lalo vije vikamenamo. Co tuutu vaje vali akati keni valye vije vinasalamo, na tusitu valye vije vinasalamo lalo. Lingeni cuma cimo na ku mahya eni a mikolovozi ya vushuka vwa vinyu na ku miti yeni ya mazi a olive.

¹² “Pangeni matangwa atanu na limo mu simano, oloni kesi mukapange vipangi a litangwa lyamucitanu na avali, ngeci vindungo veni na vaka-kwija vaje valinakumipangela, nambe vimuna veni vakahwime.

¹³ “Co tolilileni ku vyuma vyoshe vije vinjendeka kuli yeni yange Kalunga. Kesi mulombele kuli vinjambi veka, kesi muvatumbozole nameme a mazina avo.

Viwano vitatu vyakama

¹⁴ “Mukanjilingila viwano vitatu vyakulisamba a mwaka vyakunjilemesa.

¹⁵ Mu ngonde ya Avive, ngonde ije mwatundile mu Ingito, lisambeni Ciwano ca Makende Akujeneka Musima mu ngila ije injamishikile vene. Kesi mulye makende akulinga na musima a simbu ije ya matangwa atanu na avali a ciwano eci. Co kesi mwije nakunjilemesa kujeneka mulambu.

¹⁶ “Mukalisamba a Ciwano ca Kuteja omo mukashangumuka kuteja vimbuto vyeni. “Mukalisamba a Ciwano ca Mapapela a civatu ca nyonzi, omo mulinakukungulula vushuka vwa mu mahya eni a mikolovozi ya vushuka vwa vinyu.

¹⁷ Co a mwaka na mwaka a simbu yevi viwano vitatu vanalume voshe vanapande kwija nakunjilemesa yange Kalunga Njambi yeni.

¹⁸ “Kesi mukalambule makende akulinga na musima omo mukakombelela kasitu kuli yange. Co lalo mazi a vimuna vaje munakombelela kuli yange a simbu ya viwano evi kesi mukawaseze noo alikaki mutondo.

¹⁹ “Mukanena vimbuto vije mwateje akulivanga ku njuvo ya Shukulu Kalunga Njambi yeni a mwaka na mwaka. “Kesi mukateleke muna manga nambe muna membe na mavele a vainavo embwe.

Vikulaeso na vilongesa

²⁰ “Njikatuma kangelo kulutwe lweni akaminyunga omo mulinakwenda, co akamitwala ku mwela uje njamivwaeselelewo.

²¹ Ngecivene, mutolilileni nakumwononoka. Co kesi mumutengulukile, omwo yange njinamutumu, oloni nga mumutengulukila, co kakasambesa milonga yangacije, omwo lizina lyange lili muli ikeye.

²² Oloni nga mumwononoka nakulinga vyuma vyoshe vije vinjinashiki, njikalwisa vitozi veni voshe.

²³ Co kangelo kange akaya kulutwe lweni akamitwala mu lifuti lije lya vaAmoli, na vaHiti, na vaPelezi, na vaKanana, na vaHivi, na vaNjevushi, co njikavanyongesa.

²⁴ Kesi mukatsikamene vinjambi vavo nakuvalemesa, co kesi mutembunwine futisi yavo yakulemesa. Nyongeseni vinjambi vavo nakusiwula mamanya a vimanda vyavo vyakulemesela.

²⁵ Nga munjilemesa yange Kalunga Njambi yeni, co njikamivezikisa vyakulya na mema, co njikatundisa mishongo akati keni.

²⁶ Mu lifuti lyeni naumo wai munakazi akajombwesa limbo nambe akajeneka mwana, njikamiyoyesa simbu yakama.

²⁷ “Vanu vaje vamivyanangana njikavazivisa lyova, co njikalingisa kwiyasana akati ka vanu vaje mulinakulwa navo, co vitozi veni voshe vakamitewa.

²⁸ Njikaiya-yiisa vitozi vyeni, njikasheka vaHivi, na vaKanana, na vaHiti, omo mukaya kulutwe.

²⁹ Kunjikavashekemo a mwaka umolika embwe, nga njilingamo, co lifuti likapwa vingundu, co tusitu vakatuma manene lalo.

³⁰ Oloni, njikavatundisamo kamandondo-kamandondo lika, noo yeni voshe munajauka mu lifuti.

³¹ Co njikatwa vinginga vya lifuti lyeni nakuvyamesa kutunda ku Linema lya Akava kutwala ku Lishali lya Menditelenyani, nakutunda ku mambo nakweta ku Ndonga ya Yufuleti. Co njikamyana moko akamwa yavavenya lifuti lije, mukavashekamo nakuvatundisamo omo mukaya kulutwe.

³² Kesi mukalizivasane navo nambe kulizivasana na vinjambi vavo.

³³ Kesi mutave vanu vaje vakayoye mu lifuti lyeni, nga mulingamo, vakamilingisa vuvi ku mesho ange. Nga mukalemesa vinjambi vavo, co cikapwa ciliva cakuminyongesa.”