Kutuuka 22 - Livulu lya Shukulu Kalunga

Mashiko akulifwetesa

¹ “Nga munu aiva ngombe nambe manga, co amutsiya nambe amulandesa, ikeye napande kufweta vingombe vatanu a ngombe umo, co na vimanga vawana a manga umo.

² “Nga a simbu ya vutsiki, mwizi akovela nakutuva njuvo, vamukwata nakumupupa, co atsa, uje namutsii kesi na mulonga wa monde embwe.

³ Oloni nga cilingiwa a simbu ya mutanya, co uje namutsii ali na mulonga wa monde. “Co mwizi napande kufweta vije vyanevile. Nga kesi navyo, co vakamulandese ngwe ndungo nakufweta vije nevile.

⁴ Nga munu aiva ngombe, nambe cimulu, nambe manga, co uje cimuna vamuwana ayoya mu mutambela wendi, uje munu napande kufweta vimuna vavali a cimuna umo.

⁵ “Nga munu ecelela vimuna vendi, co vatuva citungu nakukalya vimbuto vije vilinakukula mu lihya lya mukwavo, napande kumufwetela vimbuto vyoshe vyavivwa vya mu lihya lyendi, nameme vushuka vwendi vwavuvwa vwa mikolovozi ya vushuka vwa vinyu.

⁶ “Nga munu ashangumuka kwenyeka tuhya mu lihya lyendi, co tushambukila ku lishaka nambe ku mwila, co twenyeka tiliku ili mu lihya lya mukwavo ije inakolelamo nambe ije vanavungika amo, co uje nashangumukile kwenyeka tuhya napande kufweta vije vinaviya.

⁷ “Nga munu atava kutulika vimbongo vya mukwavo nambe vufuko vwendi, co vukevwo vavwivila mu njuvo yendi, co uje mwizi, nga vanamuwana, vamufwetesa luvali.

⁸ Oloni nga uje mwizi kuvamuwanene, co uje munu watulikile vuje vufuko vamunene ku mwela wakulemesela, co kuje napande kulisinga ngwendi kesi ikeye nevi vufuko vwa mukwavo.

⁹ “Akusompa mulonga woshe-iwoshe wa vufuko, nambe cije cinenika a ngombe, nambe cimulu, nambe manga, nambe vuzalo, nambe cuma coshe-icoshe cije cinazimbala, co a vanu vavali valikanangana a vufuko, vavatwale ku mwela wakulemesela. Co Njambi akavasompa awane iya ali na mulonga, co afwetele mukwavo luvali.

¹⁰ “Nga munu atava kunyunga cimulu ca mukwavo, nambe ngombe, nambe manga, nambe cimuna weka, co uje cimuna atsa, nambe apokoka, nambe vanamwivi, nga kukwesi mukaleo,

¹¹ uje munu napande kuya ku mwela wakulemesela nakulisinga ngwendi kesi ikeye nevi uje cimuna ca mukwavo. Co nga uje cimuna kuvamwivile, uje munu kesi na mulonga, co uje mukwavo kapandele kumufwetela.

¹² Oloni nga uje cimuna vanamwivi, uje munu napande afwetele vavenyaye.

¹³ Co nga vamukwatele ku cikashama, uje munu napande kunena visupo mukumwesa vukaleo, co kapandele kufweta uje naliwa ku cikashama.

¹⁴ “Nga munu alomba cimuna ca mukwavo, co apokoka nambe atsa omo vavenyaye waiko, co uje munu amufweteleye.

¹⁵ Oloni nga cilingiwa oku vavenyaye ouye, co uje munu kafwete. Nga uje cimuna wapwile wakukumuna, co vije vimbongo vyakumwisile uje cimuna vinapumo mu fweto yendi.

Mashiko a vunjambi na kalesi ya vanu

¹⁶ “Nga munu akokweya mumbanda uje kanda alimone na munalume, co lalo kanda vamwambate, co alimona nendi, vanapande kumufwetesa vyonda, co ambate uje mumbanda.

¹⁷ Oloni nga ishe avyana kumwambata, co amufwetese vimbongo vyapande mu vyonda vya inamusho.

¹⁸ “Kesi mutave munakazi muka-manseno ngeci ayoye embwe.

¹⁹ “Munu woshe uje akalala na kasitu vanapande kumutsiya.

²⁰ “Munu woshe uje akombelela ku vinjambi veka vanapande kumutsiya, oloni vakombelele lika kuli yange Kalunga.

²¹ “Kesi mupangese mwamuvi nambe kuyandesa muka-kwija embwe, omwo neni lalo anukeni ngweni mwapwile vaka-kwija mu Ingito.

²² Kesi muyandese fwile nambe muna siwa.

²³ Nga yeni mucilinga, co yange Kalunga, njikavakumbulula omo valinakuteta ngeci vavakwase,

²⁴ co njikaziva matoto nakumitsiila mu nzita. Co vanakazi veni vakapwa vifwile, na vana veni vakapwa visiwa.

²⁵ “Nga mukumwisa vimbongo ku vanu vange vamo vaka-kuutwa, kesi mulinge ngwe vaka-kukumwisa vaje vashakao kakondweso.

²⁶ Nga mwambata kambilititi ka mukweni kupwa cishimbikiya, co mwilwisileniko omo litangwa kanda licitoke,

²⁷ omwo kakeko lika kambilititi kalinako, co vyeka lalo vyalifwika vika? Omo anjilomba yange kumukwasa, co njikamukumbulula omwo yange nji muka-mema ku mbunge.

²⁸ “Kesi mwendeke mwamuvi ali Njambi, co lalo kesi musinge ntwama wa vanu veni.

²⁹ “Kesi mwishwale kulambula kuli yange milambu ya vyakulya vyeni, na vimbuto vyeni, na vinyu vyeni, na mazi eni a olive, omo simbu ya kuteja inete. “Aneni vana veni va va ntwatwa va vanalume kuli yange.

³⁰ Lambuleni kuli yange vingombe veni, na vimanga veni vaje vakulivanga kusemuka. Co vimuna vaje vakulivanga kusemuka vakakala na vaina matangwa atanu na avali, co a litangwa lyamucitanu na atatu mukavalambula kuli yange.

³¹ “Yeni munapu mu vanu vange vakujela, kumwapandele kulya situ ya kasitu uje ivanakwata ku vikashama, oloni yaneni tutali.