Kutuuka 21 - Livulu lya Shukulu Kalunga

Mwakupangesela vindungo

¹ Shukulu Kalunga waanene Mosesa mashiko a vanu vendi ngwendi,

² “Nga ulanda ndungo wa kaHevelu, co ikeye akakupangela myaka itanu na umo. Co mu mwaka wamucitanu na ivali, ikeye napande kupatuka kujeneka kufweta cuma cimo.

³ Co nga ikeye kambatele omo wamulandele, co kapandele kuya na munakazi omo aya, oloni nga ikeye wezile na munakazi, co napande kuya amo nendi.

⁴ Nga shukulu yendi wamwanene munakazi, co ikeye nakitile vana va vanalume nambe va vanakazi, co uje munakazi na vana vendi vanapu va shukulu yendi, co uje munalume napande kuya endi lika.

⁵ Oloni nga uje ndungo endeka ngwendi azema shukulu yendi, na munakazi wendi, na vana vendi, co ikeye kashaka kupatuka,

⁶ asinoni shukulu yendi akamutwale ku mesho a Njambi ku mutambela wakulemesela. Kuje akamwimika ku cikolo nambe ku cipamba ca cikolo, co amutuve ku litwi lyendi. Asinoni akapwa ndungo yendi wa myaka yoshe.

⁷ “Oloni nga munu alandesa munendi wa munakazi ngeci akapwe ndungo, co shukulu yendi kapandele kumweca ngoco embwe, ngwe muvakalingilamo vindungo va vanalume.

⁸ Nga vanamulandesa kuli munu umo uje ashaka kumupwisa munakazi wendi, oloni nga kavwaelelesa shukulu yendi, co uje shukulu yendi kapandele kumulandesa ku vaka-kwija omwo ikeye kamutetelele, oloni ishe amupatule.

⁹ Nga munu nalanda ndungo wa munakazi nakumwana kuli munendi wa munalume, napande kumupwisa ngwe munendi wa munakazi.

¹⁰ Nga munu ambata munakazi wamucivali, ikeye napande kutwalao kwana kuli munakazi wendi wakulivanga vyakulya vyakupwisa mumo na vuzalo, na vije vyamupande, ngwe muje mwalaja.

¹¹ Nga kamulingila evi, co napande kumwecela ngoco kesi atambuleko cuma cimo ca matemo.

Mashiko a vilinga vyakuvulumuna

¹² “Woshe uje apupa mukwavo nakumutsiya, co na ikeye vamutsiye.

¹³ Oloni nga namutsii cintulu, ikeye kayongwele kutsiya munu, co ikeye atewele ku mutambela uje njikamwangwilawo, co kuje akakala mwamuvwa.

¹⁴ Oloni nga munu ali na matoto, co atsiya mukwavo na muuka, munapande kumutsiya, nameme nga atewela ku mutula wange nakulyamena, napande kutsa.

¹⁵ “Woshe uje apupa ishe nambe vaina, vanapande kumutsiya.

¹⁶ “Woshe uje aiva munu, nambe kumulandesa, nambe kumufuka ngwe ndungo, vanapande kumutsiya.

¹⁷ “Woshe uje asinga ishe nambe vaina, vanapande kumutsiya.

¹⁸ “Nga vanu valinakulwa, co umo apupa mukwavo n̄ome nambe amwasha limanya, oloni ikeye kamutsiile, munu uje kesi na mulonga wai. Nga munu uje ivanapupu akala a vulili,

¹⁹ oloni mu kasimbu lika enduka atuuka anja, co endela a mukombo, uje munalume namupupile napande kumufwetela a simbu yendi yanombila, nakumunyunga noo nenduka mwamuvwa.

²⁰ “Nga munu apupa ndungo yendi wa munalume nambe wa munakazi na citi, co uje ndungo atsila aje vene, co uje munu vamuhise.

²¹ Oloni uje ndungo nga katsile a simbu ije, oloni nga kuneti litangwa limo nambe matangwa avali, co uje shukulu yendi kuvapandele kumuhisa, omwo uje ndungo napu wa vimbongo vyendi.

²² “Nga vanalume vamo valinakulwa, co vavulumuna munakazi ali na limo, co ikeye ajombwesa limbo, oloni kavulumukile mu ngila imo yeka, co uje munalume namuvulumuna vamufwetese mwoshe mwashakela munalume wa uje munakazi, kupwisa ngwe muvavatwila n̄anda maako.

²³ Oloni nga uje munakazi ikeye vavenya navulumuka, co cihiso cipwe mwonyo na mwonyo,

²⁴ lisho na lisho, liyo na liyo, livoko na livoko, lindi na lindi,

²⁵ kwenya na kwenya, mbandu na mbandu, mukiki na mukiki.

²⁶ “Nga munu apupa ndungo yendi wa munalume nambe wa munakazi mu lisho, co lisho litivika, ikeye amwecele uje ndungo omwo a fweto ya lisho lyendi.

²⁷ Nga vanamupukula liyo, ikeye amwecele uje ndungo omwo a fweto ya liyo lyendi.

Mwanapande kulinga vavenya vyuma

²⁸ “Nga ngombe wa nkomba ativa munu limbinga, co atsa, co vanapande kumwasha mamanya, co situ yendi kesi vailye, oloni vavenyaye kesi vamuhise.

²⁹ Oloni nga uje ngombe wa nkomba capwa cilika cendi cakulwisa vanu, co vavenyaye vamunangwile oloni kesi kumukuta, nga uje ngombe wa nkomba atsiya munu oni, co vamwashe mamanya, na uje vavenyaye vamwashe mamanya lalo.

³⁰ Nameme ngoco, nga vamutumbwila fweto yakukula mwonyo wendi, co ikeye napande kufweta ndando ishakiwako yoshe.

³¹ Nga uje ngombe wa nkomba atsiya mukwenje nambe mumbanda, co anga lishiko limo vanapande kulikava.

³² Nga uje ngombe wa nkomba atsiya munalume nambe munakazi wa ndungo, co uje vavenyaye afwetele vavenya uje ndungo mavundungulu a siliva makumi atatu, co uje ngombe wa nkomba vamwashe mamanya nakumutsiya.

³³ “Nga munu aseza mbulu ya kufwika, nambe nga ainda mbulu, ikeye kaifwiki mwamuvwa, co ngombe wa nkomba nambe cimulu awilamo,

³⁴ ikeye napande kufweta uje cimuna. Afwete vimbongo kuli uje vavenya cimuna, co ikeye ambate uje cimuna natsi.

³⁵ Nga ngombe wa nkomba wa munu umo atsiya ngombe wa nkomba wa mukwavo, co vaje vanu vavali valandese uje ngombe wa nkomba wakuyoya ngeci valipangele vimbongo, co lalo valipangele situ ya uje cimuna natsi.

³⁶ Oloni nga vazivuka ngwavo uje ngombe capwa cilika cendi cakulwa, co uje vavenyaye kesi kumukuta, napande kufwetela mukwavo ngombe weka wakuyoya, co ikeye napande kwambata uje ngombe wa kutsa.