Kutuuka 20 - Livulu lya Shukulu Kalunga

Mashiko Likumi

¹ Njambi wendekele majwi ano oshe ngwendi,

² “Yange njapwa Kalunga Njambi yeni, uje wamitundisile mu Ingito, kuje kumwakele mu vinzinda.

³ “Kesi mulemese njambi weka kuvanga yange lika.

⁴ “Kesi mukalishongele cifwa ca cuma cimo cili mwilu, nambe cili ano asi, nambe cili mu mema mwisi ya asi.

⁵ Kesi mukatsikamene tumponya, nambe kutulemesa, omwo yange Kalunga Njambi yeni, njapwa Njambi wa lifuwa. Co njikahisa vaje vanjizinda na vatekulwila vavo kutwala ku cisemwa camucitatu neci camuciwana.

⁶ Oloni njikamwesa cizemo cange cije kucesi kutenguluka ku visemwa vyakupwa 1,000 vya vaje vanjizema nakunyunga mashiko ange.

⁷ “Kesi mukapangese lizina lyange mwamuvi, omwo yange Kalunga Njambi yeni, njikahisa voshe vaje vakapangesa lizina lyange mwamuvi.

⁸ “Nyungeni Litangwa Lyakuhwima nakulijelesa.

⁹ Mukapanga nakulinga vipangi vyeni vyoshe matangwa atanu na limo,

¹⁰ oloni litangwa lyamucitanu na avali likelyo likapwa Litangwa Lyakuhwima lije limukakundika kuli yange Kalunga Njambi yeni. A litangwa lije kumukapanga cuma nacimo cai, nambe yeni, nambe vana veni va vanalume, nambe vana veni va vanakazi, nambe vindungo veni, nambe vimuna veni, nambe vaka-kwija vaje vali mu lifuti lyeni.

¹¹ Omwo a matangwa atanu na limo, yange Kalunga njatangele lilu, na asi, na mema a kalunga, na vyoshe vije vilimo, oloni a litangwa lyamucitanu na avali likelyo njahwimine. Mukemwo vene yange Kalunga njavezikisile Litangwa Lyakuhwima nakulijelesa.

¹² “Singimikeni vaishweni na vanyokweni, ngeci mukayoye simbu yakama mu lifuti lije linjikamyana yange Kalunga Njambi yeni.

¹³ “Kesi mukatsiye.

¹⁴ “Kesi mukalinge vupangala.

¹⁵ “Kesi mukaive.

¹⁶ “Kesi mukavangele mukweni vukaleo vwa makuli.

¹⁷ “Kesi mukaliveyele njuvo ya mukweni, kesi mukaliveyele munakazi wa mukweni, nambe ndungo yendi wa munalume, nambe ndungo yendi wa munakazi, nambe ngombe yendi, nambe cimulu cendi, nambe cuma cimo ceka calinaco.”

Vanu vaziva lyova

¹⁸ Omo vanu vazivile cililimo nakutenda kwa lupembo, co vamwene muhyato na vwisi vwakele nakukakama a munkinda, co vajajele na lyova, vemanene alyala.

¹⁹ Vendekele kuli Mosesa ngwavo, “Nga yove wendeka kuli yetu, co tukakutolilila, oloni yetu tuli na lyova nga Njambi endeka kuli yetu, co tukatsa vene.”

²⁰ Co Mosesa wavakumbulwile ngwendi, “Kesi muzive lyova, Njambi naija lika nakumilingisa ngeci mutwaleleo kumukomoka kesi mukalinge vuvi.”

²¹ Oloni vanu vatwaleleo kwimana alyala, kuvanga Mosesa lika washwenyele kuyehi na lishelwa lyakuzivala kuje kwakele Njambi.

Mashiko akutunga mitula

²² Shukulu Kalunga washikile Mosesa endeke kuli vaIsalele ngwendi, “Munamono ngeci yange Kalunga njinendeka kuli yeni kutunda mwilu.

²³ Kesi mulipangele vinjambi va siliva nambe va ngolinde ngeci muvalemese muvapandakane kuli yange embwe.

²⁴ Co njimungileni mutula wa livu, akeo mukakombelelao vimanga veni na vingombe veni kupwa milambu yamutunu ya kwenyeka, amo na milambu ya kulitombola. Mu mutambela woshe uje njikemika wakunjilemesela, co njikaija kuli yeni nakumivezikisa.

²⁵ Nga mukanjitungila mutula wa mamanya, kesi muutungise mamanya akulamozola, omwo nga mupangesa shinjo a mamanya, co uje mutula upwa wakujwala.

²⁶ Kesi mukanjitungile mutula wa makandu akulondela kwilu, kutewa shwamwa yeni ikasholoka omo mulondao.”