Kutuuka 17 - Livulu lya Shukulu Kalunga

Mema akutunda mu limanya

¹ Mbunga yoshe ya vaIsalele vatundile ku Mambo ya Sine, co vajalozokele ngwe mwavashikile Shukulu Kalunga. Vakatungile cilombo ku Lefindime, oloni kuje kukwakele mema akunwa.

² Co valinyengelele kuli Mosesa nakwendeka ngwavo, “Twane mema tunwe.” Mosesa wavakumbulwile ngwendi, “Omwo vikajo mulinakulinyengela kuli yange? Omwo vikajo mulinakweseka Shukulu Kalunga?”

³ Oloni vanu va Isalele vakele na lihwila manene, co anga vatwaleleo kulinyengela kuli Mosesa. Vendekele ngwavo, “Omo vikajo watutundisilile mu Ingito ngeci wakututsise na vana vetu na vimuna vetu ku lihwila?”

⁴ Co Mosesa watambekele nakulombela kuli Shukulu Kalunga wendekele ngwendi, “Vatijo njilinga na vanu ava? Vakevo vanesi kunjasha mamanya.”

⁵ Co Shukulu Kalunga wendekele kuli Mosesa ngwendi, “Ya na vantwama vamo va Isalele, twama kulutwe lwa vanu, ambata mulamu wove uje wapupisile a Nailo.

⁶ Yange njikakala kulutwe lwove a limanya a Munkinda wa Sinai. Pupa a limanya, co mema akatuukako ngeci vanu vakanwe.” Co Mosesa walingile ngacije ku mesho a vantwama va Isalele.

⁷ Mwela uje vautumbwile Masa na Meliva, omwo vaIsalele valinyengele nakweseka Shukulu Kalunga omo vehwile ngwavo, “Kuma Shukulu Kalunga ali netu ndi?”

VaIsalele valwa nzita na vaAmaleke

⁸ VaAmaleke vezile nakulwisa vaIsalele ku Lefindime.

⁹ Co Mosesa wendekele kuli Yoshwa ngwendi, “Angula vanalume vamo ngeci imene vaye nakulwa na vaAmaleke. Co yange njikemana a lilundu nakukwatelela mulamu uje wanjilekele Njambi kuwambata.”

¹⁰ Ngecivene, Yoshwa walingile ngwe mwamushikile Mosesa, co walwile na vaAmaleke, co Mosesa, na Alone, na Hule valamatele akamwa ya lilundu.

¹¹ Omo Mosesa wolwele mavoko endi, co vaIsalele vahyanene, oloni omo wawisile mavoko endi, co vaAmaleke vashangumukile kuhyana.

¹² Omo mavoko a Mosesa ajukile, Alone na Hule vamunenelele limanya ngeci atumbameo, co vakevo vemanene kuyehi nendi vajundwile mavoko endi, vawakwatelele noo litangwa lyatokele.

¹³ Co mu ngila eyi vene Yoshwa wahyanene nakufungulula vaAmaleke.

¹⁴ Asinoni Shukulu Kalunga wendekele kuli Mosesa ngwendi, “Soneka vin̄anda evi vyakuhyana mu livulu, ngeci vikapwe canukiso. Co lalo leka Yoshwa ngwove njikanyongesa vaAmaleke voshe njwa.”

¹⁵ Co Mosesa watungile mutula nakuuluka lizina ngwendi “Shukulu Kalunga ikeye Muka-kunjihyanesa.”

¹⁶ Co wendekele ngwendi, “Eci cinasholoka omwo njakulaelele kuli Shukulu Kalunga! Shukulu Kalunga anga akatwalao kulwa na vaAmaleke ku visemwa vya kulutwe!”